Thu tuong Rajaei Phạm Minh Chính ndem biai saong dom urang jakar

Brei panuac tamat var ngak bruk saong dom urang ilamu, lambaok dom đơn vị roh duah, ngak tabiak vaccine ka bruk roh duah, jao brei cong nghe, ngak tabiak vaccine pacang Covid-19 harei 7/6, Thu tuong Rajaei Phạm Minh Chính kakei lac, vaccine lac bruk praong, ngak ba hu, suai lavik, dalam bruk pacang caga jit jeng yau dalam bruk pacang caga Covid-19. Kayua yau nan ye, khol drei brei ngak hu jak jeng siam mekre “ bruk vaccine”. Dom gah, đơn vị brei iek vaccine pacang caga Covid-19 nan yau kaya pandap ka bhap bini oh lac pandap pablei salih. Bruk ngak tabiak vacccine dalm negar gam rik tame patagok bruk cong ngiep jru di Viet Nam gam khik caga prein yawa ka bhap bini.

Meng  mon 12 kreh melam ni  8/6, di dom puk palei dalam  tỉnh Nghệ An yau ban Vinh, ban sit  Cửa Lò, huyện Nghi Lộc, Hưng Nguyên, Nam Đàn brei padeih bruk pajeng ba tuai  meng  Nghệ An tal  Hà Tĩnh song talap veik. Taphia di nan, Nghệ An brei padeih dom  nhà hàng, labik mbang menyum , kuan càphê, tiem cakak mbuk, labik raco akaok, cơ sở thẩm mỹ... Dahlau di nan,  harei  4/5, Hà Tĩnh hu  2 urang njom COVID-19 di  xã Thạch Trung, ban Hà Tĩnh. 2 urang ni lac  urang ngak bruk tự do meng  tỉnh Bình Dương mai palei di  Hà Tĩnh, angaok mbang par VN 1262 meng ban raya  Hồ Chí Minh tal ban Vinh (Nghệ An), par trun di tukvak 9 tuk 55 minite  harei  30/5/2021.

Sở Y tế tỉnh Lâm Đồng brei thau, jabat chức năng birau mboh hu sa urang nao daok karei di labik pataom salih ka urang mai meng bhum jit. Dahlau di nan, di melam 2/6, di labik daok pataom karei di Pasak Pato pasram saong paglaong ilamu ngak bruk- Công an tỉnh Lâm Đồng, gah chức năng thau ong T.Đ.D umo 39 thun, daok di phường 11, TP Đà Lạt  salih ka ong Đ.N.D umo 51 thun, urang brei nao daok labik karei kayua mai meng bhum hu jit ruak lac ban sit Từ Sơn, tỉnh Bắc Ninh. Hadei di tuk thau lac urang salih ka gauk tame labik daok karei, gah chức năng ngak bruk duah thau angan je, labik daok di ong Đ.N.D, gam samar ba ong nan nao labik pataom daok karei. Tui nan, pabak harak brei ngak tui dom jalan brei daok karei ngan saong urang salih ka ong T.Đ.D. Urang nan ngak suan bruk ba tabiak di karja ka bruk pacang caga jit Covid-19 saong brei kaoh catang tui hukum hadei di tuk salah blaoh 21 harei daok labik karei.

Tỉnh Kiên Giang dong jien patao bruk ngak ka urang ngak palei pala, urang ngak dalam  labik, cụm công nghiệp, labik rivang du lịch song ngak bruk dalam doanh nghiệp sit song mbiah  dalam tỉnh, tong abih tih phun jien peih ngak ka thun  2021 tui kuhira lac  16 tỷ đồng. Urang bac bruk ngak hu dong jien lac urang kamei, urang ngak palei pala, urang jaoh jo  hu mbaok tame dalam dom danak dak  pato pakai ilamu sơ cấp, pato pakai ala  3 bilan. Tỉnh hu dong ka urang jaoh jo , dom urang dalam sarak mbang tui urang hu buh pren ka cách mạng, urang bangsa takik, urang sang kan kathaot, jiak si kan kathaot …Tỉnh Kiên Giang kham merat tal thun 2025, hu urang ngak  tapa pato pakai labaih  75%; dalam nan urang ngak tapa bac megru bruk ngak hu harak, chứng chỉ labaih 52%.

Dalam dua harei 7 saong 8/6, labaih 12.500 anek saih di Bình Phước hu mbaok tame pakacah pilih ruah tame tal 10 THPT thun bac 2021 -2022 di 33 labik pakacah. Piah khik salamat bruk pacang caga jit Covid-19, dom labik pakacah brei hu urang jakar  dut iek pandiak dalam rup pabhap dom adei tuk tame pabah mbang, kakei anek saih cuk pataih pacang pabah, rao tangin meng ia jru pametai anek ruak. Langiu pabah mbang brei hu gah cong an, bol lin  daong khik salamat. Tui kuhria di Sở Pato megru tỉnh Bình Phước, dom adei lac F2 meyah oh caong pakacah palih ruah tame sang bac chuyen ye brei pasang iek tui bruk ba tabiak  piah tame bac di dom sang bac pakat THPT tui hatai caong ka 2 hu tut angan blaoh.

Bruk oh samu gauk ka vắc-xin pacang COVID-19 ngak jeng sa “jit prong 2 gah”, ngan song dom negar  phương Tây hu khik ramik song dom negar kan kathaot  jang dok njom mbak ruak. Panuac khan hu  Tổng giám đốc gah Y tế dunya  Tê-đrốt A-đa-nôm Ghê-b rây-e-xớt (Tedros Adhanom Ghebreyesus) batabiak harei kabroi , gam song panuac ieu klah rabha dom mbang klauk jru pacang COVID-19. Tui urang dang akaok jabat y tế Liên hợp quốc, 6 bilan meng di tuk  vắc-xin COVID-19 camereip hu pandar, dom negar duah hu jien glong hu klauk jiak  44% tanut di dunya dut song  0,4% di dom negar duah hu jien takik. Song bruk njauk duh hatai lac bruk oh samu gauk ni oh salih hagait dalam rilo bilan.

Dom urang ngak praong di Trung Quốc birau brei thau, bruk pamaong tal di taneh ia ini nan lac brei klauk jru vaccine Covid-19 ka takik abih lac 70% bhap bini dalam angan brei klauk jru di puac thun ini. Ini lac mbang akok meti Trung Quốc brei thau tukvak klauk jru di taneh ia nyu. Hu thau, Trung Quốc daok ngak iek 21 janih vaccine Covid-19, 4 janih dalam dom vaccine nan hu ba tabiak pablei di darak pasar hu điều kiện, 3 janih hu mbaoh harak brei pandar chip dalam taneh ia saong 8 janih karei hu brei ba tame pandar klauk iek di manuac tukvak ka III di negar langiu.

Dom ngoại trưởng ASEAN hu panuac ieu karja Myanmar padeih tong paoh  song ngak tui thỏa thuận hu njauk gauk blaoh di bilan 4. Panuac ieu hu batabiak tapen di nyaom biai urang pakat glong  ASEAN - Trung Quốc, dalam tuk karja bol bala Myanmar ka oh ngak hu rilo dom bruk tui thỏa thuận ni.Myanmar laik tame  srau kadau meng akaok bilan 2, hadei di tuk bol bala chap muk Suu Kyi song pajleik karja  dân sự, kayua hu panuac lac paleik saleik  bầu cử di bilan  11/2020 oh hu langyah. Bruk ni ngak rah tabiak dom mbang trun jalan dalam negar ngak ka yaok rituh urang metai, gah kinh tế jaleik song ba tal bruk  urang nduac klaak taneh ia dak harei dak tagok./.

Urang lang: H.Pha – A.Nghiem - 8/6/2021