Mik va dok di dom tỉnh ban dok ramik pasiam veik sang danaok 

Ngan saong kadha: “Ala hala dok hadah tanyak di Đảng, dom bangsa sumu gauk, jum pataom, iek praong, daong gauk, patagok prein khang piah cak rok patagok gam saong taneh ia”, Nyaom roya Dom bangsa takik Việt Nam pakat negar mbang ka II thun 2020 hu peih tabiak dalam 02 harei, meng harei 03/12 mbiah tal harei 04/12/2020 di Pasak nyaom biai pakat Negar,  Hà Nội. Nyaom roya piah taong yaom dom bruk ngak hu, bruk peih ngak sarak bangsa, bruk bangsa tukvak 2010-2020, meng nan bac megru hu rilo bruk, patui veik ngak siam sarak bangsa, ba tabiak jalan ngak, bruk pamaong tal, bruk peih ngak saong jalan langyah ka bruk bangsa tukvak 2021 -2030. Nyaom roya jang lac labik piah ptaom mbaok, bac megru, klak rabha dom ilamu di dom bangsa, lac bruk chính trị, xã hội hu makna praong dalam piah paglaong jalan sahaneng, pakhang hatai jia saong pachreih tui di bhap bini dom bangsa ala tacei ba di Đảng. Nyaom roya hu mbaok di 1.600 urang lambaok vakil dom bangsa saong 300  tuai hu da-a.

Thủ tướng Nguyễn Xuân Phúc bahrau hu harak brei dong  670 tỉ đồng ka 9 tỉnh ban gah kreih negar  song  Tây Nguyên pasiam veik dom khut tayah meng dom mbang hajan ribuk meng bloh. Tui nan,Thủ tướng brei pabak 670 tỉ đồng meng kadung jien khik piah di trung ương thun ni ka  9 tỉnh, lac: Nghệ An 50 tỉ đồng, Hà Tĩnh 50 tỉ đồng, Quảng Bình 50 tỉ đồng, Quảng Trị 70 tỉ đồng, Thừa Thiên Huế 50 tỉ đồng, Quảng Nam 130 tỉ đồng, Quảng Ngãi 150 tỉ đồng, Bình Định 70 tỉ đồng song  Kon Tum 50 tỉ đồng piah pasiam dom khut khat kayua ribuk  ka  5, 6, 7, 8, 9 song hajan ia sua  bilan  10-2020.Thủ tướng hu panuac ieu dom  tỉnh brei ngak dahlau bruk dong duah urang gaok bala, dong ka boh sang hu urang metai, lahik, sang dok njauk khut tayah, samar panduan ba, dong ka bruk ngak nong njauk khat lahik.

Page ini 26/11,Mban pambuak gauk Truyền thống Tây Tiến hu jao brei danak dak Rup patau pahadar Tây Tiến di Sài Khao ka Ủy ban bhap bini xã Mường Lý, huyện Mường Lát, tỉnh Thanh Hóa. Danak dak Mbia hadar Tây Tiến kayua anek kamuan di dom urang lin Tây Tiến dahlau diah saong dom urang ngak pahala rik tame, padang ngak piah hadar dhar phol bhap bini saong bol lin dalam dom thun bilan di bruk mesruh metak saong kol Prang, rik tame patao pakai ilamu ka dom rairah harei hadei. Mbia patau glaong labaih 2 mét, trak jang 5 tấn, sarak thaot binguk klau urang lin Tây Tiến bak phao, dalam nan hu sa urang lin ngui cuk ao capha bhap bini bangsa takik, brei mboh bruk jum pataom dom bangsa dalam mesruh metak mek veik bebat, tự do ka Taneh ia. Labik padang Mbia tau pahadar di Sài Khao, lac labik puac abih di jalan bol lin Tây Tiến nao saong mersuh di taneh ia Việt Nam. Ini jeng lac labik bol lin Tây Tiến kadun tame piah khik hu salamat hadei di dom mbang taong khangt di Sầm Nưa, Lào. Pak di labik ini, rilo urang lin var klak rup drei ndih trun ka taneh ia.

“Ban Thường vụ Quận ủy hu jao ka UBND Quận 3 padang sa danak dak rami ramik veik song peih labik nao takai di Hồ Con Rùa song jalan nao takai Nguyễn Thượng Hiền”. Nan lac khaw tin hu ong Phạm Thành Kiên, Bí thư Quận uỷ Quận 3 ba tabiak di var ngak bruk  di ong Nguyễn Văn Nên, Bí thư Trung ương Đảng, Bí thư Thành uỷ TPHCM song  Ban thường vụ Quận uỷ Quận 3 di mesup ni (26/11). Tui nan, labik Hồ Con Rùa hu ramik pasiam veik jeng labik nao takai siam oh lac labik pablei salih yaok harei. Hu thau, Hồ Con Rùa lac angan bhap bini ieu sa danao pruh ia nhân tạo dok di kreih labik di klau jalan Võ Văn Tần,Phạm Ngọc Thạch song Trần Cao Vân, di  Quận 3, TPHCM, ngak jeng sa labik yau vòng xoay.Labik ni hu angan ieu lac Công trường Quốc tế, urak ni lac sa dalam dom labik pablei salih pandap mbang huak luac harei malam.

Dom pandap panda di danak bhap bini kayua Gah daong, cak rok patagok dunya yau ye ia hani danko glai saong dom janih pandap di bangsa Cơ Tu daok di huyện Nam Giang, Quảng Nam hu pablei di cửa hàng pablei rai akaok meti di Việt Nam di MUJI lac hu angan je di Nhật Bản, birau hu peih tabiak di page harei ini 26/11 di sang tal 1 Pasak Pablei salih Parkson, quận 1- Ban raya HCM. Bruk pablei salih dom pandap mai meng bhum urang bangsa takik di Viet Nam lac sa dalam dom bruk ngak tui jalan pablei salih di MUJI, nan lac rik daong dom bangsa takik cak rok patagok drap ar bhap bini, jhul pakhang bruk ngak tabiak kaya nong di bhum palei. Ngan saong taneh praong labaih 2.000 m2, ini lac cửa hàng MUJI praong abih di bhum ĐNA..

Akaok mintri jien padai  Anh Rishi Sunak harei kabroi (25/11) brei thau  kinh tế Anh hu trun  âm 11,3% (-11,3%) dalam thun ni. Ni lac bruk patrun jhak abih di gah kinh tế Anh dalam labaih 300 thun tapa. Ong Su-nắc brei thau  kan kandah di jit prong Covid-19 ka gah kinh tế Anh meda dok dui atah. Tui kuhria urang oh hu bruk ngak hu tagok tal 7,5%, samu  2,6 triệu urang, dalam quý 2 thun 2021 song gah kinh tế Anh oh meda gilac mai hu yau dahlau di tuk jit prong mbiah tal puac thun  2022.

Mentri Bruk drak samar chip Nga harei ini brei thau dom radaih pajeng pandap ngak pahala ka 100 di Nga pajeng labaih 95 tấn pandap hu ba tal labik  Donbass, gah Timun U-crai-na.Pandap panda ngak pahala ralo lac dom pandap y tế saong jru tavao. Mentri Bruk drak samar chip Nga hu payua pandap daong pahala tal bhum Donetsk saong Lugan meng di thun 2014. Tui yaok pataom,tal urak ini, dom radaih pajeng pandap ngak pahala di Nga hu pajeng ba abih tih labaih 85.000 tấn pandap ka 2 bhum nan. 

Takik di abih 40 urang metai song 11 urang njauk rambuac dalam sa bala trak di ban sit Taguai, gah pai  bang Xao Sao Paulo, Bra-xin.Tui cảnh sát brei thau, bala rah tabiak di mon 7 mesup ni (tui tuk vak pak ni) tuk sruh radeih buýt pajeng urang ngak di sa sang mac jhik pet ginuh tame sa sruh radeih pajeng pandap angaok jalan roya di ban sit Ta-goai.Gah dong duah hu mbaok pak ni chip song pacang veik jalan roya dalam 3 tuk piah peih dom bruk dong ba./.

Urang lang: Hanipha- Ái Nghiêm -26/11