Thủ tướng bahrau tabiak sarak 977/QĐ-TTg alin harak meyaom di  Thủ tướng Rajaei brei ka  32 urang di Mintri  Y tế biak gheih dalam bruk pacang caga jit COVID-19, rik dong tame bruk khik caga song iek glang pren yava ka bhap bini. Dalam dom urang hu taduan harak meyaom, dom y bác sĩ di sang iek ruak Chợ Rẫy song sang iek ruak  Bệnh Nhiệt đới Trung ương hu rilo di abih.

Dah page ni (22/6), pasak pasang iek ruak kik (CDC) tỉnh Đồng Nai brei thau ka sa urang medil njom Covid-19 daok ngak bruk di pak ni. Tui kuhria mboh di CDC, urang medil njom Covid-19 lac urang kumei, umo 28 thun daok di phường Cát Lái, ban Thủ Đức njom ruak meng urang daok gam dalam sang daok taong ruak di TP.HCM, tui kuhria njom ruak meng harei 9/6 – 19/6. Urang ni gam haong gauk gar pah sang ngak labik yaih khan di xã Đại Phước, huyện Nhơn Trạch yaok harei meng ban Thủ Đức trun ngak bruk di pak ni. Gah chức năng hu pasang iek, duah mboh hu 10 urang F1 di urang medil lac njom ruak saong ba nao daok karei pataom gauk. Dalam melam 21/6, huyện Nhơn Trạch brei pacang veik labik jalan atah labaih 700m, tui kuhria hu labaih 300 baoh sang gam haong jaik 1.500 menuac.

Sở Thông tin - Truyền thông ban raya  Hồ Chí Minh bahrau ba tame pandar phiên bản bahrau bản đồ số di labik https://bando.tphcm.gov.vn piah bhap bini tame iek, thau ka bruk jit ruak dalam ban. Bản đồ bahrau hu padang ngak meng blah bản đồ đô thị 3D, pabak rilo chức năng bahrau yau: dong duah thau samar khaw tin ka COVID-19 di dom labik bo bhap bini sangka yau dalam ban raya,  yaok quận, huyện, phường, xã; Duah dom khaw tin pagam tal jit  COVID-19 song peih bruk klah rabha khaw tin labik ni tapa mã QRCode, mạng xã hội, email; Langui di nan bhap bini meda brei panuac, tacei tabiak dom bruk, dom labik ka oh njauk atau khan brei thau dom labik ok ngak suan bruk pacang caga jit  COVID-19 ka jabat khik ramik.

Bier harei 21-6, UBND tỉnh Quảng Nam hu harak ka bruk daok brei  patagok khik iek, brei daok karei dom urang meng bhum hu jit mai Quảng Nam piah pacang caga jit ruak COVID-19. Tui nan, meng harei 22-6, tỉnh ni meda brei daok karei pataom gauk manuac nao tal, daok saong mai meng tỉnh Bình Dương (langiu di dom urang hu adat karei).

Gah Điện lực Việt Nam (EVN) brei thau harei kabroi (21/6), bruk pandar  điện dalam negar mbang camereip tagok tal tanut glong bahrau nan lac 42.146 MW. Piah patrun bruk mbuan si khut angaok jalan điện jang yau dalam boh sang, EVN hu panuac kakei bhap bini, dom labik ngak bruk karja song labik ngak pandap, njauk sangka pandar  điện ka nyu siam mekre, patak pataom, abih di nyu nan lac dalam tuk vak tabung glong jala pandiak song melam. Gam haong nan, sangka pandar ka nyu lagaih  jamriak liar, caik di tanut 26-27 độ C tagok, pandar pagam hong cadik song caik hatai sangka  jhui pandar rilo pandap điện hu  công suất praong.

Hadei di tuk pathau khan bruk alin hadiah 25 triệu mbang camriep dalam 80 triệu mbang vaccin COVID-19 alin hadiah dahlau di puac bilan 6, Mỹ daok brei thau bruk kuhria alin hadiah 55 triệu mbang daok veik. Dalam 55 triệu mbang vaccin nan, jaik 41 triệu mbang meda hu parabha tapa danak dak COVAX kayua Liên Hiệp Quốc pachreih daong. Dalam 41 triệu mbang ni, labaih 14 triệu mbang brei ka dom negar Mỹ Latin saong bhum Caribê, labaih 16 triệu mbang brei ka châu Á, daok veik hadom brei ka châu Phi. Việt Nam daok dalam dom taneh ia hu taduan di bhum châu Á.

Anek ruak Delta nyu ngak brei bruk kuhria peih pabah mbang veik harei  21-6 di negar Anh oh ngak hu. Thủ tướng Boris Johnson brei thau dui atah  bruk pacang veik 4 adit tra, tal harei 19-7, song ndom lac “suai jang hasit nyu siam lagaih jang”. Gah Y tế bhap bini  Anh  brei thau urang ruak tagok  79% dalam sa adit, dalam tuk urang tame sang iek tagok jiak 2 mbang . Anek ruak  Delta hu duah mboh di  Anh mbang camereip di bilan 3, dalam oh ka tal 3 bilan hu tal  99% urang njom ruak meng anek ruak Delta ini.

Yaom ralaow pabui di Trung Quốc daok trun biak havieng akaok. Tui yaok pataom di mintri ngak nong palei pala Trung Quốc, yaom ralaow pabui dalam adit ka 3 di bilan 6 di TQ lac 15,13 tệ/kg (jaik 97 ribau đồng/kg), trun jaik 51% dut saong tukvak ni thun blaoh. Yaom ralaow pabui trun khang jeng ngak ka Trung Quốc dang anak bruk labaih ralaow pabui, rahtabiak cagar veik duk haong dom hagait rah tabiak di taneh ia pandar saong blei ralow pabui meng negar lingiu tame  praong abih di dunya dalam jaik 2 thun tapa, tuk jit tả pabui châu Phi ngak ka gah pabak ralaow pabui di Trung Quốc trun khang saong yaom ralaow tagok glaong. Tui mintri ngak nong palei pala Trung Quốc, 2 makna ngak ka yaom ralaow pabui trun khang lac kayua dom drei pabui pablei tabiak rilo, saong kayua huac lac lac pabui caik lavik dak lahik yaom nan ye urang raong pabui di TQ pablei tabiak biak rilo./. 

Urang lang: Thu Thảo & H.Pha - 22/6/2021