Dahlau deih, rilo phật tử daok di baha Cành Đa sahaneng lac, tok ba drap ar, pandap panda mai kakuh baha, pok brei ong bhik meng taduan hu siam mekre. Dok bruk xã hội, bruk dong ka urang kan kandah, nan lac bruk di karja. Min jalan sahaneng ni, harei ni hu salih karei. Thượng tọa Thạch Thảo khan lac:

 “Dahlau deih mik va oh mbak carak song bruk XH, kayua mik va sahaneng lac dong pren, dong pandap tame baha meng lac bruk hu pahla. Min tapa rilo mbang langyah, thau hu bruk dong ka menuac sia dunya di nhà phật, saong ba mik va nao taom gaok tapak dom urang kan kandah… lavik livik harei mikva thau hu bruk XH lac sa bruk ngak pahla, meng nan mik va halan hatain rik dong tuk hu urang njauk daong.         

Meng jalan ngak ni, dalam thun bloh Thượng tọa Thạch Thảojak ba hu yaok pluh boh sang ginup meda nao rivang dom urang taha, urang ruak dok sa drei saong yaom jien dong labaih 60 triệu đồng, rik pataom hu jiak 120 triệu đồng blei siphau, kalam brei ka anek saih kan kathaot nao bac daa, brei 5 boh sang ka urang kan kathaot yaom 100 triệu đồng, piah ka dom urang nan sahnang hatai, hu jalan yam tagok dalam rai duik. Amuk Kim Thị Sa Ry, sa dalam dom baoh sang hu Thượng tọa tọa Thạch Thảo dong jien ngak sang khan lac:

Drei kan oh hu phun jien, daok ong muk ruak kik gam,  boh sang ye taik tahak, mboh yau nan sư cả daong jien ngak sang. Langiu di nan, sư jeng hu brei jien, brei brah kayua ong muk ruak kik oh ngak hagait hu.    

Dalam dom mbang ndom biai ka hukum agama, Thượng tọa hu pablak dom dalikan ka jalan hadah krah di Wa Hồ song tacei tabiak dom paka dreih gauk di phật giáo song jalan ngak di Wa piah ka mik va mbuan thau song ngak tui. Oh lac hu mbaok dalam bruk ngak pahla XH. Thượng tọa daok hu pambuak bruk saong jabat ngak nong huyện Cầu kè peih 26 tal pato pasram ilamu kỹ thuật bahrau, jalan pala drak bahrau ka jiak 1.100 mbang urang hu mbaok. Meng nan, mik va Khmer di Hòa Ân urak ni klak bruk bhian randap ngak sa janih padai, salih tame nan, lac dom bruk pala drak bahrau. Amuk Phạm Thị Hồng Diễm, Bí thư xã Hòa Ân huyện Cầu Kè ndom lac:

Bruk bac megru song ngak tui jalan hadah krah siam mekre di HCM dom thun tapa ye sư cả Thạch Thảo lac sa dalam kreik camin. Gam song dom ong bhik jang yau chức sắc dalam baha rik dong padang bruk jum pataom tong abih bangsa. Abih di nyu nan lac peih ngak xã Ilamu, xã palei pala bahrau pambuak pagam saong bruk padang ngak jalan nao mai dalam palei, bloh dom jalan ngak patrun kan kathaot ye sư jeng abih hatai hu mbaok.

Meng bruk rik dong di Thượng tọa Thạch Thảo oh lac ngak ka bhum urang Khmer Hòa Ân salih bahrau meng rai duik tal jalan sahaneng bo dok ngak talei pambuak bruk di Đảng karja song urang phật tử song lac kreih camin dalam bruk bac megru song ngak tui jalan hadah krah siam mekre di HCM./.