Brei klauk abih ka uranaih meng 12 tal 17 thun 

Pahadar 77 thun Harei padang Bol bala bhap bini Viet Nam, 32 thun Harei Quốc phòng abih bhap bini, melam kabroi 19/12,  Quân ủy Trung ương, Bộ Quốc phòng saong Rayo papar binguk Việt Nam peih ngak Danak dak daoh tamia  "Talei rohim bol lin bhap bini" ngan saong kadha “Việt Nam – Caong khin sron mbon, salamat ”. Di var pahadar nan Thủ tướng Rajaei Phạm Minh Chính ndom lac, jit ruak Covid-19 daok rah tabiak sraw kadau, nan ye bruk ngak di dom urang pacang caga ruak , dalam nan hu bol lin njauk iek praong. Thủ tướng caong khin gah bol lin patagok jang ilamu meng kan mai lac hatai anit ranam piah daong ka bhap bini, ngak siam bruk pacang caga jit saong pasiam veik bruk cak rok patagok kinh te – xa hoi.

Thủ tướng rajaei bahrau hu harak  ka bruk patagok pacang caga jit  COVID-19, pasang iek  biến chủng bahrau Omicron di  virus SARS-CoV-2. Harak ni pandar : Mintri  Y tế samar tacei pato  tong yaom pakat jit  song dom jalan pacang caga jit  ka nyu lagaih song  tuk rah tabiak jit ruak , langik bilan brak  mbuan hu  biến chủng Omicron. Tong abih dom mintri , dom gah, tỉnh ban patagok, tacei pato dom jalan pacang caga jit; abih di nyu nan lac bruk pasang iek, langyah khang dom kapul nyaom, menuac urang  ngak suan bruk pacang caga jit ruak; Mintri  Y khik ramik song parabha ginup  vaccine. Oh caik rah tabiak bruk labaih, kurang  vaccine. Gam haong nan, caga pabak ginup jru pacang  virus (kadung jru C) ka dom tỉnh ban. Oh caik brei kurang jru   

Tui Jabat Uỷ ban Pacang caga bala meng langik tasik saong Duah daong urang gaok bala, ribuk ka 9 ngak brei 1 urang metai, 1 urang lahik saong ngak karam, ba theik 7 gaiy gilai taong ikan. Njauk caik hatai lac dom kaoh pulao: Song Tử Tây, Đá Nam, Đá Thị, Sơn Ca, Trường Sa njauk khat lahik trak, khut rilo drap ar, pandap panda kaya kan. Di huyen Lý Sơn, tỉnh Quảng Ngãi, tal urak ini hu ngak salah bruk panduan ba 172 baoh sang bhap bini meng bhum mbuan njauk bala nao tal labik daok salamat. Melam kabroi, riyak praong kayua ribuk ka 9 gam saong ia ndik tagok glong tame 2 khu phố Bạch Đằng saong Lê Duẩn di phường 6, TP Tuy Hòa (tỉnh Phú Yên) ngak ka jaik 100 baoh sang dauk dalam ia. Bộ chỉ huy quân sự tỉnh Phú Yên saong Bol lin biên phòng Phú Yên brei 100 urang jakar, urang lin  nao daong ka mikva  panduan ba drap ar saong manuac nao tal labik plaih dalam tuk melam.

Tatua Thanh Sơn nao tapa krong  Đồng Nai hu brei radaih nduac tapa harei kabroi hadei di labaih sa thun padang ngak  . Tatua Thanh Sơn atah jiak  200m hu  ngak meng  bêtông cốt thép;  gar  9m,  tong abih phun jien padang ngak labaih  138 tỉ đồng. Yau nan, hadei di jiak  30 thun njauk nao phà piah tapa krong, bhap bini rahra  xã palao  Thanh Sơn (huyện Định Quán, tỉnh Đồng Nai) hu nao angaok tatua  siam mekre khang kajap. Tatua hu rik dong oh sit dalam bruk patagok yaom pandap panda kaya nong jang yau rai duik di bhap bini pak ni

Melam 19/12/2021, di mblang dat blong Bishan, Singapore Kapol dat blong Viet Nam caoh saong Kapol dat blong Campuchia mbang caoh puac bảng B, AFF Suzuki Cup 2020. Tapa nan, Kapol dat blong Viet Nam caoh mbang Kapol dat blong Campuchia 4 baoh, 4-0. Mbang caoh bán kết AFF Cup 2020, Kapol dat blong Viet Nam caoh saong Thái Lan dua mbang di harei 23 saong harei 26/12  anak tal di mblang dat blong Negar Singapore.

Mbiah tal urak ni biến thể bahrau  Omicron njom mbak biak khang tapa jiak  80 taneh ia song bhum palei. Piah pacang cakak  biến thể Omicron, dom urang ilamu  Canada hu panuac kakei  njauk pandar pataih pacang mbaok,  meda cuk rilo tal khẩu trang atau janih khik ramik  jalan suah yava  N95. Pagam tal bruk njom mbak samar di biến thể Omicron, Giáo sư Gerald Evans, Akaok gah ruak njom mbak sang bac  Đại học Queen ndom lac, bruk ni oh lac kayua  virus meda kandong veik suai lavik jang   dalam không khí, bo kayua urang njom biến thể ni hu  virus rilo jang  kayua nyu menek tabiak samar dalam tế bào

Dom taneh ia ngak catang bruk pacang jit ruak piah caong takik mbang njom mbak daok pambak samar di dunya kayua anek rauk Omicron. Rilo taneh ia châu Âu meda taduan raok Giáng sinh ngan saong dom jalan pacang caga veik. Mentri Y tế   Israel brei thau lac pabak 10 taneh ia tame angan oh brei tame negar piah pacang caga bruk njom mbak biến thể Omicron. Dalam 10 taneh ia  nan, hu Mỹ, Ý, Bỉ, Đức, Thụy Sĩ ...Dalam tuk nan, Hà Lan ngak khang bruk pacang caga tuk jaik tal Giáng sinh. Meng harei 19/12, yaok cửa hàng brei kareik pabah mbang, oh kuhria cửa hàng pablei pandap pandar yaok harei, mbaih tal harei 14/1/2022. Di Pháp, ban ine Paris brei thau lac padeih cuh phao bingu uan raok thun birau yau yaok thun kayua huac jit ruak tuk urang njom Covid-19 di harei 19/12 tagok labaih 48.000 menuac.

Rilo urang ngak pok panuac ieu dom rajaei meng  châu Âu tal  Mỹ ba tangin tame pacang  tuk yaom pandar cai tagok khang ngak kan kandah ka bhap bini. Rilo taneh ia yau  Ba Lan, Hungary song  Mỹ hu peih dom jalan ngak yau caik tanut giá trần song yaom  khí đốt, dong  jien k dom boh sang kan  atau  ba xăng menyek meng gilang khik piah. Dom gilang pariak  trung ương tagok yaom laba  piah patrun  lạm phát. Tây Ban Nha song dom taneh ia karei karei dok dang anak bruk catang tagok  tuk rah tabiak bruk trun jalan song padeih ngak   pagam tal bruk pandik hatai kayua lạm phát. Makna prong ba tal bruk ni  lac yaom xăng menyek tagok 63% dalam tuk điện pandar song brei ka bruk  ngak mbang pablei salih jeng tagok 47%./.

Urang lang: Ái Nghiêm -Hanipha- 20/12