Mesup ni (21/8), Thủ tướng Nguyễn Xuân Phúc dang akaok Nyaom biai giao ban online di rajaei  song dom tỉnh ban, mintri, jabat Trung ương ka bruk brei mesraiy phun jien  đầu tư công. Tapa pathau khan di mintri jien padai , Thủ tướng tong yaom, bruk brei mesraiy phun jien  đầu tư công hu patagok labaih  42% phun jien di thun.Jalan ngak dom danak dak prong mbang camereip hu patagok, dalam nan hu danak dak  Mỹ Thuận-Cần Thơ. Hu 11 mintri, jabat  Trung ương, 31 tỉnh ban  brei mesraiy hu labaih  45%, min jeng hu 16 mintri, 1 tỉnh ban  brei mesraiy biak beir, ala  15%, kakei veik bruk brei mesraiy abih 100% phun jien đầu tư công, Thủ tướng hu panuac ieu dom mintri, dom gah, tỉnh ban  oh iek lap, khang hatai hu jalan ngak catang piah langyah.

Đà Nẵng daok pasang iek hu jit Covid-19. Panuac nan hu jabat thường trực đặc biệt di Mintri Y tế pacang caga Covid-19 di Đà Nẵng ba tabiak dahlau di tuk tabiak truh ban harei (21/8) hadei di 20 harei daong pacang jit. Thứ trưởng mintri Y tế Nguyễn Trường Sơn ba tabiak dom panuac kakei, dom jalan pacang caga jit dalam vaktu anak tal. Dalam nan, hu kakei karja saong bhap bini ban oh maong bier, tui viek ngak catang dom bruk pacang caga jit yau rajaei, tinh, ban hu ba tabiak dalam vaktu tapa.

Harei  21/8, Ủy ban MT negar tỉnh An Giang peih danak dak taduan mek bruk daong an sinh xã hội thun 2020 song dong jien ka bruk pacang caga Covid-19, ngan song pok jien jak ba  12,6 tỷ đồng. Tui  Ủy ban Mt negar , dom gah dom pakat dalam  tỉnh An Giang dok pasang iek hu, oh caik ka jit ruak Covid-19 rah tabiak dalam tỉnh . Min, urak ni di dunya song dalam negar jit ruak dok rah tabiak kan kandah, An Giang lac  tỉnh tapen negar yau nan ye dom puk palei song gah chức năng dok brei menuac khik iek luac harei melam angaok jalan tapen negar piah pacang cakak jit ruak njom tame meng gah langiu.

Công an tỉnh Tiền Giang bahrau pambuak bruk song dom gah tong tayah  sa băng nyaom co klaik di dom tỉnh Tiền Giang song Long An, ngak ka bhap bini suh sah. Tapa duah thau, tok dalam 1 bilan, kol 8 urang ini, dalam nan hu 4 urang njauk chap khik , nao co klaik hu 35 mbang di  Tiền Giang song Long An. Langiu di nan dok hu rilo menuac njauk co klaik hu nao tal jabat  công an pathau khan bruk lahik rilo drap ar. Urakni  cảnh sát dok peih prong pasang iek  vụ án. 4 urang hu nduac tabiak truh pak ni dok njauk cảnh sát duah thau chap khik.

Hadei di 10 harei ngak bruk, dah page ni (21/8), TA bhap bini tỉnh Bình Thuận tabiak panuac tuyên án 6 urang dahlau daih lac urang dang akaok, urang jaka ban Phan Thiết dalam bruk “ngak suan dom adat ka bruk khik ramik taneh riya”. Anak tòa, bị cáo Đỗ Ngọc Điệp, akaok UB bhap bini ban Phan Thiết dahlau dieh – urang mbaoh tangin 32 harak brei adat salih bruk pandar taneh suan hukum labaih 46.000m2, yaom abih tih 4,7 tỷ đồng, njauk kaoh dus 24 bilan guk tù treo. Bị cáo Trần Hoàng Khôi, Phó akaok UB bhap bini ban Phan Thiết dahlau dieh njauk 4 thun guk. Bị cáo Phạm Thanh Thái, akaok jabat Tài nguyên saong alam ban Phan Thiết njauk 3 thun 6 bilan guk …

Liên hợp quốc daok brei peih 8,5 triệu đôla Mỹ piah daong ka dom sang njauk kan kandah meng bruk patuh khang di harei 4/8 di ban ine Beirut di Li-băng. Bruk patuh nan ngak ka labaih 170 urang metai saong yaok rituh urang lahik sang danaok di tuk kan kandah kinh tế saong jit praong Covid-19. Urak ni hu labaih 180 ribau urang hu mbang tui jien daong. Kandung jien pahla Li-băng daok daong ka dom kapul lingiu rajaei dunya saong dalam taneh ia peih ngak 8 danak dak daong dom sang njauk kan kandah kayua bruk patuh di Bây-rút.

Urang  jakar  Mỹ hu chap ong Steve Bannon, urang dahlau deih ngak  cố vấn dang akaok di Tổng thống Donald Trump, kayua dom công tố viên liên bang tabiak panuac lac urang ni song 3 urang karei pachot mek yaok rituh ribau USD di dom urang rik pataom ka danak dak padang danieng tapen jalan negar song Mexico. Min, Bannon oh taduan bruk pachot mek, rao jien dalam phiên tòa camereip di Tòa án Liên bang Manhattan di New York song thẩm phán liên bang hu brei ka ong daok di sang hadei di buh pok jien  bảo lãnh 5 triệu USD. Phiên tòa hu peih tabiak tui jalan online kayua  Covid-19 song pmbang xét xử ka 2 hu peih tabiak harei 31/8.

“Hu vắc-xin jeng oh hu makna lac abih jit praong Covid-19.Yaok urang njauk caga diuk haong SARS-CoV-2”. Nan lac panuac di urang dang akaok bhum châu Âu di gah Y tế dunya Hans Kluge. Tui ong Han Klu-gê, bruk hu makna praong lac yaok urang oh njauk maong bier saong jeng njauk paglaong dom bruk ngak salamat hacih yau ye cuh pataik pacang pambah, rao tangin pametai anek ruak. Tal urak ni, châu Âu hu labaih 3,3 triệu urang njom Covid-19, dalam nan hu labaih 205 ribau urang metai. Dom urang njom mbak Covid-19 daok tagok rilo veik di Prang saong Tây Ban Nha./.

Urang lang: Thu Thảo –H.Pha