Yang Mau lac palei hu ralo urang Cam daok di xã Hàm Trí, huyện Hàm Thuận Bắc, tỉnh Bình Thuận. Meng tuk peih bruk “Taong abih bhap bani gul pataom dak padang rai diuk ilamo” pambuak pagm haong bruk “Rik pren padang ngak palei pala bahrau” mikva urang Cam di labik ini kham merat khai thác saong patagok dom pren khang, dom siam lagaih ka taneh riya, thủy lợi piah cakrok patagok kinh tế paglaong rai diuk. Mbaok meta palei Yang Mau hu ralo salih bahrau.

Mong mboh akaok meti tuk mai veik palei Cam Yang Mau harei ini nan lac dom kết cấu hạ tầng palei pala dak harei dak siam jang, pabak biak siam bruk nao mai, ngak mbang ngak huak di bhap bani. Rah tui jalan tuh menyek lac jalan điện hu padang ngak khang kajap pablak haong sambo hijao di dom bein thanh long, brei mboh bruk jak jeng meng kham merat ngak bruk dalam dom thun tapa di bhap bani Cam pak ini. Dom baoh sang kiak bahrau hu padang tagok salih ka dom baoh sang daning haluk taik tahak dahlau diah yau brei mboh ka rai diuk trei sil, sron mbon salamat di mikva Cam. Dalam dom thun tapa, ngak tui jalan Karja saong bhap bani pambuak gauk ngak, dom jalan mbak nao mai dalam palei Yang Mau yau jalan palei Lâm Giang - Tổ 8 palei Phú Hòa atah 1.490m; tổ 3 – baha Giang Mâu - Lâm Thành atah 1.660m hu tuh menyek blaoh, ngak bahrau cống Tàu Quan saong 150 mét jalan nội đồng Xóm Kho; pasiam veik sang ilamo palei saong dom công trình phúc lợi karei ngan haong yaom jien labaih 7 tỷ đồng…

Hu jalan duan siam mekre hacih sa-at yau harei ini, langiu phun jien buh tame di Karja, njauk ndom tal bruk rik daong pren yava jien padai di mikva Cam palei ini piah paglaong, pasiam saong ngak veik jalan duan nao mai dalam palei. Abih du nyu nan lac bruk padang ngak hệ thống menyek chiếu hadah angaok dom canah jalan. Ong Bùi Ngọc Tuấn – Akaok UB bhap bani xã Hàm Trí, huyện Hàm Thuận Bắc, tỉnh Bình Thuận brei thau: Labaih 4 thun peih bruk padang ngak palei pala bahrau, bhap bani Cam dreipachreih tui biak rilo. Yau ye sang amuk Thông Thị Hà alin brei labaih 800 mét vuông taneh piah ngak jalan bê tông xi măng, patui di nan lac sang amuk Mã Thị Ngân alin brei labaih 500 mét vuông taneh piah peih prong mblang kabo palei Yang Mau. Taphia di nan mikva daok rik daong labaih 200 triệu đồng piah ngak paga taneh kubo. Urak ini baoh sang ginup, meda pak palei Yang Mau biak ralo.

Meng sa palei Cam kan thaot, rambah rambup, hu bruk sangka di Đảng, Karja saong dom pakat, dom ngành, gam haong bruk kham merat yam tagok di mikva, tal harei ini rai diuk di mikva labik ini hu salih bahrau. Bruk tok thau ngak padai hu tah klaak, bruk jah tak glai ngak apuh oh daok. Bhap bani labik ini thau pandar ilamo khoa học kỹ thuật, pala pablak janih phun pala lagaih piah patagok kinh tế baoh sang.

Oh lac tok thau ndam gam haong hamu taneh, danao kavei palei piah ngak mbang, urang Cam labik ini daok thau nao tal dom khu công nghiệp piah ngak công nhân ngan haong yaom jien bilan meng 4 trieu meteh tal 5 triệu đồng sa bilan. Meng nan rai diuk di mikva hu salih bahrau, baoh sang kathaot trun daok 24 baoh, meblah 6,5% taong abih baoh sang di palei. Tukvak tapa, dalam palei padang ngak hu 34 bao sang anit ranam, patagok baoh sang khang kajap tal 90%; hu 90% baoh sang hu tivi; 85% baoh sang hu radaih patuh; 2 baoh sang hu radaih tải; jaik abih bhap bani labik ini hu pandar điện lưới negar; taong abih dom baoh sang hu pandar aiai hacih; 91% baoh sang hu  jaman hacih.

Mai tal palei Cam Yang Mau urak ini, oh lac tok mboh bruk ngak mbang ngak huak di mikva cakrok patagok bo daok mboh mbaok meta palei pala hu salih bahrau, trình độ dân trí hu patagok. Yaom lac oh njauk  tết di urang Cam, min tuk thun bahrau mai, Tết tal, mikva urang Cam labik ini jeng blei dom janih pandap panda, kaya mbang piah uan raok Tết, kadha bo dahlau diah oh mboh…

Mbaok meta palei Cam Yang Mau dak harei dak salih bahrau, rai diuk di mikva dak harei dak tagok, ngak ka bruk uan raok Tết, ma-in Xuân di bhap bani labik ini biak chreih chai bui sambai yau brei mboh sa rai diuk bahrau daok mai tal palei Cam Yang Mau./.