Thun Tra saong kadha ngak mbang di dom urang sak tra

Ba kol dahlak nao iek mo hinh ngak mbang di sang drei, ông Lư Văn Xuống daok di palei Bình Thắng, xã Phan Hòa, huyện Bắc Bình, tỉnh Bình Thuận biak bui sambai tuk beir thanh long labaih 5 ratuh got daok tabiak bingu suan bilan saong meda brei baoh di harei ia bilan bak baok bilan 2 saka ia bilan tal. Ông ndom lac, oh cang buh jien tabiak piah pagam bình hạ thế kayua yaom jien biak glaong labaih 100 triệu đồng, bo tok blei jamriak phát điện labaih 10 triệu đồng. Yaok melam ông labih labaih 100 rabau jien xăng piah peih jamriak truac gom ka thanh long. Ngan saong atneh praong labaih 2 ha, langiu 500 got thanh long, ông daok caoh jaik 1.000 mét vuông piah raong ikan kan, ikan rô phi. Saong pandar ia dalam danao ông pala 5 sào padai pablak caraih mek asar.  

Taphia beir thanh long daok hu sa trại pabe jaik 20 drei. Tui ông Xuống, bruk raong palao pabe yau dahlau thiah oh daok siam tra, kayua lingik dak harei dak pandiak bhang, hareik lingiu mbang hamu oh ginup ka tapol pabe mbang, yau nan ye ông khang hatai raong pabe palimek. Bruk raong kareik pabe piah pacang caga jit ruak. Kayua khik hu ia nan ye sang ông oh tuk halei brei ka taneh padheih, abih padai  ye tal caraih, abih caraih tal ritak…luiac thun luiac bilan, bein di sang ông tuk halei jeng hijao mekre. Ông Xuống daok brei thau lac, thun  2015, sang ông mek hu labaih 120 triệu đồng, kaoh bloh yaom jien buh tame ngak, ông daok laba hu labaih 80 triệu đồng. Urak ini, langiu bruk cai pandar ginup ka raidiuk yaok harei, sang ong hu blei ginup dom pandap piah pandar dalam sang .

Karei jang sang ông Lư Văn Xuống di xã Phan Hòa, sang amuk  Tiền Thị Hận daok di xã Phan Thanh, huyện Bắc Bình, tỉnh Bình Thuận peih bruk ngak mbang di drei meng bruk pablei lithun. Mboh drei patuah haong bruk pablei salih, amuk khang hatai mesraiy jien di gilang pariak peih bruk pablei khak drak, jru halak saong blei veik kaya nong. 

Meng sami samal saong meng angan je di drei, sang amuk Hận dak harei dak hu rilo mikva dalam xã duah mai tut angan pambuak bruk ngak mbang. Tal urak ini, sang amuk hu labaih 100 drei limo, jaik 5 ha padai yaok thun ngak 3 vụ, gam saong bruk  pablei khak, jru halak, pajaih phun pala saong abih di nyu nan lac blei veik saong chế biến kaya nong yaok thun ba mai ka sang amuk Hận labaih 150 trieu đong jien laba. Phun jien luu đong di sang amuk urak ini hu labaih 1 tỷ đồng.  Tui amuk, bruk ngak mbang tui jalan buh brei dahlauvật tư ngak nông saong phun jien ka mikva sản xuất blaoh blei veik pandap di mikva lac bruk mbuan gaok khat lihik, kayua oh hu njuak tuk hlaei mikva jeng pala drak njauk. Nan lac bruk oh mbuan ka amuk. Min, meng sami samal di drei, amuk hu ngak siam bruk ngak mbang di sang drei.

Meng bruk ngak mbang hu siam lagaih di sang drei, jia lac thun barau Bính Thân 2016 ini, sang ông Lư Văn Xuống saong sang amuk Tiền Thị Hận hu jien mek tame glaong. Saong jeng dreih yau dom urang karei, amuk Tiền Thị Hận daok caong tapa thun 2016 ini, rajaei hu dom jalan ngak barau, ngak habal ka kinh te taneh ia drei nao tagok, abih di nyu nan lac bruk ba pandap ngak nong di drei tame dalam jang, atah jang tal dom darak pasal kan tame hu di dunya. Daok ông Lư Văn Xuống brei thau, anak tal, ông meda peih praong taneh pala thanh long saong patagok tapol pabe raong palimek . 

Likau drei dom urang nong tari tarieng, kol dahlak likau tadhau yuh ka dom mo hinh ngak mbang di dom urang nan dak harei dak cakrok patagok jang./.