Mesup ni, di jabat  rajaei, Thủ tướng Nguyễn Xuân Phúc pal akaok var ngak bruk song dom urang ngak praong tỉnh Bình Phước ka bruk patagok kinh tế-xã hội thun bloh song ba tabiak jalan ngak ka thun ni di tỉnh. Thủ tướng caong lac, anak tal, Bình Phước brei pamong tal gah ngak nong hữu cơ, khik kajap bruk ngak tabiak song pablei salih, patagok labik lac pasak pren khang di negar, patagok bruk pambuak pagam bhum.Thủ tướng ndom lac, tỉnh njauk pataom tame pachreih ba pren khang xã hội piah peih ngak 10 danak dak prong hu batabiak dalam  sarak nyaom roya  Đảng bộ tỉnh mbang ka 11.

Bộ Tư lệnh bhum 2 Hải quân dah page ni (14/1) peih bruk tabiak mbaok nao lingiu tasik gah maraong, labik hu dom nhà giàn DK1 piah rivang, tadhau yuh tết urang jaka, urang lin daok ngak bruk, gam tui di nan pasang iek bruk ngak. Ni lac bruk ngak yaok thun brei mboh bruk sangka di Đảng, kanja, bol lin saong bhap bini tal dom urang lin tasik daok luac melam harei khik saron mbon ka taneh ia, quyền ngak po tasik pulao negar. Melam palao thun klaak, raoh thun bahrau Tết sak kubau 2021, Bộ Tư lệnh bhum 2 meda pambuak tâpak meng thaot binguk tabiak dom  nhà giàn, dom gilai khik iek piah tadhau yuh tết.

Tui Sở ngak nong song patagok palei pala tỉnh Ninh Thuận, jiak di ni, riyak tasik khang pambuak song ia ndik, ngak ka riyak tasik  tagok glong meng 4 tal 6 mét ngak khut, jaleih tabung pacang, mbaok jalan khik ramik di rilo labik ar tasik Đông Hải, ngan song taneh gluh jaleih jiak 400 m2. Gah ngak nong tỉnh hu samar pasiam meng patau randiak  tuh tame dom labik njauk gluh jaleih, pasiam veik takai ar gah tasik …Dalam thun 2021, tỉnh hu buh jien tabiak, pasiam patagok dom labik  ar pacang ni atah labaih  3.589m, abih ith labaih 135 tỷ đồng.

Di Đồng Nai, UBND huyện Long Thành daok hu biyar pabak labaih 1.355 tỉ đồng jien biyar, daong ka bhap bini hu taneh mek ngak mblang kapar haoh dunya Long Thành. Ni lac mbang biyar jien ka 10 brei ka 683 baoh sang, urang hu labaih 268ha taneh njauk  mek piah ngak danak dak, hu gam jien bayar taneh, drap ar di mblang taneh, daong sang daok saong jien panduan ba nao labik karei... Tal urak ni, tỉnh Đồng Nai hu brei ngak jalan ngak biyar jien bồi thường saong brei thau cambaih jalan biyar jien ka 2.608 sang di mblang taneh labaih 1.155ha ngan haong paok jien 5.620 tỷ đồng.

Mesup ni (14/1), TAND pakat glong di TPHCM njauk brei padeih mbang langyah ong Văn Kính Dương, Vũ Hoàng Anh Ngọc (dok ieu lac Ngọc "Miu") song dom urang pagam tal bruk ngak tabiak, pablei salih jru phien "prong", kayua hu sa bị cáo hu harak likau oh hu mbaok. Tui panuac khan, mbang langyah hu peih veik di harei 16 song  17/3. Dahlau di nan bilan 7/2020, dalam mbang lanyah camereip, TAND TPHCM hu kaoh duas tử hình Văn Kính Dương song  4 urang pagam tal bruk nan.

Liên minh châu Phi brei thau châu lục ni meda parabha 270 triệu mbang vắc-xin caga Covid-19 tui danak dak Cô-vắc (COVAX), dalam nan 50 triệu mbang meda hu parabha dalam quý 2. Châu Phi urak ni hu labaih 3 triệu urang njom Covid-19 ngan haong 74 ribau urang metai, dalam nan Nam Phi lac negar njauk kan kandah abih ngan hoang 1 triệu 2 rituh ribau urang njom saong 35 ribau urang metai. Liên minh châu Phi daok kham marat ginum biai haong dom công ty ngak tabiak Covid-19 piah patagok parilo vắc-xin meda taduan hu.

Dalam harei 13/1, negar Anh hu rilo menuac metai di abih kayua Covid-19, lac 1.534 urang, saong jiak 48 ribau urang njom bahrau. Ni lac dom menuac metai rilo di abih kuhria tui yaok harei di Anh meng di tuk jit ruak prong Covid-19 tamuh khang. Tabung glong di jit ruak mbang ka 3 di Anh tui kuhria meda mai tal dalam 1 tal 2 adit tal song mbuan si kurang papan ndih hồi sức cấp cứu. Dalam tuk nan, rilo negar châu Âu jeng dok nduac pakacah gauk piah pacang cakak biến thể virus meng Anh njom mbak, dok ngak kan kandah, srau kadau di châu Âu.

Tòa án thành phố La-me-gi-a Te-me (Lamezia Terme) di gah maraong Italy peih mbaok mbang langyah tui hukum kol N-ran-ghe-ta (Ndrangheta) – hu brei thau lac sa kapul mafia khang abih saong kaya mada abih oh njauk lac di Italy, châu Âu bo di dalam dunya. Kol kapul ni hu dom dhar di labaih 30 taneh ia saong abih 5 châu lục; khik darak pasa aphien meng Nam Mỹ tal châu Âu. 325 urang njauk ba tabiak langyah tui hukum ngan haong 438 duas. Kayua jit ruak Covid-19 yau nan ye tui kuhria dom mbang langyah meda hu peih tabiak tui jalan online di gah tòa án saong dom bị cáo daok dalam guk./.  

Urang lang: Thu Thảo -H.Pha  14/1/2021 16:33:45