Urang nong daok tame bilan paik baoh 

Xã Tam Bình, huyện Cai Lậy nan lac sa dalam dom xã hu tabiak mbaok  xã Palei pala bahrau akaok meti di tỉnh Tiền Giang. Tal urak ini, taong abih 19 tiêu chí di xã palei pala bahrau ini daok hu khik. Meng di tuk peih ngak danak dak xã palei pala bahrau, rai diuk di bhap bani hu patagok. Njauk caik hatai nan lac kinh tế meng bein durieng di bhap bani yaok thun mek hu jaik 2.400 tỷ đồng; 100% jalan mbak nao mai dalam palei, dalam xã hu tuh bê-tông, hu tuh nhựa; jien mek tame kuhria tui akaok menuac lac 55 triệu đồng/thun, labaih 40% baoh sang kaya meda, baoh sang kathaot trun daok ala 2%. Ong Ngô Tấn Lâm, urang nong daok di ấp Bình Thanh, xã Tam Bình hu jien mek tame yaok thun labaih 1 tỷ đồng meng bein phun durieng, khan lac: Xã palei pala bahrau urak ini hu mboh cambaih paje. Mbaok meta xã cakrok patagok, biak samar drah, sang danaok padang ngak siam kre. Urak ini pala phun mbang baih hu jien, nan ye manuac urang padang ngak sang danaok. Sang halei kathaot abih jeng pakat 4, oh daok sang krem la-a yau dahlau diah tra. Dahlai diah pak ini, duah sruh radaih juak mboh kan, urak ini radaih juak oh daok thei pandar, sang halei jeng hu 2-3 sruh radaih patuh. Sang halei jeng brei anek nao mbang bac abih, jalan mbak nao mai biak siam. 
Tal harei ini, dalam tỉnh Tiền Giang hu 85/144 xã hu tabiak mbaok lac xã palei pala bahrau, samu 62% dom xã dalam tỉnh, tok ta-eng thun 2019 hu 25 xã mek hu angan xã palei pala bahrau. Dom tiêu chí mek hu bình quân dalam tỉnh nan lac jaik 16 tiêu chí/xã, glaong jang dut haong kuhria rah tapa dalam bhum taneran kraong Cửu Long saong dalam negar.
Tapa nan hu daong ka tỉnh ngak hu avar jang dut haong Sarak Tỉnh ủy, Sarak Hội đồng bhap bani saong tapa chỉ tiêu Thủ tướng raja-ei jao. Tal urak ini, bruk pakacah "Tiền Giang ba gauk padang ngak palei pala bahrau" hu rah tabiak khang saong grauk labik, nao tame dalam biak biai di nyu. Tỉnh Tiền Giang hu jak ba pren khang di taong abih hệ thống chính trị saong taong abih bhap bani ba gauk tame padang ngak palei pala bahrau ngan haong jalan ngak: “padang ngak palei pala bahrau tok hu labik peih akaok, oh hu labik padeih tamat”, padang ngak palei pala bahrau mek anek manuac ngak chủ thể.
Jaik 10 thun tapa,  Tiền Giang hu jak ba pren khang piah peih ngak Danak dak padang ngak palei pala bahrau mek hu jaik 52.400 tỷ đồng;  dalam nan phun jien jak ba hu dalam bhap bani labaih 5.700 tỷ đồng. Meng danak dak ini hu mboh yaok riyuh kapul nyaom, manuac urang rik daong jien padai, pren yava piah padang ngak palei pala bahrau.
    Urak ini, dom xã mek hu angan palei pala bahrau, rai diuk di urang nong hu patagok mboh di meta. Jien mek tame kuhria rah tapa yaok urang jaik 47 triệu đồng/thun. Vĩnh Kim, huyện Châu Thành nan lac 01 dalam 10 xã ngak iek hu tỉnh palih ruah padang ngak palei pala bahrau  paglaong. Ong Nguyễn Thanh Hải, Akaok UBND xã Vĩnh Kim, brei thau: Danak dak padang ngak palei pala bahrau oh karei hagait ngin bahrau jhul patagok taong abih gah kinh tế- xã hội di puk palei dak harei dak cakrok patagok. Puk palei kham merat khik kajap 19 tiêu chí mek hu blaoh saong yam tagok padang ngak xã palei pala bahrau paglaong: Tapa sa thun tabiak mbaok xã Palei pala bahrau, xã Vĩnh Kim hu rilo siam mekre jang. Gah cơ sở hạ tầng abih di nyu nan lac jalan mbak palei pala hu tuh ndal, tuh  bê tong, raidiuk di bhap bini hu paglaong. Dahlau daih, jien mek tame kuhria tui akaok menuac hu 50-52 triệu đồng, tal urak ini, lac 56 triệu đồng/ sa urang. Sang kathaot jeng trun daok 2,5%. Đảng ủy- UBND xã daok hu jalan ngak piah paglaong siam mekre yaok tiêu chí piah ngak habar khik kajap 19 tiêu chí, paglaong chất lượng dom tiêu thi tui jalan ba tabiak piah mek hu angan xã palei pala bahrau paglaong di thun 2020.
Tỉnh  Tiền Giang kham marat tal thun 2020, dalam tỉnh hu 120 xã mek hu chuẩn palei pala bahrau; 03 labik pakat huyện (lac bal Mỹ Tho, bal sit Cai Lậy saong bal sit Gò Công) ngak salah bruk padang ngak palei pala bahrau; 02 huyện mek hu chuẩn huyện palei pala bahrau nan lac  huyện Gò Công Đông saong huyện Chợ Gạo. Ong Phạm Anh Tuấn, Phaok akaok UBND tỉnh Tiền Giang daok brei thau lac: UBND tỉnh hu jao bruk ngak cambaih laih ka yaok Sở ngành, hu jalan daong dom puk palei, pakhang paglaong chất yaok tiêu chí. Khaol dahlak hu ba tabiak bruk lac, xã halei oh  khik hu 19 tiêu chí ye oh pasang iek pakacah ngan haong xã nan. 
    Mai tal Tiền Giang dalam dom harei kuhria caga yam tapa thun bahrau, kuhria caga raok sa thun bahrau daok mai veik, khaol dahlak mboh hu dom salih bahrau cambaih laih di bhum taneh tapen kraong Tiền. Angaok dom xã palei pala bahrau, jalan mbak, sang danak prong siam, bein phun bak baoh… Kadha bui sambai di danak dak padang ngak palei pala bahrau nan lac bruk salih bahrau di dom puk palei, rai diuk di bhap bani dak harei dak trei sil, haniem phol./.