Rilo urang Bác sỹ hu mbaok chip di labik halei medhi lac njom ruak 

Thủ tướng Nguyễn Xuân Phúc hu harak 1838 ka bruk pacang caga jit ruak Covid-19. Tui nan, ieu dom mintri, dom gah, dom tỉnh ban brei paglaong bruk ngak di drei dalam pacang caga jit Covid-19; ngak catang tui dom tacei pato di Thủ tướng saong dom daat hukum pambuak tal, pasang iek catang urang meng negar lingiu tame,abih di nyu lac tame suan hukum tui jalan sit, jalan praong tapen negar, langyah catang dom bruk ngak suan. Tỉnh uỷ, UBND tỉnh Vĩnh Long samar tacei pato dom gah, pambuak bruk haong dom mintri: Y tế, Công an, Quốc phòng samar peih dom jalan duah thau urang taom gaok haong menuac ruak ka 1440, oh caik ka jit njom mbak tabiak bhap bini.

Tapa dut iek brei mboh taong abih 13 urang taom gaok jaik (F1) di urang ruak daok di Vĩnh Long âm tính mbang ka sa haong virus SARS-CoV-2. Hu thau, urang likei ruak ka 1440 (32 thun, urang Việt Nam) meng Myanmar tame negar suan hukum nao tapa jalan sit tapen negar (duah thau cambaih jalan nan) di dah page harei 24/12 saong tame sang di xã Nhơn Phú, huyện Mang Thít, tỉnh Vĩnh Long. Di dalam tuk nao tal sang, gauk gar di urang ruak hu pathau khan chip haong công an pak ni piah peih bruk brei daok karei saong mek mẫu samar drak di Vĩnh Long.

Hadei di tuk Pasak pasang iek ruak kik tỉnh Đồng Tháp tabiak panuac duah samar drah urang kumei nao sa sruh radaih haong urang ruak Covid-19 (BN1440) mai huyện Lai Vung di melam 27/12. Tal harei ini (28/12), gah chức năng hu duah mboh urang kumei ini saong brei daok karei di labik pa-atah di gauk di sang iek ruak Đa khoa Sa Đéc, saong daok pasang iek duah thau dịch tễ pambuak tal.

Hadei di 3 thun peih ngak (2018-2020), danak dak  “nao gam haong urang kumei bhum tapen negar” kayua kapul urang kumei Việt Nam saong Bộ Tư lệnh Bộ đội Biên phòng pambuak gauk peih ngak hu jak ba daong dom xã tapen negar daok kan kandah hu labaih 150 tỷ đồng. Abih tih dom kadung jien buh tame daong jaik 1.000 danak dak sang danaok, jalan mbak, sang iek ruak…; jaik 700 “sang anit ranam”; alin labaih 4.000 paok pandap, 4.000 paok jien bac ka anek saih, anek saih kumei bangsa takik kan kathaot yam tagok tabiak truh kan kandah di 110 xã biak kan kandah di bhum tapen negar.

Mintri Ilamu Thể thao & Du lịch bahrau peih bruk pataom iek veik saong pok meyaom bruk pakacah paneh kadha daoh ka bangsa takik, bhum ceik thun 2020. Dalam 374 kadha daoh payua mai pakacah meng 48 tỉnh, ban, mban peih bruk pilih ruah, pok meyaom 17 kadha daoh gheih di abih. Bruk pakacah piah peih tabiak jalan ka dom urang paneh kadha daoh, duah dom kadha daoh bahrau ndung bak ilamu bhum ceik, bangsa takik, piah tapa nan pato pasram paglaong ilamu ka urang paneh kadha daoh, abih di nyu lac urang bangsa takik piah pabak bruk pang di bhap bini dalam tukvak urak ini.

Harei 27/12, lac harei camriep negar Pháp peih bruk klauk jru pacang caga Covid-19 ngan haong labaih 20 urang hu klauk jru, abih di nyu nan lac urang praong thun hu ruak dahlau dalam rup. Meng adit hadei, danak dak klauk jru ni hu peih praong jang. Rajaei Pháp ba tabiak jalan tal puac bilan 2 thun 2021, meda hu 1 triệu urang hu klauk vắc xin pacang caga Covid-19.

Kuhria tal harei kabroi, abih tih dom menuac njom Covid-19 di Nam Phi lac labaih 1 triệu urang. Dom menuac njom ruak labaih sa triệu nan lac dalam 9 harei hadei di tuk Nam Phi,labik gaok kan kandah di abih kayua jit ruak Covid-19 di bhum taneh ini, pathau khan lac hu 900 rabauh menuac njom Covid-19.Mintri Y tế Nam Phi brei thau, bruk njom mbak samar Covid-19 sa binah lac kayua menuac urang oh ngak njauk tui bruk pacang caga ruak di labik hu rilo menuac, sa binah lac kayua anek ruak bahrau di virus SARS-CoV-2. Dom menuac metai kayua Covid-19 di Nam Phi jeng tagok tal jaik 27 rabau urang, glaong di abih dalam bhum taneh ini.

Iran peih praong angan dom urang Mỹ mboh lac pambuak tak bruk pametai urang par akaok pakat glaong Qassem Soleimani di negar ni tagok tal 48 urang. Gah khau tin IRNA di Iran brei thau,dom urang medil dalam bruk pametai manuac tagok meng 45 tal 48 urang.6 negar hu taduan hu harak adat pasang iek duah mek meng Iran ka bruk cap khik dom urang ngak chung.Di harei 3/1/2020, Mỹ peih bruk taong tame jaik mblang kapar haoh Bát-đa di Irắc, pametai ong Xô-lây-ma-ni, urang pato pakai kapul đặc nhiệm Quds di Gah cách mạng Hồi giáo Iran. Bruk nan ngak ka talei pambuak bruk di Mỹ saong Iran dak harei dak catang tagok./.

Urang lang: Mousaphuong- Thu Thảo -28/12