Takre daoh meng sit, nan ye meng tuk daok lac anek saih, Thanh Pháp pasram dom ragu daoh bhap bini Cam bhian randap. Sa-ai hu nao tal dom nghệ nhân ghi-năng piah megru taong ginang saong vak veik dom ragu bhian hu pandar dalam dom rija di urang Cam. Thun 2006 sa-ai hu pilih tame ngak bruk di di Nhà hát ca múa nhạc Biển Xanh Bình Thuận, lac urang daoh chính di kapul daoh tamia bhap bini Cam.

    Hadei di 1 thun ngak labik nan, sa-ai hu brei nao bac thanh nhạc di Nhạc viện ban raya Hồ Chí Minh. Bac bloh thanh nhạc, sa-ai tapa bac gah sư phạm âm nhạc pak ini. Hu bruk tacei pato di dom  nghệ sĩ hu angan yau Nghệ sĩ Ưu tú – ca sĩ Tạ Minh Tâm, Nghệ sĩ Ưu tú – ca sĩ Thanh Thúy, sa-ai dak harei dak gheih gah thanh nhạc. Sa-ai hu da-a tame dom danak dak daoh tamia praong di Nhà hát ca múa nhạc Việt Nam, Đoàn Nghệ thuật Quân khu 7. Tapa nan, sa-ai hu caik veik rilo siam mekre dalam hatai urang maong, urang iek. Nhạc sĩ Đinh Trung Hà – Phó kapul daoh tamia Chăm Bình Thuận di Nhà hát ca múa nhạc Biển Xanh brei thau: 

   "Thanh Pháp lhu sap daoh biak gheih, sa-ai daoh ragu daoh ndung bak ilamu bangsa Cam, ini oh lac sap daoh di tỉnh bo njauk lac sap daoh di taneh ia Việt Nam. Sa-ai daok lac phó kapul daoh di kapul daoh tamia bhap bini Cam, lac labik pambuak talei rohim adei sa-ai veik, thau pataom saong pambuak bruk dom kapul veik biak gheih."

Oh lac jak jeng angaok sân khấu, sa-ai daok gheih bruk sáng tác. Meng thun 2008 tal urak ini, sa-ai brei tabiak rai rilo kadha daoh ndung bak ragu ragam bhap bini cam yau ye: Bắc Bình khúc hát tình quê; Về thăm tháp cổ; Xương rồng đất tháp; Ký ức Ka-tê. Lingiu dom kadha ndung bak ilamu Cam ngan saong rup binguk kraong Cà Ty, tasik Cà Ná, sang bac Dục Thanh… sa-ai daok hu nao grauk labik dalam taneh ia piah duah hatai pachreih ka drei. Kadha daoh “Bình Dương nỗi nhớ trong tôi” kayua sa-ai paneh tui ragu lai li-ar  hu gah chuyên môn taong yaom glaong. Nhạc sĩ Thế Phi – akaok Chi hội Nhạc sĩ Việt Nam tỉnh Bình Thuận, Phó Phân hội Âm nhạc - Hội Văn học Nghệ thuật Bình Thuận brei thau: 

    "Thanh Pháp lac sa nhạc sĩ daok ranaih hu bac megru siam. Dom kadha daoh di Thanh Pháp paneh hu biak rilo asal kadha, pok meyaom puk paga, palei negar, anek menuac, bruk meyut meyau saong abih di nyu nan lac dom kadha daoh meng ragu daoh bhap bini Cam. Dom kadha daoh vak tui jalan bharau, taong abih dom kadha daoh bo Thanh Pháp vak jeng hu suan yava di bangsa drei, tui dahlak mboh lac biak gheih, biak siam. "

Ngan saong umo daok ranaih yau urak ini, jalan nghệ thuật di Thanh Pháp jeng daok atah saong daok peih praong. Yaom lac jalan nao tal vinh quang di nghệ thuật jeng daok hu rilo cuan kandah, min meng hatai kham merat di umo ranaih gam saong hatai takre, hatai anit ka bruk ngak, kol drei jia lac jak jeng hu mai haong Thanh Pháp./.