Thủ tướng Rajaei birau brei alin harak meyaom ka dom urang di Mentri Quốc phòng

Thủ tướng Rajaei birau brei alin harak meyaom ka 79 kapol nyaom saong 101 urang hu rik daong rilo dalam bruk pacang caga Covid-19, rik daong tame bruk dak padang CNXH saong khik caga palei negar. Dalam nan, hu 14 urang di Mentri Công an; sa urang di Sang iek ruak Bưu điện, Tập đoàn Bưu chính Viễn thông Việt Nam; 79 kapol saong 86 urang di Mentri Quốc phòng.

Dua adit jiak di ni, urang njom bahrau COVID-19 di ban raya Hồ Chí Minh tagok jiak 20% duh song meteh bialn dahlau. Gam song nan, dom F0 ruak trak song metai jeng dok tagok. Bruk njauk nyai nan lac, dalam dom urang ruak trak song biak trak, hu rilo urang meng dom tỉnh mai . Rilo urang dalam nan oh ka klauk vaccine atau lac urang labaih 65 thun. Taeng harei 5/12, ban raya hu tal 94 urang metai, glong di abih dalam 2 bilan tapa. Piah patrun urang metai, bahrau ni, gah y tế ban raya batabiak bruk pasang iek, khik iek F0 mbuan si trak. Saong brei pasiam veik BRUK rilo bhap bini dok iek lap COVID-19 yau: F0 tal sang iek ruak bloh likau mai sang, hu rilo F0 eng drei iek ruak di sang oh pathau khan haong y tế pak ni, ba tal tuk ruak trak, tame sang iek ruak biak te.

Di huyện Thuận Châu, tỉnh Sơn La birau hu sa anek saih metai hadei di 3 harei klauk vaccine pacang Covid-19. Dahlau di nan, page 4/12, adei V.A.L hu bac sĩ pasang iek njauk tui bruk klauk jru, oh mboh ruak hagait saong brei klauk jru vaccine Pfizer mbang 1. Hadei di tuk klauk blaoh, tal biar harei 6/12, adei V.A.L mboh glaih glar, having akok, glaoh ta-ok, hu gauk gar ba tame Sang iek ruak Đa khoa huyện Thuận Châu iek ruak saong taong ruak. Hadei di nan, urang ruak laik tame glaih glar, pandik ta-da, kan suak yawa, kalik ndon rak ngu, mboh lac ruak trak saong hu ba tame Sang iek ruak Đa khoa tỉnh Sơn La. Tal biar harei 7/12, adei metai.

Labaih 40% urang Việt Nam dok pandar ia njauk njom Ecoli. Nan lac bruk njauk ndom tal dalam mbang pasang iek duah thau ka bruk di uranaih song urang kamei di Việt Nam hu Tổng cục yaok pataom song Kadung jien uranaih Liên Hợp Quốc di Vietnam (unicef) brei thau. Ini lac bruk duah thau, taong yaom dom bruk ngak ka uranaih song urang kamei prong abih di dunya mbiah tal tuk vak ni, ngan song 14.000 boh sang di tong abih 63 tỉnh ban dalam taneh ia. Tapa pasang iek jeng brei mboh Việt Nam hu jak jeng KA patagok song siam lagaih ka uranaih song urang kamei dalam dom gah. Min, bruk pato pakai uranaih meng jalan tong paoh dalam sang jeng lac sa bruk bhian mboh, ngak ka labaih 70% uranaih umo ala 15 thun njauk kan kandah.

Công an tỉnh Bình Thuận birau taong tayak bruk pablei salih matúy di labik taphia Bình Thuận saong Lâm Đồng. Hadei di tukvak pasang iek, dom trinh sát mboh lac Nguyễn Thị Kim Anh umo 32 thun, daok di xã Đa Mi, huyện Hàm Thuận Bắc, tỉnh Bình Thuận lac urang pan kok bruk parabha matuy meng Bình Thuận tame Lâm Đồng tui rilo jalan karei di gauk. Yaok rituh cảnh sát di dua tỉnh tabiak ngak bruk saong chap hu 7 urang, mek hu 4 bánh heroin saong jaik 7.000 asar ma túy lac jru chat. Ini lac dom matuy praong abih hu duah mboh di labik ini. Urak ini, gah chức năng daok duah thau peih praong bruk chuyen an.

Tổng Giám đốc gah y tế dunya (WHO) hu panuac ieu rajaei dom taneh ia brei tong yaom veik dom jalan pacang cakak pakat negar ngan saong jit prong COVID-19 song patagok danak dak klauk jru vaccine piah patrun bruk njom mbak di biến thể Omicron. Urang dang akaok WHO ndom lac, bruk biến thể Omicron njom mbak di dunya meda ngak kan kandah praong tal jit prong COVID-19 song urak ni brei pasang iek chip dahlau di tuk hu rilo urang ruak njom biến thể bahrau tame sang iek ruak. Tui WHO, tong abih dom taneh ia brei duah thau, dut iek, langyah gen song "bruk tự mãn halei jeng ba tal bruk metai lahik". Tui kuhria WHO meda brei thau bruk tong yaom ka mbang klauk vaccine patagok dalam dom harei tal, yaom lac bruk klauk vaccine dok di tanut bier njauk duh hatai di rilo taneh ia dok patagok.

Hadei di tuk tamat bruk ndem biai tapa online di Tổng thống Nga saong Mỹ ngan saong asal kadha praong lac bruk di Ukraine rah tabiak di harei 7/12 meng blaoh, Tổng thống Vladimir Putin brei thau Nga meda payua ka Mỹ dom bruk ba tabiak dalam 1 adit anak, piah pambuak veik bruk ginum biai online di ong saong Tổng thống Mỹ Joe Biden. Tổng thống Nga taong yaom bruk ginum biai rah tabiak “siam mekre saong dak padang”, dalam nan bruk praong lac meda khik ramik bruk ginum biai di dua gah. Gah pasang iek mboh lac, dua urang ngak praong jeng hu sabe ein saong sanya brei trun bruk catang tagok. Bruk taom gaok online mbang ini yau peih tabiak dom jalan taom gaok gauk saong lac bruk peih mbaok ka dom siam mekre di anak tal.

Tui hãng tin ANI, hu takik di abih 13 urang metai dalam mbang laik kapan haoh trực thăng Mi-17V5 di Ấn Độ harei kabroi, dalam nan hu 2 haduik pasang Tổng tham mưu trưởng dom tapon nyaom bol pan phao kraong Ấn Độ. Hu sa urang dok duik dalam mbang bala pandik harao ni. Bala nan rah tabiak di huyện Nilgiris, atah di bang gah merong Tamil Nadu. Bruk duah thau daok hu peih ngak samar piah duah tabiak makna di bala nan. Thaot binguk pak di labik brei mboh, pui khuah khang tagok di labik kapan haoh gaok bala dalam glai./.

Urang lang: Hani Pha – Bhumi – 09/12