Yam tame padang ngak palei pala bahrau, xã Tham Đôn, huyện Mỹ Xuyên hu tal labaih 40% menuac sia lac baoh sang kathaot, bruk ngak nong lạc hậu, cơ sở hạ tầng palei pala takik siam, rai diuk mbang angui di bhap bani puk palei biak kan kandah. Piah ngak hu bruk di negar padang ngak palei pala bahrau, Tham Đôn kham merat jhul pakhang patagok bruk ngak mbang pagam haong rami ramik veik gah ngak nong, salih phun pala, anek athur raong saong paglaong jien mek tame ka bhap bani, pasiam rai diuk. Dom tal pathram panduan jao ilamu  - kỹ thuật ngak mbang pala drak hu peih tabiak, dom mô hình yau raong limo aia tasau, raong hadang pambuak haong ngak padai, mblang hamu prong, pala padai đặc sản, pala njam patam hu peih tabiak saong pambak prong. Ong Chung Ngọc Long, Phaok akaok UBND xã Tham  Đôn lac: Jalan ngak lac patagok kinh tế, patagok jien mek tame ka mikva piah patrun saong palahik baoh sang kathaot, meng nan, dalam xã Tham Đôn hu brei pala ralo janih phun pala anek athur raong, blaoh mikva pandar khoa học kỹ thuật, eng drei yam tagok tabiak truh kathaot. Tal thun 2017, baoh sang kathaot trun daok jaik 4%. Nan lac bruk kham merat patagok kinh tế, yam tapa kan kandah piah tabiak truh kathaot.

Piah bruk ngak nong mek hu ralo kein laba, gam haong bruk cakrok patagok mô hình, padang ngak ribaong kraong jeng hu Tham Đôn sangka brei ngak dahlau. Dom baoh ribaong prong sit, thủy lợi nội đồng hu ngak bahrau, kuac kuah, khik kajap ia pruh saong tathuak aia ka yaok mblang taneh ngak nong di puk palei. Bhap bani brei thau, meng ribaong kraong hu ngak siam, aia taba mai ralo, mikva pala drak luac thun, parilo vụ, patagok năng suất saong daong ka mikva paglaong jien mek tame, patagok rai diuk. Sa-ai Liêu Si Vuông, daok di ấp Trà Bết, xã Tham  Đôn, brei thau: Urak ini aia tame tabiak harei melam nan ye ngak hacih lakhul, mbak. Dahlau diah, dom baoh ribaong bhian thu aia, abih di nyu nan lac dalam bilan pandiak. Urang pala njam patam dalam bilan thu njauk cang aia tagok meng hu. Urak ini ribaong thủy lợi hu kuac kuah siam paje, daong ka bhap bani pala drak hu siam. Aia taba biak siam ka puhn pala.

Meng ribaong kraong hu ngak siam saong bruk cakrok patagok njauk tui jalan rami ramik veik gah ngak nông, paglaong giá trị, paralo mô hình ngak mbang, pala drak, phun pala anek athur raong, daong ngak brei jien mek tame angaok sa mblang taneh di Tham Đôn tagok biak samar, meng 65 triệu đồng/ha dalam thun akaok mereip padang ngak palei pala bahrau, urak ini tagok labaih 170 triệu/ha. Tapa nan, daong jien mek tame yaok thun di sa urang daok pak Tham Đôn tagok labaih 41 triệu đồng.

Tuk bruk ngak mbang kinh tế hu patagok, bruk jak ba bhap bani rik daong padang ngak palei pala bahrau jeng hu siam laghaih jang. Bahrau di abih lac di ấp Sô La 1, yaok pluh baoh sang jak gauk rik daong jaik 130 triệu đồng saong yaok pluh harei ngak bruk padang ngak jalan bê tông dalam ấp atah 300 m, prong 2m. Jalan hu ngak salah blaoh di akaok thun ini, ba mbuan lagaij ka bruk nao mai di mikva dalam palei. Ong Trần Ởi, sa urang daok di ấp Sô La 1 lac: Dahlau diah dalam ấp nao mai kan kandah ralo, urak ini mbuan laghaih jang. Jalan mbak karja saong bhap bani pambuak gauk ngak, daong ka bruk nao mai hu mbuan laghaih jang, radaih patuh nduac tal labik. Jalan ini hu biak ralo anek saih nao mai.

Meng bruk jak ba, pathau khan, bhap bani Tham Đôn hu rik daong harei ngak, jien padai ba gauk padang ngak yaok km jalan nao mai dalam palei saong ralo công trình hạ tầng karei. Kuhria meng thun 2016 tal ini, bhap bani xã Tham Đôn hu rik daong jaik 1 tỷ đồng, ralo harei ngak, taneh riya, njam patam piah padang ngak, pasiam veik yaok ribau mét jalan nao mai dalam palei, baoh tatua saong jalan ba aia brei ka bruk pala drak, rik daong gam haong puk palei ngak siam dom tiêu chí padang ngak palei pala bahrau.

Ong Chung Ngọc Long, Phaok akaok UBND xã Tham Đôn khan lac, meng hatai kham merat, ba tangin tame di taong abih hệ thống chính trị saong bruk rik daong abih hatai di bhap bani puk palei, tal harei ini, xã hu ngak blaoh 19 tiêu chí padang ngak palei pala bahrau. Yau nan min, Tham Đôn jeng daok taong yaom, ba tabiak dom jalan ngak patui di nan piah paglaong chất yaok tiêu chí piah mek hu tui jalan oh padeih paglaong rai diuk di bhap bani palei pala. Gah karja palei daok jak ba mikva hu mbaok tame dom tal pato, pathram, piah pandar ilamu kỹ thuật glaong jang tame bruk raong glang, pala drak, piah hu jien mek tame ralo saong taphia di nan, karja palei jeng hu ba tabiak jalan ngak anak tal lac tacei pato dom ấp jak ba mikva padang tổ nhóm ralo jang piah pambuak bruk haong dom doanh nghiệp.

  Palei pala mbeik drei salih bahrau, rai diuk mbang ngui, daok dang oh padeih patagok, mikva Tham Đôn daok bui sambai chreih chrai piah taduan mek angan xã palei pala bahrau dalam tukvak oh suai livik di anak tal./.