Alin pandap kapol nyaom, baoh sang kathaot, baoh sang sarak, urang bangsa takik tui sarak di karja

Thủ tướng Rajaei birau hu Sarak ka bruk patagok dom jalan khik brei uan raok Tet thun anek sak Rimong 2022 dalam salamat bui sambai, siam mekre, patak pataom. Dalam nan, Thủ tướng jao Ủy ban Bangsa dang tabiak pambuak saong dom mentri, dom gah, dom palei peih bruk uan raok, rivang, duah thau, alin pandap kapol nyaom, baoh sang kathaot, baoh sang sarak, urang bangsa takik tui sarak di karja. Mentri LĐTB saong XH pambuak bruk haong dom mentri, dom gah, dom palei pataom iek, duah thau raidiuk di dom urang dalam sarak , urang kan kandah, gaok kan kandah kayua Covid-19; baoh sang kathaot, bhap bini njauk khat lahik kayua bala meng langik tasik, jit ruak, bhum atah bayah, bhum taphia negar, kaoh pulao, bhum ceik, bhum urang bangsa takik…Peih bruk rivang, alin pandap njauk manuac, njauk urang, plaik kateik angaok gauk, oh brei pambak tame mbang tui sarak, brei hu taong abih dom urang dalam sarak thei jeng hu pandap saong taduan hu pandap alin dahlau Tet.

Rajaei bahrau brei adat ka ban raya HCM song Bình Định hu mbaok tame danak dak ngak iek bruk taduan tuai du lịch dunya. Dahlau di nan, 5 tỉnh lac Kiên Giang, Khánh Hòa, Đà Nẵng, Quảng Nam song Quảng Ninh hu ngak iek bruk taduan tuai du lịch dunya. Bruk samar taduan tuai du lịch dunya hu cong khin rik dong jhul pakhang bruk pasiam veik di gah du lịch jang yau rilo bruk ngak mbang pablei salih nao mai, haong dom bruk karei karei di ban raya HCM song di taneh ia.

Dom siêu thị Big C, Tops Market saong Go! di Kapol nyaom Central Retail peih ngak sumu gauk danak dak daong urang nong Bình Thuận, Long An, jhul khang bruk pablei baoh thanh long. Urak ini, baoh thanh long di Bình Thuận, Long An… ralo meng pablei ka Trung Quốc tapa jalan pablei salih sit sot, bhian gaok rilo bruk oh siam, lagaih. Kayua yau nan ye, Danak dak ini brei ka urang blei dalam negar daong ka urang pala thanh long tuk Tet jaik tal, takik khat lahik tuk pablei thanh long tabiak negar langiu gaok kan kandah kayua jit Covid-19.

Kayua jit ruak COVID-19 pambak praong, urang njom tagok glong, Bình Phước brei tagok pakat jit dalam tỉnh meng pakat 2 tagok pakat 3. Urak ni, rilo pasak y tế hu papan ndih iek ruak min oh hu hệ thống oxy pasak. Hu labik hu hệ thống oxy pasak duh ka bruk cấp cứu yaok harei , min oh lagaih haong bruk iek ruak COVID-19, dalam tuk Bình Phước oh ka hu labik ngak tabiak, pabak oxy y tế. Kayua yau nan ye, Bình Phước hu panuac ieu gah y tế samar drah dalam bruk duah labik pabak oxy piah pabak ka bruk iek ruak.

Pambuak tal bruk uranaih kumei umo 8 thun metai kayua diuk sit di ame taong paoh di harei 22/12/2021, Công an TP.HCM hu pabak bruk ba tabiak langyah tui hukum Nguyễn Võ Quỳnh Trang ndih tapui di thun 1996, palei Giai Lai, ka duis “Pametai manuac” saong ba tabiak langyah, chap khik Nguyễn Kim Trung Thái ndih tapui thun 1985, ame di kumuan ka duas “Ngak pap urang karei” saong “Padauk duis” piah pasang iek tui hukum di karja. Yau nan, tal tukvak ini, Nguyễn Võ Quỳnh Trang njauk ba tabiak langyah, pasang iek dua duis “Ngak pap urang karei” saong “Pametai menuac”.

Bol lin Hàn Quốc bahrau tabiak panuac lac, mesup ni, Triều Tiên cuh sa janih par oh thau cambaih tabiak tasik Japon. Gah khik iek takai tasik Japon jeng hu panuac khan ka bruk cuh ni , brei thau ni meda lac sa tên lửa đạn đạo. Ni lac, mbang cuh camereip bo Triều Tiên peih ngak dalam thun 2022, rah tabiak dom harei, hadei di tuk urang pal akaok Triều Tiên Kim Châng Ưn ndom lac brei patagok bol lin piah pacang cakak haong bruk dunya srau kadau.

Tổng thống Mỹ Joe Biden brei thau, sa lô jru taong rauk Covid-19 di hãng Phai-dơ hu pajeng tal Mỹ dalam adit ini, hadei di tuk Rajaei Mỹ tagok jang dua mbang bruk blei jru nan. Bruk nan hu ba tabiak dalam tuk Mỹ daok dang anak bruk njom mbak ruak biak khang oh ka bhian mboh kayua Omicron. Bilan dahlau, dom jabat khik iek y tế di Mỹ brei adat pandar jru Pác-lô-vít di Phai-dơ ka urang umo meng 12 thun tagok. Dom mbang ngak iek angaok menuac hu mboh jru Pác-lô-vít siam hu jaik 90% dalam pacang caga bruk ba tame sang iek ruak saong metai.

Ong Mohammad Shamshuddin (umo 47 thun), urang peih radaih bus di Ấn Độ bahrau njauk duas 190 thun guk, kayua ngak suan dalam bruk radaih gaok bala di angaok jalan di bilan 5/2015, ngak 19 urang di angaok radaih metai. 190 thun guk, samu haong tanut 10 thun di yaok urang metai. Ấn Độ lac taneh ia hu radaih paoh gauk angaok jalan glong abih di dunya. Yaok thun, hu yaok pluh riabau urang metai, kayua bruk iek lap oh caik hatai sangka, bruk padang ngak jalan mbak oh ka siam, hukum oh catang song bruk tham nhũng./.

Urang lang: Bhumi – Hani Pha – 05/01