Biar harei 1/11/202 (tui mong pak nan), Thủ tướng Rajaei Phạm Minh Chính hu mbaok saong hu kadha ndom puac praong dalam Nyaom biai pakat glaong di abih ka bruk khí hậu hu peih tabiak dalam Nyaom biai mbang ka 26 dom Gah hu mbaok tame Công ước khung di Liên hợp quốc ka Biến đổi khí hậu (COP26) hu peih tabiak di Negar Anh. Thủ tướng ndom lac, pacang caga haong biến đổi khí hậu, pasiam veik yau tamo brei jeng bruk njauk ngak dahlau glaong abih dalam yaok jalan ngak praong cakrok patagok, lac bruk đạo đức glaong abih di yaok pakat, yaok gah, yaok doanh nghiệp saong bol bhap rahra. Dalam harei ngak bruk camereip di  COP26, jaik abih dom urang pan akaok dom taneh ia di dunya jeng hu panuac ieu dunya njauk ngak samar drah piah pasiam bruk mesruh pacang biến đổi khí hậu.

Harei 1/11/2021, Rajaei patabiak sarak ka 95/NĐ-CP pasiam veik,pabak dom paka di sarak  83/2014 ka bruk pablei salih xăng menyek ngan song rilo asal kadha salih karei ka jalan khik ramik xăng menyek song jalan kuhria yaom. Tui nan, mbang ba tabiak yaom xăng menyek hu trun meng  15 harei dok  10 harei, nan lac yaok bilan ramik veik  3 mbang. Tukvak ba tabiak yaom  xăng menyek dalam dom harei  1, harei  11 song harei  21 yaok bilan. Sarak  95/CP jeng brei adat lac meyah yaom  xăng, menyek trun tagok srau kadau, ngak kan kandah prong tal bruk patagok kinh tế-xã hội song rai duik bhap bini, Mintri  Công thương njauk pathau khan Thủ tướng rajaei pasang iek, batabiak tuk vak ramik veik ka nyu lagaih.

Di ban raya HCM, bruk brei klauk vaccine ka anek saih umo meng 12 tal ala 18 thun tal urak ini mek hu 50% bruk ba tabiak. Chánh Văn phòng Sở Y tế Ban raya HCM Nguyễn Thị Huỳnh Mai brei thau, dom anek saih ka oh hu klauk kayua hu rilo makna jeng hu bac pataom gauk saong hu pato tacei jalan pacang caga jit COVID-19.  Urang lambuak Sở Y tế ban raya HCM brei thau lac, bruk klauk vaccine ka ranaih umo meng 12 - 17 thun njauk peih ngak catang tui adat di Mintri Y tế, oh brei klauk ka umo ala 12 thun.

Cục Thuế Ninh Thuận brei thau, brei dui atah tukvak kak je song jien pah taneh  dalam thun 2021 ka  430 doanh nghiệp song oh kak je atau trun meneing yaom jien kak je ka jiak  9.000 boh sang pablei salih njauk kan kandah kayua jit  COVID-19 ngan song yaom jien labaih  136 tỷ đồng. Dalam tuk vak anak tal, Cục Thuế Ninh Thuận hu peih ngak dom sarak jien je yau: trun 30% jien je kak angaok jien mek tame di doanh nghiệp njauk kak di thun 2021; miễn dom janih je ka boh sang, menuac urang tamuh tabiak meng bruk ngak mbang pablei salih di dom bilan   dalam quý III song quý IV di thun  2021. Gam haong nan, trun  30% jien je giá trị gia tăng meng di harei  01/10/2021 tal abih harei  31/12/2021 ka doanh nghiệp, kapul nyaom ngak mbang pablei salih  dalam dom gah dịch vụ  pajeng ba; dịch vụ padeih padei, mbang menyum…

Hu peih pabah mbang veik, meng melam 31/10 tal dah page harei 1/11, dom urang pablei salih di darak Bình Điền hu taduan pandap panda meng dom urang pambuak bruk pabak pandap ka dom urang pablei salih di dalam labik Ban raya HCM saong dom tinh jaik taphia ngan haong labaih 4.000 mbang urang tame, tabiak darak, sản lượng pandap panda blei tame darak dalam melam hu labaih 335 tấn pandap panda dom janih.

Yaom lac daok jaik 1 adit tra meng abih dom harei oh ngak bruk min hu mbang ginup jien bilan (sa jalan ngak piah khik pa-atah di gauk), min urang ngak praong di Nga mboh lac tukvak ini oh ka ginup saong meda dui atah jang piah pacang cakak bruk njom mbak COVID-19 dalam taneh ia. Tal urak ini, bruk klauk vaccine di Nga jeng oh ka ginup piah pacang. Dalam taneh ia hu jaik 51 triệu menuac hu klauk ginup, tui nan bruk pacang ruak dalam bhap bini daok di tanut 47%, lac daok biak atah haong tanut pacang caga hu dom jabat pambuak tal ba tabiak lac 80%.

Taong abih dom gah njauk kreik pabah mbang dahlau daih piah pacang caga jit COVID-19 hu peih pabah mbang veik meng harei ini ( 01/11). Ini lac panuac di Thủ tướng Campuchia Hun Sen. Meng tuk jit praong COVID-19 tamuh tabiak di bilan 3 thun blaoh tal ini, Campuchia rah tapa  4 tukvak saong tukvak ka 4 lac tukvak diukrai haong COVID-19, lagaih haong raidiuk bahrau saong brei adat ka taong abih gah hu peih pabah mbang ngak bruk veik yau dahlau daih.

Mintri Lao động Hàn Quốc brei thau, taneh ia ini meda klaak meneing dom bruk ngak catang piah takik brei tame taneh ia dom urang ngak negar langiu, hu pandar dalam tukvak jit COVID-19 tamuh khang di puac bilan 11 ini. Tui nan, dom urang ngak negar lingiu di dom taneh ia ba mai, hu brei tame Hàn Quốc meyah hu harak lac klauk blaoh vaccine caga COVID-19 di dalam taneh ia saong dut iek RT-PCR mboh lac âm tính. Langiu di nan, Hàn Quốc jeng brei klaak bruk giới hạn menuac ngak tame negar kuhria tui harei saong tui adit./.

Urang lang: Thu Thao & H.Pha -2/11/2021