Labaih 10 thun ini mai, tal tết nguyên đán ye bộ đội Cần Thơ hu peih bruk về nguồn gam mbang, gam daok, gam ngak saong bhap bini di sa xã, sa phường kan kandah dalam ban. Di labik nan, bộ đội jeng dom urang anek di bhap bini: daong bhap bini ngak jalan, pasiam veik sang danaok, yuak padai tuk kurang menuac ngak, puk ramik dom labik ô nhiễm, pala phun kayau saong iek ruak, brei jru ka urang kan kathaot, urang taha daok sa drei…

 Pambuak saong bộ đội, dom kapul nyaom menuac urang saong dom pakat karja palei peih nyaom darak pasar tết, pakacah tuk peynung, pakacah baoh kayua bingi, pakacah gaiy, thể thao saong daoh tamia… “Tết quân dân” hu Bộ chỉ huy quân sự ban Cần Thơ ba tame bruk ngak yaok thun, bloh hu jeng danak dak bruk ngak di taong abih hệ thống chính trị di Ban. Yaok thun,, kein lagaih rik daong ka dom bhum palei hu patagok meng bruk ba tangin tame di dom đơn vị hu mbaok. Dalam 10 thun, Tết quân dân ieu pataom hu labaih 100 tỷ đồng saong yaok rituh ribau harei ngak di bộ đội piah daong ka bhap bini. Yaok thun sa kadha, puk palei hu palih ruah bhian lac xã kan kandah dalam dak padang saong patagok yau xã kathaot abih, xã caong ngak salah dom tanut puac abih dalam danak dak padang ngak palei pala barau.

Đại tá Nguyễn Thanh Đức - Chính ủy Bộ Chỉ huy Quân sự ban Cần Thơ brei thau: yaok thun bộ chỉ huy quân sự ban Cần Thơ jeng hu taong yaom veik bruk tết quân dân, palih ruah labik saong ba tabiak bruk daong ka dom puk palei:

 “Bộ Chỉ huy Quân sự ban Cần Thơ pambuak saong dom mban, ngành, kapul nyaom saong karja palei peih tết quân dân dak thun dak praong jang. Tapa nan mboh hu pren khang di tết quân dân dalam ban Cần Thơ. Tui thun bo kol dahlak pilih ruah puk palei ka lagaih, oh padeih salih barau meng asal kadha tal jalan ngak piah pia ka tết dân quân hu chất lượng, kein laba. Abih di nyu nan lac, dak harei brei pachreih hu ralo dom mban, ngành, kapul nyaom, ralo đơn vị nao gam saong kol dahlak”.

Thun ini, tết quân dân pakat ban rah tabiak di phường Thới An, quận Ô Môn. Danak dak bruk ngak praong pataom tame dom harei meng 13 tal  17/1/2017 (nan lac harei 16 tal harei 20 bilan mat saka ia bulan) min bộ đội hu nao ngak dahlau nan sa bilan piah samar ngak salah bloh saong ba tame pandar dom công trình tui bruk ba tabiak yau: ngak jalan Tầm Vu – Đông Thị Hơi saong jalan vàm Ba Rích - Thới Long (atah jaik 10.000 m, ralo jang kuhria dahlau jaik 3.000 m), ngak 112 baoh sang jum pataom, sang anit ranam, sang tình đồng đội (rilo jang tui kuhria jaik 30 baoh sang) saong 3 mbaik tatua bê tông brei ka bruk nao mai di dom palei. Taphia di nan, dalam danak dak sự kiện chính, hu 1.500 paok pandap, 150 paok jien bac jeng hu alin ka baoh sang kan kathaot, anek saih kan kandah.

Maong tame baoh sang barau khang kajap daok ngak jaik bloh, amuk Nguyễn Thị Sem daok di palei Thới Thuận buai sambai oh khin jia lac biak. Kayua, sang amuk kan kandah, pasang njauk tai biến, amuk nao pah ka lò har, anek likei nao ngak hồ, jien duah hu oh tani tanat, amuk oh saneng tal bruk hu sang barau. Min tết ini,  amuk hu ngak brei baoh sang đồng đội. Klah rabha bui sambai saong kol dahlak, amuk Sem klau dalam ia meta kayua uan tabuan:

 “Dahlau deih hu sang anit ranam klak ye, taik tahak ye. Urak ini hu karja  brei veik jeng uan tabuan lo, ndih oh hu. Bộ đội mai daong ka drei abih hatai jai lo. Tết thun ini hu sang uan tabuan lo. Karja hu daong ka drei yau na, drei brei kham merat ngak yau habar yam tagok ka nyu cadu”.

Urak ini, tuk thun barau mai tal, bhap bini dom xã, phường di ban Cần Thơ daok caong bộ đội mai palei drei. Têt quân dân oh lac bruk ngak về nguồn đơn lẻ tra bo langiu sa puk palei peih ngak pakat ban daok hu 4 quận, huyện karei jeng peih bruk tết quân dân. Yau  quận Bình Thủy, thun ini peih bruk tết quân dân di phường Thới An Đông; huyện Phong Điền jeng peih ngak di xã Nhơn Nghĩa (xã puac abih di huyện barau hu công nhận lac mek hu dom tanut pakat negar ka bruk padang ngak palei pala barau). “Tết quân dân” hu jeng bruk ilamu praong biak siam angaok bhum taneh Tây Đô. Tui nan, rup binguk bộ đội cụ hồ saong hatai jia tame Đảng dak hu siam jang dalam hatai bhap bini, pabak pren khang ka dom puk palei patagok./.