Rilo sang bac di rilo tỉnh ban hu ba bruk pato caluai ia ka anek saih 

Thun 2019, dalam taneh ia hu labaih 2.000 uraniah metai mblung ia, glaong di abih dalam dom bala di uraniah saong Việt Nam lac taneh ia hu uraniah metai mblung ia glaong abih Đông Nam Á. Ini lac bruk brei thau di nyaom biai “Patagok dom jalan tacei pato pathau khan pacang caga mblung ia di uraniah” kayua mBan Tuyên giáo pambuak bruk haong Mintr LĐTB saong XH peih tabiak tuk mesup ini (15/12) di Hà Nội. Urang dalam nyaom biai hu khan brei thau rilo ilamu, jalan pato caluai siam mekre salamat ka uraniah, daong dom sang saong bhap bini ilamu pasang iek uranaih. Saong daok ndom lac, yaok baoh sang brei hu jalan khik iek anek bhik saong karja palei brei tacei pato kajap jang bruk pacang caga mblung ia di uraniah.

Tui Cục jien je Bình Thuận, tamat thun 2020, tui kuhria jien je mek tame di tỉnh lac labaih 10.050 tỷ đồng, samu 94% bruk ba tabiak dalam thun, ngan haong  bruk trun rilo abih lac 700 tỷ đồng. Mayah kaok jien mek tame meng menyek saong xuất nhập khẩu ye gah jien je tỉnhngak hu salah jalan ba tabiak di dalam thun, min maong gah jien mek tame ye oh ginup, kayua jit Covid-19 ngak kan kandah biak praong tal bruk pablei salih. Kuhria tal puac bilan 10/2020, jien je daok tavak di tỉnh Bình Thuận lac labaih 1.000 tỷ đồng. Dom labik tavak jien je labaih 90 harei njauk peih bruk cưỡng chế tui njauk adat.

Harei 15/12, lambaok Thanh tra tỉnh Bình Dương brei thau, Thanh tra rajaei hu peih bruk pasang iek thun 2020 di dalam tỉnh. Dom asal kadha pasang iek lac: langyah do yak bak, pacang caga tham nhũng (tukvak meng thun 2014 tal thun 2019); khik ramik, pandar taneh riya (meng thun 2012 tal 2019); khik ramik bruk buh jien tame padang ngak saong dom danak dak tui Sarak 116 thun 2019 di  Rajaei (meng thun 2011 tal 2019)…gam haong nan, peih pasang iek salih bruk pandar taneh meng ngak mbang pablei salih di doanh nghiệp karja, DN cổ phần hóa tapa pablei salih taneh, padang ngak sang di tukvak 2011- 2019 di Bình Dương.

Sở jalan mbak Bến Tre brei thau, phà Rạch Miễu meda nduac dahlau Tết thun anek sak kubao 2021. Urak ni jalan trun phà di gah Bến Tre, yaom jien ngak labaih 30 tỷ daok hu ngak jaik salah.Hạng mục mblang phà yaom jien labaih 70 tỷ đồng jeng daok hu samar drak peih ngak. Mblang phà pambuak jalan roya 57B gah Bến Tre saong jalan tỉnh 864gah Tiền Giang.Tuk ba tame nduac, phà oh mek jien  radaih mac saong urang nao takai. Dom sruh radaih karei mek jien meng 20.000-140.000 đồng sa mbang nao.

Dah page ini, ong Nguyễn Văn Long, umo 50 thun, palei daok di Long An, gam haong diuk peih ghe pajeng haluk trak 45 tấn angaok kraong Sài Gòn, meng gah tatua Bình Triệu mai Củ Chi. Tuk nao tal jaik takai tatua Bình Phước, phường An Phú Đông, quận 12, ghe paoh tame sà lan daok peih cagar veik. Sruh ghe kram, 2 diuk pasang laik trun kraong. Ong Long caluai hu tame gah, daok diuk di ong kateng lahik. Tui lambaok CSGT jalan ia, labik jaik takai tatua lac labik cua di kraong, tuk peih mai tal ini langik sup, urang peih ghe meda kurang maong iek.

Jit praong Covid-19 di dunya jeng daok rahtabiak sarau kadhau ngan haong labaih mateh triệu urang njom bahrau dalam 24 maong tapa. Urak ni dom mbang vaccine camriep hu klauk di dom negar, min bahrau brei ka dom kapul urang njauk klauk dahlau di abih. Harei kabroi, Mỹ hu peih bruk klauk jru vắc-xin kayua hãng jru Pfizer (Mỹ) saong gah pambuak bruk lac BioNTech (Đức) pambuak gauk ngak tabiak. Rajaei Anh brei thau, meng harei 16/12,labaih 34 triệu urang njauk ba tagok tanut paatah di gauk tagok pakat 3, lac pakat glaong abih, kayua dom urang njom tagok khang. Séc jeng brei tagok tanut kan kandah di Covid-19 tagok pakat 4 di dalam negar, gam tui di nan jeng ngak catang dom jalan patakik meng harei 18/12. 

Harei ini (15/12), Triều Tiên hu blei vắc-xin Sputnik V di Nga saong jamriak dut iek njom SARS-CoV-2 di Trung Quốc. jamriak duk pandiak rup pabhap hu Triều Tiên brei caik di labik tapen negar haong Trung Quốc piah pambuak veik bruk pablei salih nao mai di dua gah. Hu tghau, Triều Tiên oh ka hu urang halei njom SARS-CoV-2. Meng tuk jit ruak tamuh tabiak, taneh ia ini hu ngak dom bruk samar drah, yau ye kreik pabah mbang negar, kreik pabah mbang sang bac saong brei takik ngak dom bruk karei di dalam taneh ia.

Rajaei Singapore meda padang 1 “baoh blung rivang main” bahrau meng akaok thun 2021, hu  giới hạn manuac, daong ka dom doanh nhân saong tuai rivang main meda ba mai kein laba kinh tế glaong meng dom taneh ia di dunya. Tuai hu tukvak daok katut harei glaong abih lac 14 harei meda nao tal Singapore meng puac bilan 1/2021, min jeng njauk ngak tui adat pasang iek prein yava khang kajap saong tuk taom gaok rahra pak ni meda njauk brei pacang cakak meng tapar.Adal kadha di “baoh blung rivang main” bahrau meda hu yaih khan dalam tukvak anak tal./.

  Urang lang: Thu Thảo -Mousaphuong -15/12 - 19:00