Gru Thông Trận hu pok meyaom meng dom pakat, dom gah di tỉnh tal puk palei
Palei Lâm Giang hu 7 tổ tự quản ngan haong labaih 670 baoh sang, dalam nan jaik 85% lac bhap bani Cam. Rai diuk di bhap bini daok rilo kan kandah, tuk mikva dalam palei rilo meng ngak hamu. Dalam dom thun tapa, piah patagok bruk gul pataom saong cak rok pren khang yam tagok di yaok urang, gru Thông Trận tuk halei jeng pambuak bruk haong Ban điều hành palei pathau khan, langyah piah ka bhap bani oh daok pagam pambak tame Karja bo eng drei duah thau, salih janih phun pala, athur raong ka nyu laghaih; daong gauk phun jien saong ilamu dalam bruk pala thanh long. Gam haong nan, abih drei pachreih tui bruk jak ba “Taong abih bhap bani gul pataom padang ngak palei pala bahrau, đô thị văn minh” pambuak haong bruk “rik daong pren yava padang ngak palei pala bahrau”.
Sư cả Thông Trận thau lac, palei pala bahrau njauk peih ngak camereip abih meng bhap bani saong bhap bani lac urang mbang tui dom bruk ngak hu nan. Cambaih laih di abih lac bruk ngak jalan mbak nao mai dalam palei, meyah oh hu peih prong, oh tuh bê tông xi măng ye meda gaok biak rilo kan kandah tuk pajeng ba pandap panda kaya nong, jien padai nao mai tagok glaong jang. Bruk rik daong ngak jalan jeng biak lagaih, parabha jeng rilo mbang, rik daong pren ngak atau miễn giảm ngan haong baoh sang kan kathaot. Nan ye meng thun 2016 tal ini, bhap bani dalam palei sa hatung hatai haong gauk ngak hu jaik 1,4 km jalan bê tông di dom tổ 1, 4, 5, 6, dalam nan phun jien jak ba bhap bani hu jaik 364 triệu đồng. Langiu di nan, bhap bani daok hu rik daong pagam gom hadah jalan nao mai di dom labik daok. Urak ini dom jalan bê tông xi măng dalam palei pagam hu 174 baoh gom, abih jaik 197 triệu đồng meng bhap bani rik tame.
Ong Thông Minh Đồng - akaok palei Lâm Giang brei thau: Dahlau diah, palei biak srau dau, abih di nyu lac bruk likei dam pataom gauk, menyum alak menyum mbia blaoh taong paoh gauk. Hu dom bruk biak sit, min kayua kurang sahneng kuhria saong oh thau adat hukum ba tal taong paoh gauk, ngak lahik bruk jum pataom dalam palei. Thun 2019, hu bruk tacei pato di UB MT negar Việt Nam xã saong Công an xã padang bruk “Chức sắc, tôn giáo hu mbaok tame bruk khik ramik an ninh trật tự”, ngan haong 27 urang. Lac tổ trưởng, gru Thông Trận bhian nao pathau khan paglaong akaok saneng, ngak njauk tui adat hukum ka bhap bani, abih di nyu lac dom likei dam. Po gru pandar dom halau janeng jak ba anek kamuan, gauk gar dalam sang, urang dalam but pajaih ngak njauk tui sarak di Đảng, hukum di Karja. Rilo bruk meriak gauk hu po gru gam haong Ban điều hành thôn trun tal labik piah langyah, ba brei siam. Meng nan hu langyah tal labik tal dhua, oh caik kandah gauk dui atah, ngak lahik gul pataom atau ba tal dom bruk ngak suan adat hukum.
Rai diuk bahrau, văn minh daok hu mboh dalam bruk ndom puac daok dang di yaok baoh sang. Nan lac raong athur pataom di labik atah di palei, lac oh brei aia neriak, hareik hareim nduac tabiak jalan, brei patrun tukvak saong dom bruk ngak adat oh daok lagaih dalam ndam lakhah, ndam metai, harei rija roya. Rilo jalan dalam palei saong mblang taneh thaoh anak sang urak ini hu bak sambo mau2 kanyik katam di bingu hoàng yến, bingu mười giờ. Bruk pato megru jeng hu iek prong jang, taong abih uranaih dalam umo thun nao bac jeng hu tame sang bac… Meng dom rik daong di drei, gru Thông Trận hu pok meyaom meng dom pakat, dom gah di tỉnh tal puk palei./.
Urang lang: Jasi – 05/04
Viết bình luận