Phaok Thủ tướng Vũ Đức Đam ginum biai online di Ha Noi

Brei panuac di mbang ginum biai online meng UBND tỉnh An Giang song Mban tacei jalan pakat negar pacang caga COVID-19, dom mintri, dom gah song urang pal akaok 6 tỉnh tapen negar gahTây Nam harei  9-5, Thủ tướng Phạm Minh Chính ndom lac: urang jakar, abih di nyu nan lac urang dang akaok, hu tuk dok iek lap, oh sangka, brei bruk ngak ka oh cambaih laih, tal tuk hu jit ye having akaok, pandar dom jalan ngak oh siam, oh lagaih ngak ka bhap bini suh sah, bruk ngak mbang pablei salih dang veik. Campuchia yah klaak bruk pacang caga, yau nan ye tui kuhria mboh dalam dom harei tal  urang tame negar VN tui 2 jalan njauk hukum song suan hukum  meng Campuchia mai palei tagok rilo..., biak mbuan si njom mbak jit ruak  di gah Tây Nam Bộ.  Akaok mintri  Y tế Nguyễn Thanh Long hu panuac ieu brei ngak catang bruk pasang iek jalan tapen negar angaok thu, angaok tasik... peih bruk jak ba bhap bini khan brei thau chip urang halei tame Viet Nam suan hukum. Dom puk palei di tapen negar  Tây Nam Bộ tuk halei jeng sahneng lac drei mbuan hu jit, drei daok hu jit; caga dom jalan ngak ka bruk jit ruak njom mbak dalam bhap bini.

Anak bruk rahtabiak sarau kadhau di jit COVID-19, Akaok mintri patao magru bahrau hu harak tacei pato dom Sở pato magru; dom đại học, học viện, sang bac đại học, sang bac cao đẳng sư phạm, sang bac trung cấp pato magru ka bruk patagok dom jalan ngak piah pacang caga jit. Tui nan, akaok mintri ieu kakei dom dom labik pato magru peih ngak catang tui pto tacei di Ban Bí thư, Thủ tướng rajaei, Ban tacei jalan pakat negar pacang caga jit Covid-19, pato tacei di Mintri Y tế saong dom tacei pato di Mintri pato magru jang yau di kanja palei, oh suh sah hatai min jeng oh iek lap dalam bruk pacang caga jit ruak.

Tui pasak pasang iek ruak kik  tỉnh Kon Tum, tal tuk vak ni, gah Y tế tỉnh hu ngak salah bloh bruk klauk vaccine pacang ruak  bạch hầu ka labaih 445.000 urang  meng 2 bilan tagok. Tapa nan, Kon Tum jeng tỉnh camereip di bhum Tây Nguyên ngak salah bloh bruk klauk janih vaccine ni.  Bhum  Tây Nguyên dalam dom thun jiak di ni  bhian rah tabiak bruk tamuh jit bạch hầu. Harei  15/7/2020, mintri  Y tế batabiak bruk klauk vaccine pacang caga jit bạch hầu di  4 tỉnh Đắk Lắk, Gia Lai, Kon Tum song Đắk Nông.

UBND ban Yên Bái hu alin hadiah phone par tangin angan Vsmart di tập đoàn Vingroup ka 13 Bí thư chi bộ puk palei, tổ dân phố, akaok puk palei, kapul bhap bini urak ni ka oh hu phone par tangin piah pabak ka bruk pacang caga jit COVID-19.  Bruk alin hadiah phone par tangin ka dom bí thư chi bộ palei, akaok palei, akaok dân phố,  akaok palei, kapul bhap bini piah ka taong abih kapul urang jakar di pak ni hu saong pandar gheih phone par tangin, saong dom ứng dụng pabak ka bruk ngak di puk palei. Abih di nyu nan lac rik daong pacang caga jit COVID-19, jang yau bruk pilih ruah urang ka Quốc hội saong ka HĐND jaik tal.

Hareik prah tabiak gah lingiu biak rilo ngak ka rilo bhum tapen tasik di  tỉnh Ninh Thuận mbuan si njom nerak tachauk trak. Urak ni rilo ar pacang tasik, cảng ikan, drak pasa kaya ikan,krong ribong dalam labik bhap bini dok di dom palei tapen tasik di ban Phan Rang - Tháp Chàm, dom huyện Ninh Hải, Thuận Nam…hareik pataom jeng mbuk angaok ar, seik bak di angaok krong ribong, ia jhuk  mboh biak kanyah jhak tal alam môi trường tasik  song jhak ka pren yava di bhap bini. Karja, bhap bini njauk ngak khang jang dalam bruk pasang iek pataom mek, pajeng ba, langyah hareik harom tathuak tabiak tapen tasik. Gam haong nan, tỉnh Ninh Thuận brei hu sarak langyah catang dom bruk  tathuak hareik tabiak ngak nerak tal môi trường.

Tập đoàn jru tavao praong di Hàn Quốc Celltrion Inc harei ni brei thau lac daok parabha di dunya jru Rekirona lac jru taong ruak COVID-19 meng kháng thể saong labik nao tal akaok meti lac Pakistan. Dahlau di nan, di bilan 2, Rekirona hu jabat salamat jru tavao Hàn Quốc (MFDS) brei harak pandar hu điều kiện, jeng janih jru taong ruak COVID-19 camriep hu ngak tabiak di Hàn Quốc. Rekirona hu Hàn Quốc pandar ka dom urang ruak COVID-19 di kapul mbuan njom ruak glaong, dalam nan hu dom urang meng umo 60 thun tagok atau hu ruak dahlau dalam rup yau ye tim mạch, ma-ik saradang, huyết áp glaong atau dom ruak mãn tính ngak kan kandah tal suak yava.

Bruk samar drah song giới nghiêm dui atah  6 bilan tapa di Tây Ban Nha mboh hu siam lagaih  dalam bruk pasang iek jit  viêm jalan suah yava cấp COVID-19, ba urang ruak COVID-19 di  Tây Ban Nha dok 198 urang dalam 100.000 rahra. Tuk adat ni tamat di harei 8-5, bhap bini pataom gauk di dom mblang tasik  di Barcelona, angaok jalan ban Madrid… piah uan tabuan, doh takơ, chat tamia. Hu rilo urang oh cuk patiah pacang mbaok, oh khik paatah di gauk song pataom rilo menuac, oh lac tui kapul  6 urang yau hukum batabiak. Bruk yah klaak dom jalan pacang caga, ba rai duik hu mai yau dahlau hu peih ngak di rilo negar di dunya hadei di tuk jit ruak hu tani tanat .

Sa urang cuh phao di var mbang uan harei manek di bang Cô-lô-ra-đô (Colorado-Mỹ), pametai 6 urang praong thun dahlau di tuk cuh tame rup eng di dah page harei 09/5 (tui maong pak ni).Cảnh sát brei thau, urang cuh phai njauk medil lac payo di 1 urang kumei njauk bala dalam var  uan harei manek hu sahabat, gauk gar saong anek bik hu mbaok tame. Urang nan yam tame saong cuh phao dahlau di tuk cuh tame rup eng. Dom ranaih dalam mbang bala oh njauk hagait saong daok hu daok haong gauk gar./.

Urang lang: Thu Thảo – H.Pha  10/5/2021