Peih dom labik pablei pandap tani tanat yaom kaom

Patui danak dak mbang nyaom ka 10, mesup ni, Quốc hội brei panuac ka dom asar kadha dok hu rilo panuac karei di gauk di dự thảo hukum Cư trú (pasiam veik). Danka dak hukum ni dok hu dom bruk prong yau: bruk tut angan labik dok, Dự thảo hukum oh batabiak bruk tut angan labik dok hu pandar karei ka ban di trung ương yau hukum urak ni, kayua bruk batabiak dom điều kiện karei ni ngak cuang kandah quyền tự do cư trú di bhap bini; ngak kan kandah tal quyền, kein lagaih di sa nyaom bhap bini dok duik rai, ngak bruk di dom ban prong, min oh ginup kadha piah ttut angan labik dok. Daok paka thi hành, Uỷ ban Thường vụ Quốc hội hu njauk hatai ka tuk vak hukum Cư trú (pasiam veik ) hu batabiak pandar lac meng harei 01/7/2021 yau panuac caong di rajaei.

Thủ tướng Rajaei hu mbaoh tangin tame sarak brei Bằng “Tổ quốc ghi công” ka 22 liệt sĩ di Mintri Quốc phòng metai di harei 18/10 dalam tuk ngak bruk daong bhap bini pasiam dom kan kandah kayua hajan ia sua di huyện Hướng Hóa, tỉnh Quảng Trị. Jeng dalam harei nan, akaok negar Nguyễn Phú Trọng mbaoh tangin brei alin Huân chương khik caga taneh ia ka 22 urang jaka, urang lin kapul Kinh tế-Quốc phòng 337, Quân khu 4, metai dalam tuk ngak bruk pacang caga, pasiam dom kan kandah kayua bala langik tasik. 

Anak bruk langik tasik kanyah jhak di dom tỉnh gah kreik negar, Mintri Công Thương hu tacei Sở Công Thương dom tỉnh gah kreik negar pataom tame peih ngak, padang dom labik pabak pandap mbang menyum yaok harei song pablei pandap tani tanat yaom kaom di dom labik pasak huyện, ban sit, ban prong piah tani tanat drak pasa, oh caik rah tabiak bruk kurang pandap, tagok yaom pandap panda, Mintri Công Thương jeng hu panuac ieu dom doanh nghiệp parabha song khik piah pandap panda, peih dom labik pablei pandap tan itanat yaom kaom, peih bruk xuất kho, samar pablei dom janih pandap pandar yaok harei ka bhap bini.

UBND tỉnh Đồng Nai saong Mintri jalan mbak pajeng ba bahrau jao mblang taneh praong jaik 2.590 ha brei ka danak dak padang ngak mblang kapar haoh dunya Long Thành vaktu ka 1. Mblang kapar haoh dunya Long Thành lac danak dak praong abih di negar hu Quốc hội brei tapa di sarak ka 94 thun 2015, pamaong tal jeng labik piah pajeng ba meng kapal haoh pakat dunya di pak ni, hu prien pajeng 100 triệu tuai sa thun saong 5 triệu tấn pandap sa thun. 

UBND TPHCM hu panuac pok tagok mintri Quốc phòng jao labik taneh prong labaih 1.100 m2 piah ngak jalan bahrau tame tabiak mblang kapan haoh Tân Sơn Nhất di jalan Trường Sơn. Labik mblang taneh ni hu pandar piah ngak jalan nao mai saong labik daok bahrau ka 33 boh sang, rilo meng lac urang lin di dom jabat di mintri Quốc phòng njauk kan kandah kayua danak dak jalan nao tapa Trần Quốc Hoàn - Cộng Hoà (quận Tân Bình). Dahlau di nan, di bilan 5 ban raya hu panuac ndom ka bruk bruk ni, min oh ka taduan hu panuac javap jalei. Jalan bahrau pambuak meng jalan Trần Quốc Hoàn tal Cộng Hòa atah 4,4 km hu 6 jalan radeih tong abih tih phun jien buh tabiak ngak labaih 4.800 tỷ đồng, lac sa dalam 6 danak dak hu panuac likau piah patrun bruk gar jalan pak di labik nao tame tabiak di mblang kapan haoh Tân Sơn Nhất. Urak ni, ban raya bahrau ngak salah 3 danak dak.

Rajaei ban raya New York - Mỹ brei thau meda ba mai viek yaok rituh cảnh sát dalam 8 harei dahlau di tuk ratabiak bruk pilih ruah Tổng thống Mỹ di harei 3/11 anak tal, piah khik sron mbon anak dom bruk neh rabha gauk biak khang dahlau di tuk pilih ruah. Labaih 1.200 labik buh phiếu dalam negar brei hu mbaok meng 2-3 cảnh sát. Mbang pilih ruah Tổng thống Mỹ di dua urang lac Tổng thống Mỹ Đô-nan Trăm saong phó Tổng thống Mỹ dahlau dieh ong Giâu Bai-đần daok tame tukvak pakacah gauk khang di abih ngan saong bruk ndom puac nao mai mbang puac abih meda rahtabiak di harei 22/10 anak tal.

Trung Quốc urak ni lac sa dalam dom negar dang akaok dalam bruk duah thau song ngak tabiak vắc-xin pacang Covid-19, hu 13 janih vắc-xin dalam tong abih 44 janih di dunya dok dalam tuk ngak iek. Urak ni abih 4 janih vắc xin dok peih bruk ngak iek tuk vak ka 3 hu patagok siam, labaih 60 ribau urang klauk iek vắc xin oh ka mboh urang halei hu phản ứng phụ cambaih laih

Pháp brei thau meda kham marat pacang cakak bruk mesuh gauk di mangaok truyền thông xã hội dalam tuk hu rilo panuac ieu rajaei b atangin tame ngak hadei di tuk sa cei gru pato sajarah njauk pametai di mangaok jalan langiu ban ine Pa-ri. Gam tui di nan brei tagok manuac daong ka dom jabat ngak bruk tui iek kapul Hồi giáo cực đoan di mangaok mạng xã hội. Di adit blaoh, sa mbang taong khủng bố ngak megei negar Pháp tuk 1 urang cei gru pato lịch sử njauk pametai angaok jalan di Pa-ri. Urang pametai menuac nan, lac sa urang dam 18 thun saong njauk cuh metai chip di pak nan./.

Urang lang: Thu Thảo – Hani Pha – 21/10 10:40:41