Dom gah chức năng, patagok bruk pasang iek, taduan mek dom urang oh hu sang danaok, daok ban glai ban klo dalam ban

Thủ tướng Phạm Minh Chính hu mbaoh tangin brei tabiak harak ka bruk taduan mek, peih ngak sarak an sinh xã hội ngan haong dom urang oh hu sang danaok, daok ban glai ban klo. Tui nan, ieu kakei akaok UBND tỉnh, ban di trung ương tacei pato công an tỉnh saong dom gah chức năng, patagok bruk pasang iek, taduan mek dom urang oh hu sang danaok, daok ban glai ban klo dalam ban piah dut iek, ba tame labik daong ka rahra atau labik khik iek piah brei mbang tui sarak an sinh xã hội saong pacang caga jit COVID-19 tui njauk adat.

Quân chủng Phòng không Không quân brei thau hu ba 2 bilai ngak oxy lưu động meng Trung đoàn 937 (Sư đoàn 370) song Trung đoàn 925 (Sư đoàn 372) tal sang iek ruak 175, caga pabak oxy y tế ka dom sang iek ruak dalam ban raya .HCM. Yaok bilai ngak hu 40-60 bình 40 lít yaok harei, ngak tabiak oxy hacih hu 99,5% tui bruk babiak. Langui di bruk ngak oxy, gah pajeng ba meng kapal haoh quân sự jeng dok pajeng menuac urang, pandap panda tame gah merong piah pacang jit.

Tui kuhria dalam adit ni, ban raya HCM ngak salah bruk caga 100.000 kadung jru taong ruak ka urang F0 taong ruak di sang saong di dom labik taong ruak, ba jru mai tal dom quận, huyện, phường, xã piah payua ka dom urang F0 daok taong ruak di sang. Anak tal, tui bruk hu hadom F0, ban raya brei blei, parabha ka dom quận, huyện, phường, xã. Danak dak kayua Mintri Y tế saong Sở Y tế ban raya HCM peih tabiak, dalam nan hu dom jru brei pandar takik dalam dom bruk biak praong. Anak bruk bo dom sang iek ruak daok tapa prein, dom janih jru ni pandar samar drah piah rik daong patrun phản ứng di rup pabhap, daong patakik bruk metai.

Cục Đầu tư negar langui – Mintri Kế hoạch song Đầu tư brei thau, dalam 8 bilan akaok thun 2021, Việt Nam pachreih hu 19 tỷ 120 triệu USD phun jien ngak mbang di negar langui, samu 98% tukvak ini thun dahlau. Gah buh jien tame ngak mbang prong abih lac Singapore, labaih 6,2 tỷ USD; patui di nan lac Japon 3,2 tỷ USD. Bruk njauk uan tabuan lac gam song phun jien tut angan bahrau khik bruk patagok, yaom phun jien ramik veik jeng tagok hasit dalam bilan 8. Min, phun jien buh tabiak ngak mbang tapa jalan pataom phun, blei cổ phần jeng dok trun.

Tui UBND tỉnh Bình Thuận, 2 bilan tapa, yaom lac jit Covid-19 biak kan kandah, dom sở ngành chức năng hu kham marat pasang iek, langyah rilo bruk kuac mek, pajeng ba khoáng sản suan hukum. Min, dom labik pandiak hu tỉnh tacei tabiak dahlau dieh ka oh hu langyah tal labik tal dhua. Yau ye, Hàm Tân njauk ngak cambaih laih, langyah tui hình sự bruk kuac mek meng lavik mai di bhum 4,3 ha jaik taphia 2 xã Sơn Mỹ - Tân Xuân. 2 huyện: Tánh Linh, Đức Linh njauk pambuak gauk pateok tabiak 21 gilai di dalam binek Biển Lạc, loa mek cuah dalam binek rilo thun ni mai… kapul pasang iek dom gah di tinh, ban sit meda peih mbang pasang iek bruk mek khoáng sản suan hukum dalam bilan 9 anak tal.

Takik di abih 90 ribau anek saih di 19 bang di Mỹ brei dok karei hadei di tuk njom Covid-19 atau taom gaok haong anek ruak dom adit hadei di tuk thun bac bahrau peih tabiak. Dom anek saih njom Covid-19 patagok di Mỹ kayua lac njom mbak samar di Delta, biến chủng dang akaok di Mỹ di tuk vak urak ni. Tui Học viện nhi khoa Mỹ, labaih 180 ribau uranaih negar ni njom Covid-19 meng harei 12/8 tal 19/8, labaih 4% dut song abih tih 4,5 triệu uranaih di Mỹ njom Covid-19 meng di tuk hu jit ruak. Di Mỹ, bahrau hu vaccine di Pfizer hu brei adat pandar chip ka uranaih meng 12 thun tagok.

Dalam tuk biến thể Delta ngak kan kandah trak tal gah du lịch di Mỹ saong Trung Quốc, ye du lịch kapar haoh châu Âu daok hu siam veik meng dom harak vé yaom lap saong bruk peih ngak hu siam bruk chứng nhận klauk jru caga jit ruak di dalam bhum. EU hu ba tabiak sa hệ thống chứng nhận kỹ thuật số pandar ka dom taneh ia dalam EU, brei adat ka tuai hu klauk blaoh vaccine atau jaik di ini dut iek mboh âm tính haong Covid-19.

Mintri Quốc phòng Hàn Quốc bahrau ni hu panuac ieu Triều Tiên pambuak bruk veik tui thỏa thuận quân sự thun 2018 ka bruk patrun bruk catang tagok. Sarak dok dang anak mbuan si jaleih dalam tuk dom mbang pasram quân sự Mỹ- Hàn, bo gah Triều Tiên ieu lac dom mbang pasram meblah taneh ia. Thỏa thuận quân sự thun 2018 hu makna prong dalam bruk tani tanat di 2 gah Triều Tiên tuk brei adat padang ngak dom bhum đệm rah tui jalan tapen negar angaok mbaok haluk song angaok tasik, jang yau dom labik oh brei par gah angaok biên giới piah pacang cakak bruk paoh gauk./.

Urang lang: Thu Thao – Hani Pha – 28/08 06:00:01