Kapul ngak bruk di sang iek ruak Chợ Rẫy samar tagok jalan tabiak gah Barak piah klah rabha bruk pacang caga jit ruak Covid-19

Thu tuong Rajaei Phạm Minh Chính birau payua thư pok meyaom, taong yaom glaong dom bruk halan hatian, kham merat oh thau glaih glar, abih hatai jai, oh huac kan kandah saong mbuan njom jit ruak di dom urang y tế pacang jit tukvak tapa. Urang ngak praong dang kaok Rajaei vak dalam thư yau ini: “Mblang mesruh halei jeng rambah rambup, mbang mesruh halei jeng hu urang metai lahik var klak rup; dom adei sa-ai biak njauk lac urang lin ao patih” daok ba drei tame ngak bruk hu makna biak glaong”. Page ini 26/5/2021, di jabat Rajaei, Thủ tướng Phạm Minh Chính dang akaok mbang nyaom online haong urang ngak praong di tỉnh Bắc Giang saong Băc Ninh gam saong dom gah pacang caga jit pak di labik piah ba tabiak bruk ngak, jalan ngak samar piah pacang caga bruk njom mbak di jit ruak Covid-19 daok tamuh di dua tỉnh ini.

Pabak panuac ieu di Mintri Y tế daong ka Bắc Giang mesup ini, 13 urang di kapul ngak bruk samar drah di sang iek ruak Chợ Rẫy samar tagok jalan tabiak gah Barak piah klah rabha bruk hit haong dom urang daok ngak bruk yau drei di dom labik pandiak ka jit ruak Covid-19. Bác sĩ Trần Thanh Linh – Phaok akaok khoa Hồi sức Cấp cứu, akaok kapul brei thau, ini lac dom bác sĩ, urang y tế naih gheih, hu ilamu ngak bruk glaong tapa dom mbang nao daong dom labik pandiak di jit ruak Covid-19 dalam taneh ia, yau dom y bác sĩ bhian hu mbaok pacang jit di Đà Nẵng.

Meng harei ini, Vietnam Airlines pabak harak vé kapal haok brei saoh ka urang nao kapal haoh lac bác sĩ, urang ngak bruk ka Mentri Y tế, Pasak pasang iek ruak kik dom tỉnh, ban, sang iek ruak brei menuac nao ngak bruk pacang caga jit di Bắc Ninh saong Bắc Giang. Hãng kapal haok daok brei pajeng saoh oh mek jien pandap panda di dom urang nan nao kapal haok, rik daong palagaih ka urang ba tui pandap panda, mac jamraih y tế piah ngak bruk taong ruak jeng yau caga jit.

UB bhap bini tỉnh Ninh Thuận bahrau ieu pasang iek, langyah bruk di dom urang pan akaok Sở Công Thương kayua iek lap bruk pacang caga jit. Hu thau dalam tuk jit COVID-19 daok rah tabiak srau kadau, yaom lac oh ka hu harak pathau khan dom angan, danak dak cambaih laih tal UB bhap bini tỉnh haong Sở Y tế min biar harei 24/5, Sở Công Thương tỉnh Ninh Thuận eng drei taduan raok saong ngak bruk haong dom kapul lingiu tỉnh, cambaih laih nan lac ngak bruk haong lambaok Tập đoàn T&T (labik hu dom urang ruak COVID-19). Lingiu di kiểm điểm trách nhiệm, UB bhap bini tỉnh hu tacei Sở Công Thương samar pasang iek taong abih urang jakar, urang ngak dalam jabat di drei saong dom urang lambaok dom sở, ngành dalam tỉnh hu mbaok tame bruk ini brei daok pataah di sang, brei khai báo y tế meng online.

Tui Pasak kuhria mboh dahlau bruk lagik tasik negar, kayua áp thấp yau nan ye meng harei 26/5 tal 27/5, di Nam Trung Bộ, Tây Nguyên saong Nam bộ hu hajan mbiah tal hajan khang, hu labik hajan biak khang saong hangin, di Nam Trung Bộ hu hajan meng 80 tal 150mm, di Tây Nguyên saong Nam Bộ meng 100 -200 mm. Dalam tuk langik hajan meda hu hangin khang, cakla taong, hajan patau saong hangin khang. Mikva brei caik hatai, takik tabiak jalan tuk hajan hangin piah khik salamat. Di Ban raya HCM hajan khang gam saong ia ndik dauk ralo labik.

Kapul khik caga takai tasik negar Japon brei thau, sa kapal ikan Japon paoh gauk haong sa kapal ikan di Nga labik langiu tasik pulao Hokkaido, negar Japon ngak brei 3 urang taong ikan di Japon metai saong 3 urang karei njauk rambus. Hu thau, bruk nan rah tabiak tuk mon 6 mesup ini tui mon di Japon, tuk sruh kapal taong ikan 9,7 tấn di Japon paoh gauk haong kapal praong 662 tấn di Nga labik tasik Okhotsk. Dom urang angaok kapal di Nga daong sraong hu 5 urang di kapal Japon, min dalam nan hu 3 urang var drei jan. Cảnh sát tasik Japon daok brei sa kapal khik iek nao tal labik nan.

Urang dang akaok Gah Y tế dunya Tedros Adhanom Ghebreyesus brei thau, mbiah tal harei ini hu takik di nyu lac 115.000 urang ngak gah y tế plang metai kayua jit Covid-19 kuhria meng tuk tamuh jit ruak, gam haong nan, ong hu panuac iew peih raong bruk klauk jru caga ruak di taong abih taneh ia angaok dunya dalam bruk mesruh pacang veik jit praong. Tong Yam ndok Gah Y tế dunya hu pok meyaom dom bruk var klak rup drei di dom urang ngak bruk gah y te di dunya dalam bruk mesruh pacang jit ruak praong. Ong ndom lac: “Dalam jaik 18 bilan, dom y bac sĩ saong urang iek glang prein yawa ka menuac sia di dunya daok dang di labik diuk haong metai. Dom urang nan hu daong ka biak rilo menuac hu diuk, dom urang nan daok mesruh brei ka urang karei.

Hu biak takik menuac, samu 0,01% dom menuac hu klauk vắc-xin ginup abih di Mỹ njauk COVID-19 hadei di nan. Ini lac bruk hu mboh tapa roh duah hu khan brei thau bahrau ini di Rajaei Mỹ, sa mbang tra brei mboh siam lagaih praong di vắc-xin dalam pacang caga bruk njaom mbak di vi-rút Sars CoV-2. Jaik 164 triệu menuac, samu meteh menuac sia di Mỹ, hu klauk takik di abih 1 mbang vắc-xin, dalam tuk 39% hu klauk ginup./.

Urang lang: M. Phương – Ái Nghiêm – 26/05 15:34:22