Yau rilo amaik ame payua anek tame pasak daong patagok pato megru ba drei tame tỉnh Tiền Giang, amuk Lý Thị Thanh Thảo daok di ban sit Mỹ Tho biak druc drui tuk anek drei thau biai saong praong tagok siam yau dom uranaih karei. Amuk Thảo brei thau, anek drei meng tuk umo 3 thun nyu patrun trí nhớ, huac lac nyu njauk luac rai. Tuk ba tame pasak, dom anai gru abih hatai iek glang, pasram kỹ năng, tal urak ini nyu hu ba drei tame cộng đồng. Amuk Lý Thị Thanh Thảo iek dom gru pato labik ini lyau dom “cô tiên” hu daong ka anek dri abih ruak:

 “Dom anai gru labik ini pato gheih, anit dom kamuan lo, drei biak jia tame. Dom anai gru labik ini oh huac kan kandah ngan saong dom kamuan nan ye amaik ame halei jeng sanang hatai. Dahlau daih ba anek tame ini drei huac nyu oh pato hu, huac dom anai gru drum hu anek di drei halei oh. Urak ini anai gru halei jeng abih hatai jai, anek nyu ndom biai hu, drei uan tabuan lo”.

Tapa 20 thun padang tagok, pasak daong patagok pato megru ba drei tame Tiền Giang hu can thiệp samar saong phục hồi chức năng ka yaok ribau uranaih umo ala 5 thun njauk dom ruak bẩm sinh yau: sup meta, tangaoh, đa dị tật, ruak thiểu năng trí tuệ… Ini lac dom bruk biak kan kandah, caik ka gru pato brei hu hatai takre bruk ngak, kham merat abih drei. Kayua dom anek saih jeng ruak kik, akaok sahneng biak biar. Kayua yau nan ye, gru pato brei kham merat pato tui rilo jalan…. piah pasram ka uranaih. Gru Trần Văn Đáng, Phaok Giám đốc pasak daong patagok pato megru ba drei tame, brei thau lac:

 “Langiu can thiệp samar, pasak hu pato megru ba drei tame di dom sang bac mầm non, Tiểu học, trung học cơ sở…  di dom huyện, ban sit. Dom gru pato di pasak bhian trun cơ sở piah daong chuyên môn. Bruk pato pakai yaok thun di uranaih can thiệp samar di labik ini hu patagok cambaih laih. Iek tui janih tật saong độ tật bo dom gru pato hu bruk can thiệp pasiam veik mboh hu siam lagaih”.

. Sang bac Khuyết tật Nhân Ái lac sang back a 2 di ban sit Mỹ Tho raong pato uranaih khuyết tật. Anai Nguyễn Thị Thanh, umo 59 thun lac gru pato praong thun abih di sang bac; yaom lac tapa umo padeih hưu, min anai jeng daok pambuak saong bruk pato uranaih khuyết tật. Anai brei thau, piah pato pakai, dom gru pato jeng tapa dom khóa pasram ka pato megru đặc biệt. Dom anai  abih hatai jai, khang hatai saong bruk ngak yaom lac jien bilan takik saong oh hu mbang dom khoản trợ cấp halei yau dom sang bac công lập. Min meng hatai hu trách nhiệm, iek dom adei yau anek kamuan dalam sang nan ye kham merat raong pato dom adei biak tani tanat. Anai gru brei thau, anai kak kajap saong bruk pato uranaih khuyết tật tal tuk pren yava oh daok khang kajap.  

 “Drei mboh dom adei gah lingiu hu ginup amaik ame, hu iek glang tani tanat, daok dom adei daok dalam ini njuak khuyết tật bo amaik ame oh sangka rilo. Ka dua lac urang oh thau ngak yau habar piah pato pakai anek kamuan piah ba drei tame cộng đồng. Tuk drei tame sang bac, dom adei pambuak saong sang bac mboh amaik ame ndom lac anek dahlak thau ndom, thau chào ye drei biak sambai. Tukvak tal dahlak kham merat jang gac, mboh amaik ame ndom lac anek thau ndom, thau chào ye drei jeng mboh sambai. Anak tal dahlak kham merat ralo jang gac”.

Urak ini, sang bac Khuyết tật Nhân Ái hu labaih 100 học viên, hu 18 urang jakar saong gru pato. Lac sang bac tư thục min abih hatai duh ka XH. Dom amaik ame ba uranaih khuyết tật tame ini bac tok rik daong hasit jien mbang ka dom adei jaik 300 ribau đồng sa bilan… Dom baoh sang kan kathaot jeng hu miễn giảm. Dom adei tame ini bhian njauk ruak kamlo  tangaoh bẩm sinh, oh k aba drei tame cộng đồng.

Pato ka dom anek saih lac dom uranaih njauk ruak bẩm sinh abih di nyu nan lac kamlo, tangaoh, patrun trí tuệ ye  gru pato gaok biak ralo kan kandah. Min kayua hatai anit saong trách nhiệm di gru pato; kayua dom uranaih oh patuah, dom cei gru, anai gru pato  di pasak daong patagok pato megru ba drei tame tỉnh Tiền Giang saong sang bac khuyết tật Nhân Ái jeng abih hatai pato pakai dom adei, yau dom anek hani tari taring, patak pataom yaok tanjoh ia hani yamen piah alin ka dunya./.