\

Bà Rịa Vũng Tàu hu labaih 75 tỷ đồng tagok jang 15 mbang dut song thun 1992

Tukvak 22 tuk 55 minit, harei 29/12, Ban Khik iek danak dak dom cong trình điện bhum kreh negar (CPMB) pambuak saong dom gah pambuak tal pambuak điện mac biến áp AT1 gam haong dom mac jamraih di Balai biến áp 220 Kv Lạng Sơn. Meng bruk nan, abih 63 tỉnh, ban dalam negar hu pandar điện negar. Danak dak hu padang ngak di xã Phú Xá, huyen Cao Lộc, tỉnh Lạng Sơn. Danak dak hu phun jien buh tame ngak abih tih labaih 240 tỷ đồng, kayua Tổng công ty Truyền tải điện Negar (EVNNPT) ngak po. Danak dak ngak salah piah taduan meneing công suất meng sang mac thủy điện Nho Quế; pabak  prein khang ba điện ka tỉnh Lạng Sơn saong labik jaik taphia; pambuak tame talei ba điện dalam bhum, patagok bruk salamat, jia tame saong meda brei pabak điện ka bhum barak di gah Barak negar.

Thun 2021, abih tih jien mek tame kadung jien karja dalam tỉnh Bà Rịa – Vũng Tàu hu 75.163 tỷ đồng (rilo jang 15 mbang duk haong thun 1992); gam haong nan, brei ramik veik bruk mek tame kadung jien karja tui jalan khang kajap jang, jien mek tame kadung jien karja dalam taneh ia hu 35.705 tỷ đồng, meng pablei tabiak negar langiu saong blei tame taneh ia lac 19.058 tỷ đồng, samu 108,28% kuhria mboh dahlau saong samu 109,41% duk haong thun 2020. Jien mek tame kadung jien karja dalam taneh ia dak harei dak glaong brei mboh bruk tani tanat saong patagok khang kajap di labik mek jien tame. Gam haong nan, bruk jien mek tame kadung jien karja tagok glaong hu daong patagok jien buh tame cakrok, rik daong praong ka bruk peih ngak hu jayah bruk patagok KTXH di tỉnh. 

Melam 29/12, 48 urang naih gheih hu pok meyaom di var pataom iek peih ngak bruk “Urang anek salut mbut” thun 2021 kayua Kapol Urang kumei pambuak saong Kapol dam dara Viet Nam di Ban raya HCM peih tabiak. 48 urang hu meyaom  lac dom urang naih gheih hu palih ruah meng 3.569 urang naih ghieh di 21 quận, huyện saong Ban Thủ Đức. Nan lac dom Urang đoàn dam dara saong urang di Kapol Urang kumei pakat phườngsang kan kandah, min kham merat yam tapa, piah ngak siam bruk raong, sangka iek maik ame, njauk lac anek slut mbut, metau kumei, metau likei thau kaok thau iku, gam abih hatai ngak bruk daong ka bhap bini, rik prein daong padang raidiuk ilamu di labik daok.

Harei 29/12, Kadung jien ngak pahla Kim Oanh (di Tập đoàn địa ốc Kim Oanh) hu nao tal tỉnh Thừa Thiên Huế alin hadiah jru, pandap y tế saong pandap mbang menyum piah daong ka tỉnh pacang caga jit COVID-19, kuhria tui yaom jien lac jaik 4 tỷ đồng. Dalam mbang ini, Kadung jien ngak pahla Kim Oanh hu payua alin hadiah ka bhap bini tỉnh Thừa Thiên Huế  4.700 pok jru taong ruak COVID-19, yaok pluh rabau pandap y tế, jamriak mac moc, oxy haong labaih 100 tấn brah. Dom pok jru, pandap mbang hu ba tal yaok puk palei piah daong ka dom urang kan kandah, urang taha daok sa drei saong urang ngak lahik bruk ngak kayua jit praong. Dom pandap y tế hu payua tal sang iek ruak, pasak y tế haong dom kapul y tế lưu nao mai dalam tỉnh. Jeng dalam harei 29/12, Kadung jien ngak pahla Kim Oanh daok hu alin brah saong jien daong ka 200 baoh baha, tự viện. Langiu di nan, Kadung jien jeng hu brei 1.500 pok pandap lac brah saong jien mbaok piah daong ka bhap bini huyện Phú Vang yam tapa kan kandah hadei meng kan kandah di COVID-19 gam haong hajan rabuk dui atah.

Angan “Kumei doanh nhân Viet Nam naih gheih - Cúp bingu Hồng Ameh" hu alin ka 60 urang kumei daonh nhân naih gheih dalam thun ini, piah pok meyaom dom urang kumei doanh nhân naih gheih, oh padeih kham merat, thau kuhria dahlau, khang hatai duah dom jalan langyah, ngak randap saong yam tapa kan kandah, glaih glar, cak rok patagok khang kajap. Meng nan hu dom bruk rik tame hu makna biak praong dalam ka bruk cak rok patagok kinh te- xa hoi di taneh ia dalam tuk jit ruak Covid-19 pambak praong.

Bruk nao mai praong tuk akaok thun 2022 di Trung Quốc hu kuhria mboh dahlau lac biak rilo duk haong thun 2021 saong meda tapa tanut 1 tỷ 480 triệu mbang tuai di thun 2020. Tui panuac khan di Mintri jalan mbak Pajeng ba Trung Quốc harei (29/12), mbang nao mai tabung glaong dahlau di Tết thun 2022 meda dui atah 40 harei, meng 17/1 tal 25/2. Meyah tuai nao mai dahlau Tết Nguyên đán meda tagok khang, ye dom menuac nao mai dalam tuk Tết Dương lịch di taneh ia ini trun hasit duk haong thun blaoh, tui kuhrai lac labaih 80 triệu mbang.

Anak thun birau 2022 jaik tal,  Indonesia tabiak adat giới nghiêm di dom labik pataom ralo menuac uan raok thun birau piah pacang caga jit ruak njom mbak, abih di nyu lac dalam tuk biến thể Omicron tagok rilo. Di ban ine Jakarta hu 10 labik brei giới nghiêm meng mong 10 melam 31/12. Tui nan, dom labik ini brei kareik pabah mbang saong parabha jalan tame tabiak, oh brei nao tapa dom labik nan.

Lac labik pandiak ka jit Covid-19dahlau daih, min Nam Mỹ dalam dom bilan jaik di ini, daok lac labik hadah ka bruk klauk vắcxin caga COVID-19.  Nam Mỹ urak ini lac bhum taneh hu klauk vaccine rilo abih di dunya, haong 63% dom urang praong hu klauk vắcxin ginup. Châu Âu dang dhi 2 haong 60,4%, dalam tuk di châu Phi bahrau hu 8,6%. Dom menuac metai jeng trun khang di Mỹ Latinh, yaok harei tok hu hasit duk haong Mỹ saong Châu Âu./.

Urang lang: Ái Nghiêm- Mousaphuong- 30/12