Rilo urang tut angan brei hu the xanh 

Thủ tướng rajaei bahrau tabaik sarak brei trun jien pah taneh thun 2021 ka dom labik, dom urang gaok kan kandah kayua jit COVID-19. Dom labik, dom urang nan, lac dom kapul nyaom, doanh nghiệp, baoh sang, menuac urang daok hu Karja brei pah taneh tapak tui sarak atau tui harak pambuak bruk tui jalan bayar jien pah taneh yaok thun. Dom labik ini hu trun 30% jien pah taneh di thun 2021 tui adat, oh trun jien pah taneh daok tavak veik di dom thun dahlau thun 2021 saong jien suai nộp (meyah hu).

Meng kreh melam 29/9, sruh jit praong abih Hà Nội di labik 328 haong 330 jalan Nguyễn Trãi (quận Thanh Xuân) hu peih talaih hadei di labaih 1 bilan pacang veik. Taong abih rahra abih tukvak daok karei pataom gauk di labik praong mai sang veik, brei daok karei di labik daok 14 harei tra (ngan saong F0) saong 7 harei (ngan saong F1). Dahlau di nan, harei 23/8, quận Thanh Xuân brei padang labik daok karei hadei di tuk hu menuac njauk COVID-19. Meng 2 urang dut iek di sang iek ruak, mboh lac dương tính, tui nan hu jaik 600 urang njom di sruh jit ini. Ini lac labik pandiak di abih ka COVID-19 dalam mbang jit ka 4 di Hà Nội. 

Mesup ini, UBND quận 1-TP.HCM brei thau, quận daok pasang iek hu jit ruak. Dalam 3 adit blaoh, dom menuac njauk ruak bahrau di quận 1 trun labaih 83%; oh hu sruh jit ruak bahrau dalam 7 harei. Quận 1 daok pasang iek brei peih veik darak Bến Thành haong Tân Định; brei adat peih dom bruk duh ka raidiuk yaok harei. Quận Tân Bình jeng mek hu taong abih 6 tiêu chí di Mintri Y tế; dom menuac njauk ruak bahrau dalam 3 adit blaoh trun jaik 86%. Yau nan, meng akaok bilan 9 tal ini, hu 9 quận huyện di TP.HCM tabiak panuac lac pasang iek hu jit ruak. Dahlau di nan hu TP Thủ Đức, quận 7, Phú Nhận, Gò Vấp, Củ Chi, Nhà Bè, Cần Giờ , quận 7, huyện Củ Chi.

Đồng Nai daok peih ngak dom sarak daong ka urang bangsa takik daok dalam tỉnh gaok kan kandah kayua COVID-19. Di Long Khánh, UBMT negar ban Long Khanh peih danak dak “Klah rabha anit ranam ka bhap bini bangsa takik” saong hu alin hadiah labaih 500 pok pandap; Jabat bangsa pambuak bruk haong Thành đoàn brei labaih 100 pok pandap ka mikva bangsa takik gaok kan kandah. Di huyện Long Thành, karja mai ravang, alin hadiah labaih 400 pok pandap brei ka mikva urang Cam, Chơ Ro, Stiêng. Sở Ngak nong saong patagok palei pala tỉnh Đồng Nai haong Huyện đoàn Nhơn Trạch jeng hu alin hadiah pandap brei ka 197 phòng trọ hu urang bangsa takik daok pah.

Kuhria tal jala pandiak harei ini (29/9), Công an tỉnh Ninh Thuận haong dom gah pambuak tal hu ngak salah bruk  pasang iek labik, pasang iek menuac metai piah duah thau bruk metai di 3 amaik anek daok di khu phố 3, phường Mỹ Hải, ban Phan Rang-Tháp Chàm. Hu thau, mesup nan, ong N.V.T. (38 thun) mai sang ye tatuak drei mboh diuk kamei di drei haong 2 urang anek (6 thun haong 4 thun) tual takuai metai. Bruk nan daok hu urang jakar tỉnh Ninh Thuận ngak brei cambaih laih.     

Hadei di jayak dalam mbang bầu cử liên bang harei 26/9, đảng Dân chủ Xã hội Đức (SPD) daok kham merat padang rajaei bahrau piah meblah veik angan Thủ tướng lahik meng thun 2005. Min bruk ini oh lac mbuan lagaih tuk đảng cầm quyền Liên minh Dân chủ / Xã hội Thiên Chúa giáo yaom lac dang dhi 2 dalam bruk tổng tuyển cử jeng daok kham merat dui pambuak liên minh padang rajaei. Gah thau bruk mboh lac, meyah oh hu đảng halei janeh khang di abih piah dang tabiak padang rajaei, dom đảng sit jang di Đức yau Đảng Dân chủ tự do (FPD) haong Đảng Cánh tả Đức meda lac labik kandauk kan thau.

Mintri Môi trường Campuchia brei thau bruk thu lagu tukvak tapa ngak kan kandah trak tal gah ngak padai di taneh ia ini, saong yaom khat lahik tagok tal 100 triệu USD. Tổng cục Ngak nong Campuchia daok peih bruk roh duah dom jalan khik iek halau ia saong taneh riya lagaih haong biến đổi khí hậu. Gam haong nan, pataom tame brei thau ilamu haong tacei pato urang nong, paglaong sản lượng padai. 8 bilan akaok thun ini, Campuchia pablei brah tabiak negar lingiu hu abih tih jaik 292 triệu USD.

Bão Đi-an-mu (Dianmu) gam haong hajan praong dui atah ngak brei dauk dalam di 30 tỉnh ban di Thái Lan, ngak brei takik di abih 6 urang metai, 2 urang lahik. Tui Gah pacang caga saong patrun patakik bala meng langik tasik di Thái Lan, bruk ia ndik, ia dauk di 23 tỉnh jeng daok biak khang, kayua hajan praong meda daok dui atah dalam dom harei anak tal. Ban ine Bangkok haong dom tỉnh jaik taphia daok paglaong hatai sangka kuhria caga kayua ia di kraong Chao Phay-a (Chao Phraya) daok tagok glaong./.

Urang lang: Mousaphuong -29/9