Meng hatai caong ba dalah apui takre ilamo bangsa tal dom sinh viên, Thạc sỹ Hứa Sa Ni – Phaok Akaok Khoa Ilamo bangsa takik sang bac đại học Văn hóa bal raya Hồ Chí Minh oh padeih roh duah, salih bahrau ralo danak dak pato pakai  piah ba ilamo, tín ngưỡng, adat cambat tanarakun di dom bangsa takik tal sinh viên.

     Gru Hứa SaNi lac urang bangsa Khmer daok di tỉnh Bạc Liêu, kayua yau nan ye, dom ragam tamia, panuac daoh, ilamo meng kan di urang Khmer yau njaom tame dalam rilo darah di gru. Takre ilamo bangsa nan ye tuk halei gru jeng caong pato veik ka dom rai ranaih thau ka ilamo, adat cambat tanarakun saong sap ndom panuac puac di urang Khmer. Thun 2007, tuk Khoa Ilamu bangsa takik - Sang bac đại học Văn hóa bal raya Hồ Chí Minh ba tabiak danak dak pato pakai môn sap ndom panuac puac bangsa, gru SaNi hu pok panuac haong khoa, Ban Giám hiệu sang bac peih sa tal pato sap Khmer ka sinh viên dalam khoa. Akaok mereip, Khoa tok brei pato iek, min tapa sa thun, mboh hatai caong khin di sinh viên ngan haong môn học dak harei dak prong nan ye Ban Giám hiệu sang bac brei ba môn bac sap ndom panuac puac Khmer jeng sa dalam dom học phần bắt buộc. Urang dang pato môn ini oh thei karei nan lac gru Hứa SaNi. Gru daok tham mưu haong Khoa peih sa tal sap Cam saong gru lac menuac dang tabiak nao daa dom gru urang Cam thau cambaih ilamo, adat cambat di urang Cam mai pato.

      Ngan haong dom gru pato di 2 bangsa Khmer saong Cam, giáo trình pato sap bangsa Khmer saong Cam jeng hu biên soạn dalam jang, lagaih jang haong sinh viên. Tal urak ini, danak dak hu yam tame khóa bac ka 6 saong hu daong ka labaih 1 ribau mbang sinh viên thau puac, thau vak 2 sap ini; tapa nan ndom menyai hu siam tuk nao trun dom puk palei hu ralo bangsa Cam saong Khmer. Abih di nyu NAN LAC, dom sinh viên tốt nghiệp hu dom đề tài roh duah ilamo, adat cambat atau lễ hội bangsa takik hu taong yaom glaong. Meng kham merat, ba abih pren yava di gru SaNi ngan haong Khoa Ilamu bangsa takik, thun 2011, Ban Giám hiệu Sang bac Đại học Văn hóa bal raya Hồ Chí Minh pok gru ngak phaok Khoa Ilamu bangsa takik.

Yaom lac daok di cương vị halei, gru jeng kham merat ba hatai takre ilamo bangsa tal dom adei sinh viên di drei. Yaom lac tuk halei, sinh viên caong duah thau, gru jeng abih hatai daong ba, javap jaleiy samar drah ka dom adei. Dalam chuyên môn, gru bhian ba tabiak dom bruk ngak, dom van ngoại khóa piah ka sinh viên dalam khoa hu mbaok tame dom harei pataom ilamo, dom lễ hội meng kan di dom bangsa adei sa-ai dalam bal raya jeng yau dom tỉnh jaik taphia. Meng nan nyu ngak ka sinh viên hu hatai takre, chreih chai bac megru. Sinh viên Sơn Sóc Khay Na – bangsa Khmer brei thau: “Danak dak di gru biak lagaih haong ralo ayut sinh viên. Oh lac sinh viên urang Khmer thau sap Khmer, sinh viên karei jeng meda thau hu. Gaok tuk kan kandah ye gru halar hatian daong sinh viên.”

       Gru tuk halei jeng abih hatai daong sinh viên hu rai diuk kan kandah. Thun 2016, gru SaNi  dang tabiak iew dom doanh nghiệp, urang ngak pah hala daong  jien bac ka 10 sinh viên piah daong pren ka dom adei bac megru; brei 5 baoh komputer piah sinh viên tra cứu thông tin; pok panuac haong sang bac brei peih 1 duk gilang tapuk di khoa saong parabha gru pato hu mbaok piah daong ka sinh viên duah nguồn tapuk, tư liệu, pabak ilamu. Ngan haong gru pato ranaih bahrau tabiak pato, gru SaNi abih hatai daong, klah rabha ilamu piah ka dom gru pato ranaih hu jalan pato pakai lagaih, daong ka sinh viên tiếp thu bài giảng samar.

Anai gru Chu Phạm Minh Hằng – Khoa Ilamu bangsa takik - sang ba đại học Văn hóa bal raya Hồ Chí Minh khan lac: “biak di nyu tuk bahrau tabiak pato ye drei jeng gaok biak ralo kan kandah. Pagap yau tuk drei tagok giảng bài, ndom biai haong dom ayut blaoh drei sua tangi dom ayut hu hagait piah sua tangik veik halei oh, ye dom ayut lac Anai gru leiy, gru ndom samar ralo, gru ndom veik meng akaok nao. Tuk nan drei mboh suh sah dalam hatai saong hu ginum biai haong gru SaNi ye gru lac kol drei njauk daok jaik jang, ndom puac chậm rãi haong dom adei, kayua dom adei ralo meng daok di bhum atah bayah, bhum kan kandah mai, atau mboh mặc cảm tự ti lac drei urang bangsa takik. 

       Lagiu di bruk pato pakai dalam sang bac, urak ini gru Hứa SaNi saong dom gru pato Khoa  Ilamu bangsa takik daok jlul khang bruk salih bahrau chất lượng đào tạo tui jalan ứng dụng thực tiễn…meng nan, daong ka dom sinh viên hu kiến thức dalam jang, oh daok bỡ ngỡ hadei di tuk bac tamat tabiak  truh sang bac. Gru Hứa Sa Ni brei thau: “Bruk daok kuhria urak ini lac pok jien bac ka dom adei sinh viên, meyah hu pok jien bac ye pachreih dom adei bac megru siam jang. Kadua tra nan lac, caong khin paglaong chất lượng ye gru pato njauk jhul pakhang bruk đăng ký đề tài nghiên cứu khoa học saong palih sinh viên gam tame ngak, nan lac jalan piah ka dom adei bac megru tapak, ngak randap haong bruk di anak meta.

      Gam haong dom gru pato Khoa Ilamu bnagsa takik Sang bac đại học Văn hóa bal raya Hồ Chí Minh,  gru SaNi  oh padeih paglaong ilamu piah pato pakai ilamo ka dom rai rah sinh viên bangsa takik, daong dak padang nguồn nhân lực khik iek ilamo ka dom puk palei./.