Bruk samar dut iek lac jalan piah samar mboh, samar brei daok karei saong samar hu taong ruak

Tacei pato nyaom biai ka pacang caga jit ruak Covid-19 di biar harei 25/8, Thủ tướng Phạm Minh Chính, akaok mban tacei jalan pakat negar pacang caga jit Covid-19 ndom lac, dom tỉnh ban tuk peih bruk pa-atah di gauk brei ngak catang, pasang iek jit ruak samar di abih. Khin ngak hu bruk ini, brei khik kajap an sinh xã hội, khik ka yaok rahra hu iek ruak kik samar di abih. Bruk samar dut iek lac jalan piah samar mboh, samar brei daok karei saong samar hu taong ruak. Ngan haong ban raya HCM, bruk dut iek dalam ban raya brei ngak dalam siam mekre, salamat, hu kein, lagaih.

Tuk ini, brei iek taong abih pandap panda lac pandap pandar yaok harei oh kurang hu, lingiu di pandap pakauk, akaok mintri jalan mbak pajeng ba Nguyễn Văn Thể lac yau nan dalam mbang nyaom online haong Mintri Bộ Công Thương, Mintri ngak nong saong patagok palei pala haong UBND dom tỉnh di biar harei 25/8. Tui nan, taong abih dom jalan radaih, jalan kraong jeng lac jalan hijao duh ka bruk pajeng ba, ieu dom bilai tuk pasang iek oh caik rah tabiak bruk gar jalan dui atah. Ong Thể jeng hu panuac ieu dom tinh ban njauk gauk ka bruk duk iek tui jalan RT-PCR haong test nhanh, hu pandar dalam 72h; oh ndok harak adat nao jalan ngan saong dom urang peih radaih hu brei blaoh harak nhận diện.

mBan Tacei jalan pacang caga jit COVID-19 TP.HCM brei thau, meng harei 11/7 tal urak ini, ban raya hu taduan raok 303 urang, 127 urang cai nghiện ma túy tame labik Cơ sở xã hội Thanh Thiếu niên. Dahlau di nan, dalam mbang nao pasang iek tapak bruk pacang jit dalam ban raya, Phó Thủ tướng Vũ Đức Đam hu panuac ieu TP.HCM pasang iek taong abih menuac oh hu sang daok, nao ban glai ban klo, anak meta brei ba tame labik daok tani tanat. Dom urang ini hu ba tame labik kayua bol bala khik iek, saong brei daok karei meyah mboh hu ruak.

Bà Rịa – Vũng Tàu brei dui atah jang 14 harei bruk pa-atah di gauk tui Sarak 16, meng mon 12 melam 26/8. Tui Tỉnh ủy, hadei di 35 harei pa-atah di gauk, dom gah hu kuhria ka raidiuk bhap bini, daong ka dom menuac lahik bruk ngak, menuac kan kandah. Min jeng daok labaih kurang, oh ka pabak hu ginup abih kan kandah di rahra, ngak suan bruk pacang caga jit. Tỉnh brei dui atah tukvak peih ngak sarak 16, jao ka pakat uỷ, karja palei, urang pan akaok dom jabat njauk tame bruk samar drah saong khang kadang jang. 

TAND tỉnh Lạng Sơn bahrau tabiak panuac kaoh abih tih jaik 130 thun guk ka 21 urang ka duas “Peih bruk brei ka urang karei tame negar suan hukum”. Hu thau, puac bilan 10/2020, Vi Quang Hùng (SN 1991) haong 20 urang karei hu 6 mbang ba 53 urang Trung Quốc tame negar suan hukum angaok jalan haluk tapen negar piah mek jien pah ba jalan. Bruk ngak nan suan gah hukum tame, tabiak negar, suan sarak đối ngoại di Karja, ngak srau kadau bhum tapen negar, abih di nyu lac dalam tuk jit COVID-19 daok rah tabiak khang. Bruk kaoh duas nan yau panuac kakei dahlau ka dom bruk ngak suan, ba menuac tame tabiak negar suan hukum.

Akaok Mintri Quốc phòng Mỹ Lloyd Austin tabiak adat brei ka taong abih urang lin daok ngak bruk saong urang lin daok caga ngak bruk, brei klauk vaccine Covid-19, hadei di tuk Pfizer hu pasang iek brei adat ginup abih. Tui yaok pataom di Lầu Năm Góc, labaih 800.000 urang lin oh ka klauk vaccine. Dom menuac metai haong tame sang iek ruak daok tagok glaong dalam bol bala Mỹ. Dalam bilan blaoh, dom lin metai kayua nCoV meng 25 tagok 34 urang.

Bruk klauk vaccine pacang COVID-19 di Afganistan trun 80% hadei di adit camereip tuk gah Taliban pasang iek Ca-bun. Tui Kadung jien uranaih Liên hợp quốc (UNICEF), dalam adit meng harei 15/8, tok hu 30.500 urang hu klauk vaccine pacang COVID-19, dalam tuk adit dahlau di nan hu tal 134.600 urang hu klauk jru. Kadung jien uraniah Liên hợp quốc hu panuac lac, jaik meteh dom vaccine pacang COVID-19 brei ka Afganistan jaik abih tukvak pandar.

Cty YouTube brei thau lac klaak labaih 1 triệu video hu “panuac khan suan ka COVID-19” kuhria meng tuk jit praong tamuh tabiak. Tui YouTube, urang klaak video tui bruk njauk hatai di dom chuyên gia Pasak Pasang iek saong pacang caga jit ruak Mỹ haong Gah Y tế dunya. Panuac ini hu ba tabiak dalam tuk dom gah truyền thông xã hội daok njauk dom urang pan akaok dom gah hu panuac chỉ trích, kayua oh pacang cakak hu bruk pambak praong panuac khan suan ka jit praong./.

Urang lang: Thu Thao – Hani Pha – 26/08 10:29:05