Bà Rịa-Vũng Tàu kuhria peih bruk palei to yaom 6 mblang taneh praong labaih 225 hecta di Ban Vũng Tàu

Thanh tra Rajaei bahrau hu panuac likau Thủ tướng pasang iek mek veik 13 danak dak di TPHCM hu jao taneh meng dom thun 1999-2003 min mbiah tal urak ni ka oh ngak salah bruk peih taneh, ka oh peih jien ndua, ka oh buh jien tabiak padang ngak. Thanh tra rajaei brei thau, bruk palih ruah po padang ngak dom danak dak di đô thị gah merong TPHCM oh to yaom quyền pandar taneh atau to yaom danak dak padang ngak. Kapul ngak bruk hu panuac cong Thủ tướng tacei pato UBND TPHCM peih bruk palih ruah po padang ngak hu ginup pren ngak njauk tui hukum hu batabiak piah ngak danak dak.

Tui bruk ngak harak gar pablei to yaom taong abih taneh di karja, thun 2021, Bà Rịa-Vũng Tàu kuhria peih bruk palei to yaom 6 mblang taneh praong labaih 225 hecta di Ban Vũng Tàu, ban sit Phú Mỹ saong huyện Xuyên Mộc, mek jien tame labaih 10.684 tỷ đồng. UB bhap bini tỉnh tacei Sở TN-MT pasang iek harak gar, mblang taneh, labik halei hu ginup harak njauk hukum ye peih bruk pablei to yaom dalam bilan 4. Hadei di tuk taduan taneh, dom đơn vị brei peih ngak danak dak, oh caik suai tapa 24 bilan dut saong tuk vak dalam harak brei buh jien tame ngak mbang.

Pagam tal bruk iek ruak di ong Võ Hoàng Yên di Bình Thuận, Sở y tế tỉnh brei thau bruk brei harak chứng chỉ iek ruak song brei adat ngak di 2 labik iek ruak lac: Phước Thiện Hưng An Tự di huyện Tánh Linh song Phước Thiện Hưng Nghĩa Tự di huyện Hàm Tân lac njauk hukum. Tapa pasang iek, mboh hu dom labaih kurang dalam bruk peih sổ iek ruak, bruk khik ramik, ngak jru nam ka oh njauk hukum. Sở Y tế Bình Thuận jeng tabiak sarak mek veik harak ngak bruk iek ruak di cơ sở Phước Thiện Hưng Nghĩa Tự.

Ub pasang iek Tỉnh ủy Bình Phước birau ba tabiak kaoh tui hukum ngan saong ong Nguyễn Văn Chạm, Akok Viện Kiểm sát bhap bini huyện Bù Gia Mập (dahlau diah lac Akok Viện Kiểm sát bhap bini ban sit Đồng Xoài, urak ini lac Ban Đồng Xoài), saong ong Nguyễn Trọng Giáo, akok Viện Kiểm sát bhap bini ban sit Phước Long (dahlau diah lac akok Viện Kiểm sát bhap bini huyện Hớn Quản). Dua urang jakar nan njauk khiển trách tuk jabat chức năng duah mboh bruk ngak suan brei kaoh tui hukum hình sự min oh ka ba tabiak langyah. Hu bruk ngak suan hu ba tabiak langyah min oh ka chap ngak tui ba tal abih tukvak kaoh tui hukum.

Pagam tal bruk loa dar 138 drei pabui metai dalam glai cao su di huyện Cẩm Mỹ, tỉnh Đồng Nai, Chi cục Thú y bhum 6 (TPHCM) khan lac tapa dut iek oh hu virus anek ruak. Bruk ni hu mboh di harei 23/3 meng panuac khan di bhap bini. Hadei di nan, UBND huyện Cẩm Mỹ hu ngak biên bản bruk nan, peih bruk pruh jru di labang dar pabui metai. Tapa ngak bruk song jabat chức năng, ong Trần Hữu Quyền – po pabui loa dar nan khan lac, kayua labik rong pabui njauk chập điện khuah, ngak ka 138 drei pabui metai atau njauk rambuac trak, yau nan ye, ong pah radeih pajeng nao dar klaak.

Bruk njom ruak kayua virus SARS-CoV-2 mbang ka 2 daok rah tabiak di Ấn Độ meda dui atah 100 harei saong tagok tal tabung glaong meng kreih bilan 4. Urak ini, kuhria abih tih urang njom ruak Covid-19 di taneh ia ini lac labaih jaik 12 trieu urang; labaih 395.000 urang daok jru ruak. Tui jit rah tabiak di dom bang hu rilo urang njom mbak rilo, hu harak pathau khan lac dom jalan pacang cakak, pa-atah di gauk tui bhum taneh oh daok lagaih piah pacang cakak virus. Daok tok hasa jalan piah pacang caga virus njom mbak urak ini lac klauk jru caga ruak. Tal urak ini, Ân Độ hu klauk jru ka 53 trieu urang.

Tổng thống Philippines Rodrigo Duterte bahrau ni tabiak bruk pasang iek takik di abih 9 thị trưởng di 9 ban haong panuac cáo buộc lac bleik saleik, “tapa mbaok” yaok triệu urang piah hu klauk dahlau vắc-xin Covid-19. Dom urang jakar ni yam tapa 1,7 triệu urang y tế piah hu klauk dahlau vắc-xin Covid-19 dalam tuk jru vắc-xin dok kurang. Tổng thống Philippines biak suh sah ka negar drei meda oh taduan hu vắc-xin Covid-19 meng gah Y tế dunya meyah bruk ngak suan hukum klauk jru daok rah tabiak.

Dom mbang pandiak catang “metai manuac” di bhum Nam Á mbuan rah tabiak jang dalam tukvak anak tal ngak jhak tal prein yawa rilo jang tal 3 mbang. Ini lac panuac brei thau di urang ilamu gah khi hậu dunya anak bruk langik pandiak di baoh taneh dak harei dak trak kan si pacang. Tui Ủy ban dom Rajaei ka bruk biến đổi khí hậu, khí tathuak tabiak di baoh taneh njauk brei takik trun 45% di thun 2030 meng ngak brei nhiệt độ trun 2 độ C. Yau nan min, dom bruk cakak trun khí thải di 75 taneh ia mbei mboh jaik abih oh ngak hu khí thải piah pabak bruk kham merat di dunya./.

Urang lang: Hani Pha – Ái Nghiêm – 27/03 06:27:53