Thủ tướng Phạm Minh Chính brei panuac di var ginum biai

Bier harei 8/8, di Hà Nội, Thủ tướng Phạm Minh Chính hu mbaok tuk peih bruk brei thau pambuak jalan daong langyah iek ruak, taong ruak meng atah (Teleheath) tal taong abih tuyến huyện saong tabiak mbaok pasak công nghệ pacang caga jit Covid-19 pakat negar. Meng bruk ngak ni, taong abih labik y tế tuyến huyện hu pambuak pagam, rik daong palahik paga pacang di dom sang iek ruak, dom urang ruak kan kandah, dalam nan hu taong ruak ka urang ruak Covid-19 hu pasang iek meng dom chuyên gia naih joi di abih bo oh cang ba tagok sang iek ruak praong.

Mesup ni (9/8), Mintri Y tế brei thau, dalam 12 tuk tapa, dalam negar hu 5.155 urang njom bahrau Covid-19 , dalam nan  15 urang tame VN  song  5.140 urang dalam negar  , hu 786 urang dalam bhap bini . Glong di abih lac ban raya .HCM hu 2.349 urang song  Bình Dương 1.725 urang . Mintri  Y tế hu parabha lô jru  remdesivir mbang camereip hu 10.000 klaoh  ka dom sang iek ruak, iek ruak urang ruak Covid-19. Tong abih  lô jru bahrau mai  ban raya .HCM song dom lô patui di nan hu mintri  Y tế parabha ka dom sang iek ruak,piah iek ruak ka urang ruak Covid-19 di ban raya song dom tỉnh gah merong piah pandar, dong iek ruak di labik halei dok hu rilo urang ruak trak .

Kayua urang njom Covid-19 tagok samar, UBND tỉnh Bình Dương bahrau brei padang labik taong ruak urang njom Covid-19 praong 400 papar, caik di labik sang iek ruak chuyên khoa Tâm thần saong sang iek ruak  Lao-Truyền nhiễm. UBND tỉnh Bình Dương hu payua harak ka Mintri Y tế likau parabha viek vaccine caga Covid-19 ka tỉnh. Dahlau di nan, tỉnh hu parabha 544.060 mbang vaccine caga Covid-19 saong jak ba dom urang ngak gah y tế peih bruk klauk jru ngan haong jalan ba tabiak lac klauk 100.000 mbang sa harei, kham marat dahlau di harei 10/8 klauk abih dom vaccine hu parabha.

Sở Y tế tỉnh Long An brei thau, kuhria tal  melam  8/8 hu labaih  10.100 urang njom Covid-19 dalam bhap bini, dang ka 3 di gah merong, dalam nan hu 106 urang metai. Tỉnh dok pataom tame pasang iek  piah ba F0 tabiak truh bhap bini  song jhul khang bruk klauk vaccine. Urak ni,  Long An daok caga bruk lac hu 15.000 urang njom song bruk jhak di abih lac  20.000 urang. Dom harei tal, gah  y tế brei jhul samar  bruk klauk vaccine ka tong abih rahra  meng  18 thun tagok. 

Công an tỉnh Bà Rịa-Vũng Tàu brei thau, tukvak tapa, angaok dom blah mạng xã hội hu rilo panuac daa klauk vaccine caga Covid-19 meng rilo jalan karei di gauk. Piah plaih njauk lah pachot pagait, bhap bini njauk caik hatei anak dom panuac da-a  tut angan klauk vaccine daok ba tagok mạng xã hội, tin nhắn, tờ rơi saong dom jalan yaih khan karei karei. Tỉnh Bà Rịa-Vũng Tàu brei thau, Mintri Y tế hu  pabak brei ka tỉnh labaih 100.000 mbang vaccine, tui kuhria tal puac thun ni, tỉnh meda klauk ka 95% rahra.

  Dom urang njom bahrau song urang metai pagam tal  Covid-19, abih di nyu nan lac biến thể Delta daok tagok khang di rilo taneh ia. Mintri Y tế Philippines brei thau negar ni bahrau hu  287 urang metai kayua  Covid-19, glong di abih dalam  4 bilan tapa,patagok urang metai di negar ni  labaih  29.122 urang. Dom urang pal akaok negar ni daok huac lac biến thể Delta meda njom mbak grauk labik dalam negar, dreih yau bruk dok rah tabiak di dom negar Đông Nam Á. Dahlau di nan,  Malaysia brei thau, yaom lac urang njom bahrau Covid-19 di negar ni  tagok oh biak samar  min biến thể Delta dok hu rilo. Di Thái Lan, kayua bruk klauk jru suai damuai song bruk njom mbak samar di biến thể Delta, nan ye, jit Covid-19 oh ka ladam trun.

Gah y tế Mỹ daok hu panuac lac negar ni meda gaok kan kandah atau nao suan jalan dalam bruk mesuh pacang caga jit Covid-19 tuk dom urang njom bahrau daok tagok samar dalam dom urang ka oh hu klauk vaccine. Tui Viện pakat negar ka bruk njauk mek saong ruak njom pambak, biến thể Delta urak ni lac makna praong abih ngak ka dom urang njom Covid-19 di Mỹ tagok tanut 118.000 yaok harei, lac tanut glaong di abih meng di bilan 2 thun ni, dalam tuk dom urang metai tagok 89% dalam 2 adit tapa.

Tổng Thư ký Liên hợp quốc Antonio Guterres pandar Israel song Lebanon kham merat plaih  mesruh gauk, ngak brei patrun bruk daok catang tagok di labik jalan tapen negar di 2 taneh ia. Jeng dalam harei, Thủ tướng Israel Naftali Bennett hu panuac ieu rajaei, bol bala Li-băng njauk taduan trách nhiem ka dom bruk tong tame meng bloh.Panuac ndom di ong Ben-nét hu batabiak hadei di tuk dom mbang cuk  rocket di tapon nyaom pol pang phao krong Hezbollah di Li-băng tame Israel. Ni lac mbang mesruh gauk khang di abih di 2 gah dalam rilo thun tapa./.

Urang lang: THU THAO & H.PHA - 9/8/2021