Hajan ia sua dui atah ngak khat lahik trak jalan radaih

Thủ tướng rajaei brei buh tabiak dom janih pandap yau: gaiy cao tốc, phao cứu sinh … meng gilang khik piah di negar dong ka dom tỉnh: Quảng Bình, Quảng Trị, Thừa Thiên - Huế, Quảng Nam, Hà Tĩnh piah pasiam veik bala meng langik tasik, hajan ia sua. Ủy ban Trung ương MTTQ Việt Nam taduan hu labaih 12 tỷ meteh jien daong song samar ba tal bhap bini dom tỉnh dok gaok kan kandah trak kayua hajan ia sua piah dong dom pandap panda, pandap mbang menyum pabak ka rai duik yaok harei di mik va . Abih di nyu nan lac, tuk ia sua nao tapa, bruk dong brei ni biak hu yaom glaong dalam bruk dong sang dok, bruk ngak mbang duah jien piah dong ka mik va tani tanat rai duik.

Tổng công ty jalan pasei Việt Nam saong Tổng cục jalan mbak Việt Nam brei thau, dom mbang hajan ia sua dui atah meng harei 7 tal 19/10 ngak khat lahik trak ka gah jalan pasei, jalan radaih. Hu labaih 30 labik angaok jalan pasei Hà Nội - TPHCM glut jaleih taluy; jien piah ngak veik tagok tal yaok pluh tỷ đồng. Hajan ia sua ngak ka gah jalan pasei trun jien mek tame saong tagok jien tamuh tabiak jaik 30 tỷ đồng. Gah jalan radaih, tui kuhria khat lahik di dom jalan roya bhum kreih negar labaih 355 tỷ đồng. Tổng cục jalan mbak Việt Nam hu panuac likau pabak brei chip 100 tỷ đồng piah khik ka bruk di dom jalan roya. 

Bruk glut jaleih takai tasik di ĐBSCL dok rah tabiak rilo dalam bilan hajan ribuk. Di Cà Mau, labaih 5.800m ar tasik di 2 huyện U Minh song Trần Văn Thời njauk glut jaleih, tui kuhria brei hu 70 tỷ đồng piah pasiam veik. UBND tỉnh khang hu tabiak bruk samar drah ka glut jaleih ar pacang takai tasik, padang jalan pacang khik ramik siam mekre drap ar, salamat menuac urang. Di Kiên Giang, jalan ar tasik atah labaih 200km hu dom labik hu pabak min labik glut jaleih jeng dok hu rilo jang. Mban tacei jalan pacang caga bala meng langik tasik song dong duah urang gaok bala dom tỉnh tapen tasik ĐBSCL hu kakei karja palei jhul khang bruk pathau khan bhap bini paglong hatai sahneng song samar peih ngak dom jalan pacang caga.

Mintri Quốc phòng hu jao harak di akaok negar saong brei bruk ka 3 sĩ quan caga tagok jalan nao ngak bruk di Phái bộ khik ramik saron mbon Liên hiệp quốc di gah maraong Sudan saong Cộng hòa Trung Phi lac urang ngak bruk pasang iek quân sự, sĩ quan pathau khan, langyah khau tin. Hadei di 6 thun Việt Nam hu mbaok tame kapul daong khik saron mbon Liên hiệp quốc, tal urak ni akaok negar hu tabiak sarak brei 53 urang jaka, sĩ quan bol bala saong 126 urang jaka, y bác sĩ nao ngak bruk ni.

UBND huyện Tuy Phong (Bình Thuận) brei thau lac tỉnh daok pambuak bruk duah thau sa nyaom likei dam co klaik drap ar, kateik greik urang ngak song ndok bảo kê ka gah padang ngak jalan cao tốc Vĩnh Hảo - Phan Thiết. Dom urang ni khan lac: melam 17/10, kol nyu loa tame lán trại Công ty Xây dựng Tự Lập. Di pak ni, kol nyu kateik greik, mek drap di công ty dalam nan hu 13 thung menyek (yaok tuing 30 lít) song dom pandap panda padang ngak. Khol nyu dok khin taong urang ngak, kateik greik po ngak ndok jien bảo kê bruk padang ngak.

Lac bruk buh phiếu ka oh bhian mboh: hu 12 phiếu njauk hatai, oh hu phiếu cagar veik, Ủy ban Tư pháp Thượng viện Mỹ hu brei tapa bruk pok muk Amy Coney Barret piah ngak thẩm phán Tòa án pakat glaong. Hu bruk njauk tatuak drei ini, lac kayua dom urang dalam đảng Dân chủ di Ủy ban oh hu mbaok piah buh phiếu, oh njauk hatai haong bruk bo urang lac ngak samar drak di Đảng Cộng hòa jhul samar bruk brei tapa piah pok muk Barret ngak, dahlau di harei rah tabiak pilih ruah Tổng thống Mỹ. Mbang buh phiếu di Thượng viện piah brei mboh cambaih bruk pok tagok ngak ni rahtabiak di harei 26/10.

Rajaei Đức hu tabiak panuac cảnh báo bruk nao mai di bhap bini mai meng Thụy Sĩ, Ai-len, Áo, song dom labik di Italia, abih di nyu nan lac labik trượt tuyết dane angan South Tyrol di Italia. Bruk cảnh báo nan hu batabiak pandar meng harei 24/10 anak tal. Tui nan, rahra mai veik negar Đức meng dom bhum mbuan si njom mbak brei dok karei dalam 10 harei saong hu dut iek Covid-19 meng harei ka 5 tagok. Dalam harei 22/10, Đức hu labaih 11 ribau urang njom Covid-19, patagok urang ruak labaih 392 ribau song jiak 10 ribau urang metai.

Rajaei Pháp bahrau pabak 38 labik tame angan dom labik giới nghiêm meng maong 9 melam tal maong 6 dah page, kuhria meng melam paguh saong dui atah dalam 6 adit. Yau nan, Pháp meda hu abih tih 47 labik, hu gam ban ine Paris tabiak bruk giới nghiêm. Tui Thủ tướng Pháp Jean Castex, bruk peih praong labik pacang cakak yau nan meda ngak kan kandah tal labaih 46 triệu bhap bini Pháp. Bruk ni hu taong yaom di adit anak tal saong dom adat giới nghiêm meda hu ngak catang mayah mboh lac njauk ngak. Urak ni Pháp hu labaih 957.000 urang njom Covid-19, dalam nan hu 34.000 urang metai./

Urang lang: Thu Thảo – Hani Pha – 24/10