Di palei Phước Hội, xã Suối Đá, huyện Dương Minh Châu, urang nong angan Võ Văn Ten, daok iew lac ong Năm Ten daneiy angan lac urang ngak mbang naih jioy, yaok thun mek hu jaik 2 tỷ đồng. Tuk bahrau padang mbang angui, ong hu 1 ha taneh ngak nong kayua amaik ame caik veik. Urang taha umo 74 thun ini brei thau, hu kaya meda yau harei ini meng hu phun jien mesre di gilang pariak. Ong Năm Ten lac: Pala atau raong hagait jeng brei hu taneh. Dahlak takre di abih nan lac pala glai, pala phun lavik thun. Dalam bruk ngak nong meyah dahlak kurang phun jien, dahlak caong khin hadom ye gilang pariak brei mesre chip. Nan ye bruk ngak mbang di dahlak cakrok patagok khang.

Ong Năm Ten lac sa dalam jaik 90 ribau baoh sang dalam kapul pambuak bruk ngak mbang di tỉnh Tây Ninh hu mesre phun jien di gilang pariak Ngak nong saong patagok palei pala piah ngak kinh tế. Jalan ngak ini hu mong lac “gah tangin pambuak atah” saong lac talei pambuak urang nong saong gilang pariak Ngak nong saong patagok palei pala (Agribank). Meng jalan ngak ini, jien phun Agribank mai tal tangin urang nong hu mbuan laghaih saong samar drah jang, daong ka urang pandar phun jien njauk bruk, njauk jalan. Ong Phạm Văn Tẩy, Akaok kapul pambuak bruk ngak mbang palei Phước Bình 2, xã Suối Đá, huyện Dương Minh Châu brei thau: kapul di ong urak ini hu jaik 50 baoh sang mesre abih tih jaik 2 tỷ đồng. Tal urak ini, dom baoh sang ini jeng hu grap tanat, sang danaok prong siam saong anek bhik hu nao bac daa tal labik tal dhua: Dahlak ngak mbang hu ye dahlak blei taneh, dahlak kurang jienye dahlak nao mesre di gilang pariak. Urak ini, dahlak hu 3 ha taneh piah paka phun mbang baoh. Pagap yau vụ mùa dahlak oh ka tal harei thu hoạch, oh ka hu jien piah bayar ka gilang pariak ye gilang pariak brei dui atah tukvak piah palaghaih ka drei bayar sre.

Dalam tuk ngak mbang, meyah urang dalam kapul mesre phun j8ien gaok khat lihik ye njauk taom gaok chip gilang pariak piah duah jalan langyah. Gilang pariak pasang iek brei dui atah tukvak mesraiy jien ka urang nong tuk oh patuah njam patam njauk khat lahik kayua langik tasik atau kayua jit ruak. Dalam raong glang, meyah harei bayar sraiy tal dahlau harei pablei, gilang pariak jeng pasang iek, dui atah tukvak mesre piah ka urang nong sahanang hatai raong glang song caih laba. Meng jalan brei mesre tui kapul pambuak bruk, urang ngak nong meng labik pala drak, raong glang sit sot, urak ini hu tagok jeng ngak mbang prong. Tui ong Trần Văn Hận, Akaok Kapul urang nong tỉnh Tây Ninh, jalan brei mesre tui kapul pambuyak bruk hu daong patrun bruk brei mesre jien jhung trak, abih di nyu nan lac bruk pablei padai meda, phun anek pajaih pak dom puk palei bhum atah bayah di tỉnh… Bruk langyah brei mesre di gilang pariak jeng biak samar, daong ka mikva urang nong khang hatai mesre phun jien piah ngak mbang: Meng tuk ngak salah harak gar meng urang jakar Kapul urang nong tapa urang jakar tín dụng dalam 4 harei min, suai di abih 4 harei ye mikva taduan mek hu jien. Ini hu mong lac sa bruk salih bahrau thủ tục hành chính biak siam laghaih, daong ka mikva urang nong khang hatai mesre jien piah ngak mbang pala drak.

Tal urak ini, Agribank – dhar tỉnh Tây Ninh hu brei ka jaik 1.900 kapul pambuak bruk ngak mbang mesre phun jien labaih 1 ribau tỷ (meblah labaih 10% jien brei mesraiy di dhar gilang pariak ini). Ong Võ Tự Thiện, Akaok Agribank Tây Ninh brei thau: Kapul mesre phun jien pambuak bruk ngak mbang lac labik bo mikva urang nong payua hatai jia, klah rabha ilamu dalam bruk ngak mbang pablei salih. Piah nao gam haong urang nong, gilang pariak tuk halei jeng khik ramik talei pambuak bruk khang kajap haong dom kapul nyaom, abih di nyu nan lac kapul urang nong. Ong Võ Tự Thiện daok brei thau lac: Khaol dahlak brei urang jakar hu mbaok tame dom kapul nyaom, atau dom hội doanh nghiệp doanh nhân. Hu mbaok tame dom kapul nyaom yau nan, urang jakar gilang pariak meng thau cambaih jang bruk di anak meta, dom urang nan jeng thau cambaih jang bruk ngak di gilang pariak. Meng nan peih ngak dom bruk di gilang pariak tal bhap bani hu siam mekre jang.

Tapa dom kapul pambuak bruk ngak mbang piah thau bruk caong khin phun jien di bhap bani, meng nan samar ba tabiak jalan ngak drah samar, siam laghaih piah patagok bruk ngak nong, palei pala lac jalan ngak biak siam di Gilang pariak Ngak nong saong patagok palei pala, daong ka urang nong tabiak truh kan kathaot saong ngak hu kaya meda./.