Tiền Giang: Sa urang likei dam jaoh jo yam tapa thar vak

  Yaom lac jaoh jo, nao mai oh mbuan lagaih yau dom urang karei, min jeng ngak hu po sa cơ sở cơ khí, eng drei duah jien piah raong rup drei, yam tapa thar vak. Nan lac  saai Đoàn Văn Lượm, 40 thun daok di ấp Tịnh Mỹ, xã Mỹ Tịnh An, huyện Chợ Gạo, tỉnh Tiền Giang. Nhật Trường urang vak di rayo sap ndom VN daok di bhum taneran kraong hu kadha vak khan ka kreih camin ini:

         -Oh hu pataoh jamo yau dom uranaih karei, tuk 3 thun, Đoàn Văn Lượm gaok ruak pandiak bại liệt, 2 takai teo veik oh nao mai hu. Yaom lac yau nan, min Đoàn Văn Lượm jeng kham merat bac abih tan bac 4, thau puac, thau vak. Dalam tukvak ini, yaok harei, Lượm njauk nyim gauk gar, ayut sahabat cõng nao bac. Tal umo 18 thun, saai Đoàn Văn Lượm sahanneg mboh, yaom lac drei jaoh jo nao mai kan kandah, min drei daok hu dua gah tangin saong glo akaok yau nan ye likau sang tagok ban raya Hồ Chí Minh bac cơ khí.

   -Hadei di 7 thun, gam bac gam ngak bruk brei saoh ka urang, saai Đoàn Văn Lượm gheih ngak thợ hàn saong mai palei peih cơ sở hàn điện, hàn gió đá piah duah jien. Meng gheih ngak saong tari tarieng, nan ye tuai mai ngak dak harei dak rilo. Bhapnini xã Mỹ Tịnh An saong Hòa Tịnh rilo meng mai tal cơ sở di saai Lượm piah hàn giàn đồng radaih patuh atau dom pandap ngak nong tuk khut… Hu tuk, hu pandap rilo, saai ngak tal kreh melam meng padheih. Urak ini, meng sruh radaih patuh ngak eng saong radaih lăn, urang jaoh jo Đoàn Văn Lượm meda nao mai hu yau dom urang karei. Meng tari tarieng ngak mbang, raidiuk di saai hu siam jang, oh daok lac naong trak ka sang. Saai Đoàn Văn Lượm brei thau: Adei jeng oh sahaneng drei ruah bruk ngak ini. Dalam sa mbang, drei ngak di ban raya Hồ Chí Minh radaih lăn nyu jaoh, tapa gru dahlak ngak saong oh mek jien. Dahlak mboh takre bruk ini yau nan ye kham merat ngak. Tuk camereip drei bac bruk piah duah jien raong rup drei min, oh sahaneng lac trak hagiat.. Meda lac, bruk ngak jeng hu tani tanat, meyah hu jien drei buh tame, patagok drei mboh biak siam.

-Yaom lac jaoh joh siam  dua gah takai, pren yava oh khang kajap, min saai Đoàn Văn Lượm ruah bruk trak piah duah jien, ngak ka rilo urang pok meyaom. Ông Nguyễn Văn Duẫn, sa urang daok di xã Hòa Tịnh, huyện Chợ Gạo jeng lac tuai di saai anh Lượm, lac: Saai Lượm hu tật min biak kham merat yam tapa kan kandah, tari tarieng ngak bruk piah duah jien. Sa-ai kham merat ngak mbang, patak pataom jien padai. Saai ngak bruk biak gheih, dahlak mboh saai biak kham merat, tari tarieng biak njauk pok meyaom.

-Yau anek darko tari tarieng, saai Đoàn Văn Lượm  yam tapa kan kandah, yam tagok dalam ngak mbang, ba ia hauk, pren yava di drei tabiak piah ba jien tame ka rup drei saong rik daong ka xã hội, biak njauk pok meyaom.