Bhap bini Chăm di tỉnh AG urak ni hu labaih 15.000 urang, dok di dom huyện An Phú, Châu Phú, Châu Thành, ban sit Tân Châu song ban sit Long Xuyên. Dalam dom thun tapa, hu bruk sangka di Đảng song karja, rai duik di mik va hu salih bahrau saong dak harei dak tagok. Langiu di bruk ngak nong, pablei salih sit, urang Chăm di labik ni dok khik hu bruk menyim khan bai hu meng lavik saman. Yaom lac harei ni bruk ngak ni oh daok tagok khang yau dahlau deih, min jeng dok hu rilo boh sang cong khik hu bruk ngak meng kan di bangsa drei. Dalam saman meriak gauk di KT darak pasa, ni jeng lac sa bruk njauk iek praong,  pok paglaong.

Dalam dom thun 1978-1992, di xã Châu Phong, ban sit Tân Châu hu labaih 500 sang menyim khan bai, rilo meng menyim khan sarong, khan meom, muat, kadung ndung bak ilamu di urang Chăm gah merong. Dalam tuk nan, pandap di palei ngak Châu Phong  hu rilo urang thau tal song hu pablei tapa dom taneh ia yau Malaysia, Indonesia song Campuchia. Mbiah tal thun 1999, kayua darak pasa kan kandah, rilo sang salih tapa bruk ngak karei, nan ye palei ngak khan bai meng kan daok lahik nao. Urak ni, daok hu 2 boh sang dok ngak tui jalan du lịch Home stay pambuak song pasak Thông tin Du lịch cộng đồng di xã, ba dom kapul nyaom, tuai damuai dok dalam song langiu negar mai rivang song duah thau ilamu di urang Chăm.    

Dalam dom harei akaok thun bahrau anek sak pabe ni, palei Chăm biak chreih chrai tuk sa harei taduan raok meng 2 tal 4 kapul tuai damuai mai rivang. Meng nan nyu dong ka rilo dam dara hu bruk ngak mbang, paglaong ilamu ndom puac sap negar lingiu. Taphia di nan, hu bruk dong ba meng Kapul urang nong tỉnh An Giang song Sở du lịch tỉnh, mô hình Home stay hu ba tame ngak ngak, daong ka palei ngak dak harei dak tagok. Saai Nguyễn Thị Trúc Nguyên, akaok Kapul urang nong xã Châu Phong brei thau: Anak tal jak ba mikva padang gian hàng tanek mbang, pathau khan angaok mạng ka tuai damuai thau piah đặt tour, parang me-in dom kadha doh tamia,, padang kapul radeih “xe lôi” ba tuai nao rivang dom sang megris, dom baoh boh baha. Taphia di nan, padang sang home stay piah duh ka tuai damuai.

 Dom kapul tuai damuai mai rivang palei menyim khan bai mboh biak takre tuk hu thau ka rai duik, bruk ngak mbang, ngak huak, adat cambat tanarakum di urang Chăm. Pasak Thông tin Du lịch cộng đồng Châu Phong jeng hu tacei ba tuai damuai nao rivang sang megris Islam, baha klak Châu Phong, dom boh sang Chăm klak.. song hu mbaok tame dom bruk sinh hoạt ilamu hong mik va Chăm. Hu thau meng tuk hu tour du lịch ni, rilo boh sang di labik ni duah hu jien meng bruk pablei ka taui damuai dom pandap mbang, dom janih har meng kan, abih di nyu nan lac tung limo, sa janih pandap mbang meng kan hu rilo urang thau tal.

Rilo tuia damuai mai tal labik ni brei thau biak pachreih hatai dalam tuk langik tasik li-an bingi di dom harei akaok thun bahrau, yam takai nao di angaok jalan palei hacih saat song 2 gah jalan nan lac sang tual hu ngak meng kayau tui kiến trúc meng kan di urang Chăm bhum merong negar. Menuac sia di labik ni thei jeng slut mbut song rap an tuai damuai. Bruk biak chreih hatai nan lac hu mong iek dom sang megik biak mekre, hu tabung gul glaong đặc trưng di sang megik Islam, dom bảng hiệu cih meng haroh Chăm dak ngak ka palei Chăm ndung bak ilamu Chăm. Saai Amina po labik pablei har meng kan di  xã Châu Phong, ban sit Tân Châu brei thau.

Urak ni, dalam tỉnh AG hu 33 palei ngak tiểu thủ công, 49 nghề tiểu thủ công nghiệp, ba bruk ngak ka labaih 18.300 urang. Tỉnh hu dong patagok bruk ngak tui danak dak pakat negar padang ngak palei pala bahrau dalam 3 thun (2011-2013) ngan song yaom jien 1 tỷ 400 triệu đồng brei ka dom palei menyim khan bai di urang Chăm dok di xã Châu Phong song mik va urang Khmer dok di Văn Giáo huyện Tri Tôn blei pandap panda trang thiết bị ngak mbang. Sa-ai Su Ka Ry, Phó Chánh Văn phòng Ban Dân tộc tỉnh An Giang lac.

Bruk padang ngak palei pala bahrau daok peih tabiak jalan ka dom palei ngak di An Giang pakhang patagok veik bruk ngak. Yaom lac dalam tukvak mbeik drei tame dunya song patagok, dalam darak pasa harei ni, urang menyim khan bai dok rilo kan kandah, glaih glar min tuk tết tal mai, dom pandap menyim di urang hu mong yau dom pandap piah alin hadiah di tuk thun bahrau… Thun bahrau tuk halei jeng ba mai hatai jia bahrau ka palei menyim khan bai. Mikva di labik ni cong khin karja palei hu rilo sarak dong ba siam lagaih piah ka urang palei menyim khan bai gam ngak kaya hu meng bruk ngak meng kan di drei, gam patagok hu ilamu gheih mekre hu meng lavik saman, rik dong ka puk palei ngak jeng sa thun bahrau trei sil saong haniem phol./.