Thei hu mbang nao tale tỉnh Bình Thuận,  jeng thau tal Pasak parang iek ilamo Cam Bắc Bình. Labik ini yaom lac sit, min hu kiến trúc biak karei saong sa sang parang iek daok khik piah yaok rituh pandap panda, tư liệu hu yaom, ndung bak ilamo Cam meng kan. Dalam tuk tết Mậu Tuất ini, pak ini hu peih ngak ralo bruk ilamo daoh tamia, ma-in padhih chreih chrai gam haong dom tuor du lịch piah ka tuai damuai, mikva urang Cam mai ma-in, giải trí, hadei di sa thun ngak bruk glaih glar.

  Mai tal pasak dalam dom harei tết nguyên đán Mậu Tuất 2018, khaol dahlak mboh biak tatuak drei kayua bruk uan raok tết biak praong meng bruk ramik pasiam trụ sở tal bruk parang iek dom janih pandap daok khik piah. Yam tame sang parang iek lac dom tủ kareih hu caik dom janih pandap, tu liệu tui asal kadha biak tani tanat. Kadha njauk ndom tal nan lac dom janih pandap hu duah pataom meng saman  Cam meng kan yau: nữ trang di urang kamei Cam; panyin, jaluk, buk caik tapai hu ngak meng gốm, sứ, lan am – hu pandar yaok harei di urang Cam; atau dom rup patau, phù điêu di dom saman patao bia Champa...

Lingiu di parang iek, meyaih khan dom janih pandap, tư liệu di urang meng kan, di pasak daok hu danak dak “Uan Đảng – Uan thun bahrau” ngan haong dom asal kadha biak chreih chrai yau: Melam daoh tamia “Uan Đảng – Uan thun bahrau Mậu Tuất 2018”; Nyaom pakacah menyim jih dalah Cam; parang iek ilamu ngak lam am, meyaih khan dom pandap mbang huak di puk palei; harei nyaom daoh tamia saong parang iek khan ao ngan haong kadha “Giai điệu mùa xuân”… Taom gaok khaol dahlak, amuk Lư Thái Tuyên, Phaok akaok pasak parang iek ilamo Cam Bắc Bình bui sambai khan lac: kadha praong abih njauk ndom tal dalam tuk tết thun ini lac bruk pambuak 4 bangsa adei sa-ai lac: Yuan, Chăm, Raglai saong Hoa di huyện Bắc Bình saong mikva Cam mai meng Ninh Thuận. Meng nan, ngak jeng bruk uan raok tết bui sambai, chreih chai ka bhap bani puk palei. 

Tết ini, sa-ai Nguyễn Thị Mai daok di palei Bình Đức, huyện Bắc Bình mboh bui sambai jang biak rilo, kayua sa-ai hu pasak palih ruah piah hu mbaok tame bruk meyaih khan pandap mbang di urang Cam. Dalam chreih chrai nan, sa-ai Mai jeng oh van caik tukvak palih ruah, pataom veik dom ilamu, jalan ngak pandap mbang bingi dalam bhap bani Cam piah ba tabiak ngak dalam harei tết ini piah meyaih khan dom janih pandap mbang bingi di bangsa Cam tal tuai damuai daok dalam saong langiu puk palei.

  Jeng yau sa-ai Nguyễn Thị Mai, amuk Lâm Thị Phi Thúy – Akaok đoàn nghệ thuật Chăm huyện Bắc Bình jeng chreih chai bui sambai dalam tuk tết ini. Kayua lac, tapa ini, amuk saong dom ayut sahabat di drei hu padang ngak yaok pluh kadha daoh tamia piah rik daong tame harei pataom daoh tamia ngan haong kadha “Giai điệu mùa xuân” kayua pasak parang iek ilamo Cam peih ngak… dalam nan hu: tamia meng kan di urang Cam, daoh ragu bhap bani Cam, gam haong dom kadha daoh pok meyaom Đảng, Wa Hồ saong bruk gheih mekre di bilan xuân… Kadha njauk ndom tal di danak dak nan lac, dom urang daoh tamia nan lac dom urang oh chuyên, dom adei anek saih mai meng dom klup kapul, tổ văn nghệ di dom sang bac, dom puk palei dalam huyện Bắc Bình.

Sa kadha bahrau tra dalam bruk uan thun bahrau bui raok tết di pasak parang iek ilamo Cam Bắc Bình nan lac: Pasak hu pambuak haong dom công ty lữ hành, công ty du lịch saong Sở Ilamo, padhih saong rivang ma-in tỉnh Bình Thuận peih dom tour nao rivang iek sang parang pandap panda di pasak; pambuak haong dom tour rivang dom inem mek Cam dalam huyện Bắc Bình… brei ka tuai damuai daok dalam saong langiu negar tuk mai tal Bình Thuận. Tapa nan, daong ka tuai damuai hu thau rilo jang ka inem mek ilamo di urang Cam, hu mboh tapa ralo gah yau: daoh, tamia, adat cambat tanarakun…

Sap yava chreih chai di Ginăng, Baranưng saong Saranai yau brei mboh sa thun bahrau mai veik haong Pasak parang iek ilamo Cam Bắc Bình gam haong dom hatai jia tame dom siam mekre bahrau dalam harei hadei./.