Di nyaom biai online Rajaei haong dom tỉnh, ban ka bruk pacang caga jit Covid-19 rah tabiak harei 30/7, Thủ tướng Phạm Minh Chính brei thau: rajaei meda hu Sarak ka bruk peih ngak dom jalan samar drah pacang caga jit Covid-19 tui Sarak 30 di mbang nyaom ka 1, QH mbang 15. Mintri Y tế ba tabiak dom jalan ngak yau: pataom prein tame daong padam jit samar abih di TP.HCM haong dom tỉnh, ban gah meraong, pabak menuac ngak y tế ka dom labik daok karei, taduan iek ruak ka urang ruak Covid-19; samar blei hu dom jru vaccine hu mbaoh tangin kakei blei blaoh, jhul samar bruk ngak vaccine dalam taneh ia; brei klauk vaccine dahlau ka TP.HCM haong dom tỉnh jaik taphia.

Sở Y tế TP.HCM bahrau hu harak tacei pato peih bruk tui iek prein yava di sang dom menuac njauk Covid-19. Nan lac dom menuac njauk Covid-19 oh mboh hagait karei dalam rup, daok hu iek ruak di dom labik y tế hu brei nao sang hadei di 7 harei taong ruak, urang njom Covid-19 bahrau duah mboh, oh mboh hagait karei dalam rup, oh mbuan ba tal kan kandah. Dalam 14 harei daok karei dalam sang, brei hu bilik karei ka urang ruak Covid-19, bilik laneng lahei, hu jaman karei, hu laik phone di gah y tế, di kapul ngak bruk samar drah di quận, huyện piah taom gaok tuk hu bruk. 

Tỉnh ủy Bà Rịa – Vũng Tàu brei thau: tal urak ini, tui bruk parabha vaccine ka tỉnh ginup klauk brei saoh ka labaih 70% rahra ginup prein klauk duk saong abih tih rahra dalam tỉnh di thun 2021 piah hu bruk oh njaom mbak dalam bhap bini. Urang dang akaok tỉnh hu panuac ieu dom puk palei samar padang jalan ngak, padang angan dom menuac ginup prein klauk tui adat ba tabiak, dalam nan brei klauk dahlau vaccine ka urang umo labaih 65 thun, urang hu ruak mãn tính.

LĐLĐ tỉnh Bình Dương brei thau, tal urak ini dalam tỉnh hu 600 DN haong yaok pluh rabau urang ngak gaok kan kandah kayua jit Covid-19. Bruk njauk biai nan lac, hu rilo urang ruak dalam sang mac ngak bruk tui jalan "3 di labik", nan ye bruk ngak njauk padeih veik. Tui Hiệp hội Xuất nhập khẩu tỉnh Bình Dương, hu tal labaih 1.000 DN padeih ngak kayua oh pabak hu adat ba tabiak piah khik bruk ngak tui jalan "3 di labik". Sa dalam dom jalan brei thau menuac njom bahrau di Bình Dương tagok rilo lac kayua tỉnh daok kham merat mek mẫu dut iek dalam bhap bini.

Piah langyah bruk brei thau ka kol duas pambuak tal bruk padang ngak dom danak dak dalam tỉnh mboh yau daok ngak suan adat hukum, Mintr Công an bahrau hu panuac ieu UBND ban sit Phan Thiết pabak harak gar pambuak tal bruk peih ngak 9 danak dak dalam ban sit Phan Thiết dahlau di harei 2/8/2021. Langiu di nan, Gah Cảnh sát điều tra daok hu panuac ieu brei thau ka chức năng, bruk ngak, quyền hạn di UBND ban sit Phan Thiết; lý lịch trích ngang, bruk hu parabha brei ngak di dom urang pan akaok UBND ban sit haong dom urang jakar tapa dom vaktu dalam bruk tacei pato, ba jalan, peih ngak dom danak dak nan.

Đại sứ Anh di Liên Hợp Quốc bahrau hu panuac lac sa meteh menuac sia  Myanmar – lac jaik 27 triệu menuac, meda njom Covid-19 dalam 2 adit tal meyah  bruk yau urak ini di taneh ia ini oh hu siam tagok. Tui Đại sứ Bác-ba-ra Út-goát (Barbara Woodward), bruk jhak tagok biak samar meng tuk Bol bala meblah mek quyền pasang iek karja meng bilan 2. Kayua yau nan ye, Hội đồng Bảo an Liên Hợp Quốc njauk samar peih ngak Sarak 2565 di Myanmar, ieu padeih mesruh chip piah khik hu siam mekre salamat bruk pajeng vaccine pacang Covid-19. Urak ini Myanmar tok daok 40% labik y tế ginup prein ngak bruk.

Báo chí Lào brei thau, rajaei negar ini hu tacei pato Mintri Ilamu, Brei thau saong Du lịch pambuak bruk haong dom tỉnh, ban caga ka bruk peih pabah mbang veik gah du lịch tui jalan “siam mekre bahrau”. Lào brei padeih abih bruk ngak meng kreh bilan 4, tuk jit Covid-19 mbang ka 2 pambak praong. Urak ini hu jaik 14% menuac sia Lào hu klauk vaccine pacang Covid-19 saong tui kuhria tal puac thun ini, taneh ia ini klauk hu takik di abih ka labaih meteh dom menuac sia di taneh ia ini. 

Tui AP, Jabat Tổng thống Mỹ brei thau, jaik 1.000 lin Mỹ brei daok veik Syria piah daong dom kapul urang Arab haong urang Kurd di Gah Dân chủ Syria (SDF) mesruh veik haong kol IS. Min bruk hu mbaok di bol bala Mỹ oh hu Rajaei Syria njauk hatai, kayua mboh lac nyu lih tame quyền ngak po taneh ia saong oh njauk haong adat hukum dunya. Bruk mesruh gauk di Syria patuh tabiak di thun 2011 ngan haong rilo gah pan phao kraong cagar veik haong dom kapul khủng bố mesruh veik haong rajaei di Tổng thống Bashar al-Assad. Bruk ba tangin tame kayua Mỹ ba tabiak di Syria hu peih tabiak meng thun 2014, haong jalan ba tabiak lac taong tayah kol IS./.

Urang lang:  H.Pha & A.Nghiem - 31/7/2021