Đĩa đệm nan lac blah đệm daok kreh dua đốt sống, nyu yau lò xo patrun chấn động, trun áp lực tagok talang raong. Tui tukvak, dom đốt sống saong đĩa đệm lavik nao nyu lahik aia, nyu racam saong mbuan pacah.

Thoát vị đĩa đệm rah tabiak tuk sa dalam dom thành phần cấu tạo di đĩa đệm njauk laik tabiak truh labik di nyu saong kateik tame tủy sống, talei thần kinh. Dom makna ba tal thoát vị đĩa đệm bhian gaok nan lac kayua urang ruak njauk thoái hóa, chấn thương atau hu ruak gah cột sống. Taphia di nan, manuac urang bhian ngak bruk trak, daok suan tư thế lavik harei atau njauk dom janih ruak me-ik saradang, viêm đa khớp dạng thấp, gút (gout),…jeng mbuan njauk thoát vị đĩa đệm.

Ruak bhian tamuh tabiak hadei di sa tukvak atah pandik ka-ing atau tamuh tabiak chip hadei di tuk kuk trun ngak bruk trak. Triệu chứng di thoát vị đĩa đệm bhian mboh nan lac pandik ka-ing biak rilo, min pandik nyu takik nao tuk drei ndih trun min meda hu mboh veik tuk drei daok la, nao mai atau tuk drei dhung phal.

Dom mbang pandik kayua thoát vị đĩa đệm ngak patrun chất lượng rai diuk di urang ruak. Meyah ruak trak meda ngak ka urang ruak yếu liệt, oh kiểm soát hu bruk nao ma-ik nao njuan drei.

Tui ThS. BS. Nguyễn Thành Nhân - Khoa Chấn thương chỉnh hình Sang iek ruak  Đại học Y Dược TPHCM, hu rilo urang njauk ruak thoát vị đĩa đệm dahlau di nan hu iek ruak suan jalan, tapa nan ngak khat lahik tukvak, jien ndo iek ruak bo daok ngak ka ruak dak harei dak trak jang.

Urak ini dalam bhap bani drei daok hu mboh dom jalan saneng suan ka bruk pasiam ruak thoát vị đĩa đệm yau tapaok hala, tapaok jru, njhiak talang, bấm huyệt, pandik labik halei chích pak nan… Dom jalan ngak ini bhian oh hu tác dụng điều trị atau tok daong trun triệu chứng di ruak. Taphia di nan, dom jalan saneng pathram suan yau pachreih urang ruak nao kabak rilo, kuk akaok rilo atau pa-yeng paik cột sống meda ngak ka bruk thoát vị trak jang.

Bruk điều trị thoát vị đĩa đệm bhian peih akaok meng bruk điều trị bảo tồn, urang ruak brei hu padeih padei, takik ngak bruk, pandar dom janih jru đặc trị pagam tui chế độ pathram vật lý trị liệu ka nyu laghaih. Meyah pabak siam, urang ruak meda patrun dom triệu chứng dalam  1-2 bilan. Mboh rilo urang ruak brei hu takik abih 1 thun piah hu bình thường veik.

Yau nan min, ngan haong dom urang ruak trak ye njauk blac riah yaom lac hu mboh ruak meng avan. Dom chuyên gia jeng kakei lac tuk hu dom triệu chứng ndom di angaok nan, urang ruak njauk nao khám di dom cơ sở y tế hu angan je piah hu chẩn đoán saong điều trị njauk, plaih bruk ta-eng drei iek ruak ngak ka ruak trak jang.

Bhap bani njauk plaih ngak bruk galam naong trak, kuk trun oh njauk tư thế, hu chế độ sinh hoạt khang kadhag, mbang huak ginup chất bổ dưỡng, menyum ginup aia, hu chế độ pathram ma-in thể dục thể thao ka nyu laghaih haong yaok umo, njauk haong pren yava daong paglaong pren yava, plaih thoái hóa cột sống jeng yau thoát vị đĩa đệm./.