Thun bloh, thể thao thành tích glaong tỉnh Bình Thuận hu mbaok tame 37 giải pakacah dalam taneh ia saong dunya, tapa nan mek hu 140 huy chương, rilo jang 40% chỉ tiêu hu jao brei. Eng huy chương ameh hu 46 baoh (samu 170% chỉ tiêu), huy chương pariak hu 44 baoh (jaik 140% chỉ tiêu) saong Huy chương ban hu 50 baoh (jaik 120% chỉ tiêu). Ini jeng lac sa thun njauk hadar di thể thao thành tích glaong di Bình Thuận, kayua hu daong ba mai hadah hadai ka taneh ia, ba Quốc ca VN yava tagok angaok dom đấu trường dunya. Yau di giải Vô địch Quyền Taekwondo dunya mbang ka 10 di Lima, Peru, vận động viên Nguyễn Thị Kim Hà mek hu 1 Huy chương ameh saong 1 Huy chương ban. Gam saong nan, vận động viên Nguyễn Thị Lệ Kim daok brei mboh phong độ tuk mek hu 1 Huy chương ameh saong Huy chương ban di giải Vô địch Quyền Taekwondo châu Á saong mek hu 2 Huy chương pariak di giải Vô địch Quyền Taekwondo dunya. Đội tuyển pakacah gaiy meng kan Bình Thuận lambaok VN nao negar langiu pakacah jeng mek hu vô địch di giải pakacah gaiy meng kan dunya Malaysia peih praong thun 2016 rah tabiak di bang Kedah. Ong Nguyễn Hữu Thông – Giám đốc pasak Thể dục Thể thao Bình Thuận brei thau: Ngan saong Bình Thuận bruk  thể thao thành tích glaong urak ini hu dom janih yau: pakacah gaiy meng kan, Canoeing, Taekwondo, Judo, Vovinam, Điền kinh, dit blong, Bóng rổ…Dom janih ini hu pato tập trung.

        Meng thành tích mek hu, urak ini 2 huấn luyện viên, 17 vận động viên thể thao Bình Thuận hu ba tagok ngak bruk di đội tuyển saong  tuyển ranaih pakat negar dom môn Judo, Taekwondo, Điền kinh saong Canoeing. Dalam tuk nan, đội pakacah gaiy meng kan lac đội khang dalam top akaok negar, đội bóng rổ khik hu labik dang dalam top 5 negar. Dom môn võ Takwondo, Judo daok dalam top 10 đội khang di negar.

     Min, piah khik kajap dom thành tích mek hu dalam thun tapa, gah thể thao  Bình Thuận jeng biak caong hu bruk sangka đầu tư khang jang gac ka cơ sở pasram megru jeng yau anek menuac. Ndom ka bruk ini, ong Nguyễn Tấn Lực – akaok jabat khik iek Thể dục Thể thao, Sở ilamu – Thể thao saong Du lịch tỉnh Bình Thuận brei thau: Angan di drei lac pakacah gaiy meng kan min janih ini lac oh pato tập trung, dom vận động viên jeng lac urang taong cap ikan. Daok Canoeing jeng lac môn ba mai huy chương ka tỉnh, min bruk kan kndah di janih ini lac jien piah blei trang thiết bị biak glaong, taphia di nan tỉnh drei jeng oh ka hu labik pasram.

Oh lac dom janih ala ia, dom janih karei jeng gaok ralo kan kandah.  Yau  Judo biak kurang huấn luyện viên saong urak ini jeng oh daok dalam sang năng khiếu Nghiệp vụ Thể dục Thể thao di tỉnh tra.  Kayua yau nan ye bruk palih ruah saong pasram megru pabak ilamu ka vận động viên naih gheih di cơ sở gaok ralo kan kandah. Saai Nguyễn Ngọc Phong – Huấn luyện viên Judo daok brei thau lac:

“Urak ini đầu vào oh hu, drei tuyển tapak meng gah langiu bloh ba tame tuyển ranaih đầu tư biak kan. Nan lac bruk kan kandah abih. Meyah daok yau nan, ye kan patagok hu”.

     Taphia dom kan kandah gah chuyên môn, ye labik saong pandap brei ka bruk pasram megru daok kurang saong oh ka pabak hu tanut chuẩn kỹ thuật chuyên môn; bruk pato saong pasram huấn luyện viên, vận động viên oh ka samu gauk; jien buh tame ngak daok takik, bruk dinh dưỡng ka huấn luyện viên, vận động viên daok biar… Saai Trần Văn Nguyên, urang dahlau daih ngak vận động viên Đội pakacah gaiy meng kan tỉnh Bình Thuận lac: Bruk kan kandah di abih lac oh pataom  hu luac thun luac bilan, tok pataom tui thời vụ, tuk halei hu giải pakacah ye pataom adei saai piah pasram saong pakacah, hadei di nan thei nao sang nan. Thei jeng hu diuk, hu anek. Hu mbaok tame giải dalam bui sambai saong yam kham merat yam tagok.

Piah thể thao thành tích cao mek hu ralo jak jeng jang, langiu bruk paglaong chất lượng, ye bruk pasram saong bruk đầu tư cơ sở pasram, blei trang thiết bị….,  gah thể thao Bình Thuận jeng brei sangka tal rai diuk mbang ngui daok dang di dom vận động viên. Taphia di nan jeng brei patagok khang bruk thể dục thể thao bhap bini meng số lượng tal chất lượng, mek sang bac ngak labik piah palih ruah urang naih gheih ka thể thao.

       Langiu thể thao thành tích cao, Bình Thuận jeng biak sangka tal thể thao angaok tasik, duh ka tuai damuai dalam saong langiu tỉnh tuk mai tal Bình Thuận rivang me-in, padeih padai, pamaong tal padang pasak Du lịch thể thao tasik pakat negar di thun 2020. Ong Nguyễn Ngọc Hạnh – Phaok Giám đốc Sở ilamu – Thể thao saong Du lịch tỉnh Bình Thuận brei thau: “Bình Thuận hu mintri ilamu - Thể thao saong Du lịch quy hoạch lac sa dalam dom labik du lịch thể thao tasik pakat negar. Urak ini bruk quy hoạch daok hu peih tabiak saong daok dalam tukvak thiết kế piah padang labik du lịch thể thao tasik pakat negar di Bình Thuận”.

      Meng bruk kham merat di yaok vận động viện, huấn luyện viên, gam saong bruk daong chip meng dom mban, ngành pambuak tal, caong lac anak tal, thể thao di Bình Thuận pasiam hu kan kandah, patui jalan yam tagok glaong jang, daong ngak brei hadah mbaok thể thao taneh ia drei./.