Pathau mikva saong taong abih gauk!

Hu sa bhum taneh hu rilo sajarah dak rai ilamu, hu angan saong bruk menyim khan bai meng lavik saman daok khik kajap mbiah tal harei ini. Bhum taneh nan lac palei Chăm Mỹ Nghiệp hu iek lac palei menyim meng kan duy nhất daok veik di urang Chăm daok di Ninh Thuận saong lac palei ngak klak di abih dalam bhum Đông Nam Á. Hồng Hải, urang vak di rayo sap ndom VN daok di ban raya HCM hu kadha vak ndom ka palei ngak hadah krah ini.

Palei Chăm Mỹ Nghiệp, sap Chăm ieu lac Ca Klaing daok tapen kraong Lu salut mbuat, atah di ban sit Phan Rang – Tháp Chàm jaik 10 km mai gah meraong tui jalan roya 1A. Saman dahlau, palei Mỹ Nghiệp daok dalam xã Phước Dân, huyện Ninh Phước, tapa tukvak salih angan, urak ini jeng khu phố Mỹ Nghiệp atau daok ieu lac khu phố 11 daok dalam ban sit Phước Dân.

Mai palei Mỹ Nghiệp dalam dom harei ini, mboh langik daok tame bilan xuân, hu hajan sit yau parah dom asal pariak sit tagok dom tabung bimaong Chăm, tagok dom baoh sang dalam palei Chăm meng kan, ngak ka Mỹ Nghiệp siam gam dalam hajan.

Yaom lac hu tagok jeng phố, jeng phường, Mỹ Nghiệp jeng daok khik tamo mbaok meta di sa palei meng kan, hu bein phun kayau, hamu padai saong baoh sang klak. Sa bhum taneh samu tapen tasik, taphia ceik Trà Bang di gah meraong, nyu hu kraong Lu meng dom saman ini mai ba phù sa ngak ka palei hu jeng sa labik taneh mbuan lagaih, oh lac patagok hu bruk pala drak bo daok tamuh tabiak bruk ngak lan am, menyim khan bai hu angan di urang Chăm. Urak ini, bruk menyim khan bai hu padang ngak veik, daok pachreih hu ralo urang ngak hu mbaok tame, ngak tabiak dom pandap panda hu yaom glaong hu tuai damuai daok dalam saong lingiu taneh ia takre.

Taom gaok ong Phú Văn Ngòi, urang pan akaok khu phố Mỹ Nghiệp di sang parang iek pandap saong parang iek bruk ngak daok di kreh palei, công trình barau hu karja tỉnh Ninh Thuận buh jien tame padang ngak piah rik daong khik ramik, patagok palei ngak meng kan bangsa Chăm, ong bui sambai khan brei thau: bruk menyim khan bai di labik ini hu meng sa ribau thun, tui dalikan kayua Po ine negar di urang Chăm pato veik ka bhap bini palei Ca Klaing meng kan (nan lac palei Mỹ Nghiệp harei ini). Bruk menyim hu iek lac tanut tuk taong yaom ka urang kamei naih gheih. Ariya klak urang Chăm hu labik vak lac: “urang kamei brei khik sang, hava mbang urang klao brei, megru menyim tanyiak tro merai”. Saman dahlau, bhap bini Mỹ Nghiệp eng drei pala phun kapah saong raong tằm piah ngak jeng merai menyim khan pablei ka bhap bini urang Chăm saong dom menuac sia daok jaik nan yau Raglai, Churu, Ê đê. Urak ini bruk pala phun kapah, raong tằm lahik nao, pandap menyim tanyiak hu salih tapa merai công nghiệp. Min bruk  menyim saong ngak jeng bingu la angaok tanyiak jeng daok khik yau tamo dom công đoạn saman ong muk kei, khik hu ilamu Chăm saong bruk ini pachreih hu tuai damuai: “Pandap khan bai Chăm dahlau daih ngak tabiak tok di brei ka bruk sinh hoạt dalam bhap bini, hadei di ini Đảng saong karja sangka buh jien tame labaih 11 tỷ đồng piah padang ngak sang parang iek. Meng nan hu daong ka mikva xã viên rik phun jien gam saong gauk padang HTX khan bai Chăm Mỹ Nghiệp. Meng sa pandap brei ka bruk sinh hoạt bhap bini urak ini jeng pandap panda nan lac bruk bo mikva di labik ini biak chreih chrai. Kol dahlak jeng caong khin karja patui buh jien tame yaih khan dom pandap di HTX tal grap labik dalam taneh ia jeng yau negar lingiu”.

Biak takre tuk hu mboh bruk ngak tapen kik menyim di dom nghệ nhân dalam palei ngak. Urang samar tangin samar meta “sring merai, cuk cako”, lai sambo, jan tanyiak piah ngak jeng dom blah khan bai hadah hadai ralo bingu la di ilamu Chăm. Langiu di bingu la biak karei ka  khan bai yau: bingu cim athur, bingu hala cách điệu, daok hu biak ralo bingu la biểu tượng di bangsa Chăm biak mekre yau: daok ieu lac bingu tamun, bingu hăng, bingu takay wa, bingu asar padai ndaih, bingu hala bồ đề… Tapa nan yau khin payua hatai sahneng, bruk anit ranam saong caong khin di urang Chăm hu sa rai diuk sron mbon, trei sil. Saai Văn Thị Bạch, sa nghệ nhân lavik thun di palei ngak brei thau: “Piah menyim hu 100 mét bingu la ini ye brei lahik sa bilan, kayua yaok harei kik ini drei tok di menyim hu 4 mét. Janih bingu la ini sap Chăm ieu lac Meta menuk hu jhik jeng ralo pandap karei di gauk yau kadung bak, mbop, cà vạt, ao… Dahlak hu ngak bruk ini labaih 30 thun ini mai. Ini lac bruk ngak meng kan di baoh sang”.

Jeng yau dom palei ngak karei, Mỹ Nghiệp hu rah tapa dom thun bilan kan kandah, min meng hatai ranam bruk ngak saong naih gheih, dom urang jang menyim Mỹ Nghiệp jeng daok raong bruk ngak meng kan, yau khik ramik apui truac hadah niềm tin. Hangin lahei saman peih pabah mbang ngak ka pandap khan bai Mỹ Nghiệp hu par atah, piah ka tuai damuai, abih di nyu nan lac tuai damuai negar lingiu thau tal saong mboh takre. Patui hadei dom labik bhian ngak khan bai rilo, jien mek tame labaih 1 tỷ đồng yaok thun yau labik ngak khan bai di saai Thuận Thị Trụ, di ong Lưu Quý Đôn, thun 2010, HTX khan bai Mỹ Nghiệp hu padang tagok pachreih hu labaih 73 urang. Bruk rik phun jien tame ngak mbang hong gauk tui jalan darak pasar hu ba mai kein laba ka dom urang dalam HTX, pachreih urang patagok bruk sáng tạo dalam sản xuất saong pablei pandap. Dalam thun bloh, HTX ngak mbang hu ngan saong yaom jien mek tame hu jaik 600 triệu đồng. Ralo pandap di palei ngak meng cà vạt, kadung bak, mbop, áo ghi lê, ba lô tal khan, ao, xà rông, khan lang bàn, khan lang gaiy… hu parang tabiak di dom mbang parang iek, dom nyaom darak pasar pakat dunya dalam taneh ia saong pablei tabiak châu Âu, châu Mỹ. Ong Đỗ Văn Minh, akaok liên minh HTX tỉnh Ninh Thuận mboh lac: “Urak ini, palei ngak hu thau eng drei jak ba, nao tal dom labik yaih khan pablei pandap di dom tỉnh bhum kreih negar, Tây Nguyên… Urak ini hu dhar daok di ban raya HCM. Palei ngak jeng duah hu labik pablei nan lac dom khu du lịch saong pablei tabiak negar lingiu. Dahlak jia lac palei ngak dalam tukvak anak tal meda patagok khang di darak pasar dalam taneh ia saong negar lingiu”.

Bruk hadah hadai di bruk menyim khan bai pachreh hu biak ralo urang ngak, rik daong ka bruk patruh eik patrun kathaot di puk palei. Urak ini, 95% menuac sia dalam palei diuk rai meng bruk menyim dalam nan hu biak ralo jang lavik thun, yaom glaong di bruk menyim khan bai oh lac labik halei jeng hu. Bruk praong di HTX khan bai Mỹ Nghiệp jeng lac “labik pablei tabiak”. Ngak yau habar piah “pablei hu pandap”, pasiam hu bruk trun tagok di yaom kaom, ba jien tame tani tanat ka urang jang jeng daok lac bruk pandiak di HTX jeng yau di tỉnh Ninh Thuận. Ong Hàm Minh Thiệu, Chủ nhiệm HTX khan bai Mỹ Nghiệp lac: “HTX caong khin karja ngak yau habar yaih khan rup binguk saong pandap di palei ngak tal dom labik dalam taneh ia, dom mintri ngành yau mintri công thương, mintri ilamu công nghệ, atau lac dom labik peih bruk praong yaok thun thau tal palei ngak Mỹ Nghiệp, daa dom nghệ nhân mai hu yaih khan pandap di drei. Meng nan duah labik pablei pandap di drei, hu labik pablei bloh kol dahlak meng kuhria gac jalan peih praong pandap, pasiam veik dom bingu la klak di urang Chăm, piah ngak pandap hadah krah di urang Chăm”.

Jhul pakhang jang gac bruk yaih khan, ba pandap tabiak khu vực saong dunya, duah dom labik brei  tani tanat jeng daok lac jalan nao lagaih piah ba khan bai Chăm patagok dalam tuk ini. Bruk khik ramik Mỹ Nghiệp – bruk ngak siam di palei pala nan lac oh mbuan, min piah patagok nyu daok lac kan kandah jang. Min biak uan tabuan, meng ralo thun ini mai, dom urang Chăm jang menyim daok di labik ini oh padeih kham merat ka bruk ngak siam palei drei. Sa thun barau tal mai, yau brei mboh bruk siam mekre ka palei menyim Chăm labik ini.

Likau la Mỹ Nghiệp, yau mehit tapen tanye ragu ragam saong panuac daoh krein randap harei halei “Hajan jeng daok par angaok tabung bimaong klak”, cảm khái rup binguk Chăm klak yau pacang  haluai ribau thun. Kol dahlak likau tadhau yuh ka palei menyim hadah krah ini miat miat par yava tagok sap chreih chrai di kik menyim uan rok bilan xuân./.