Mikva urang pang rayo anit ranam, Luac rai bac megru saong ngak tui panuac Wa, nan lac ong Huỳnh Văn Ly, sa urang đảng, sa urang dahlau daih ngak bol lin daok di paei Lương Phú C,  xã Phú Kiết, huyện Chợ Gạo, tỉnh Tiền Giang. Ong Ly lac sa kreih camin ka bruk kham merat, abih drei ka bruk dak padang saong khik caga taneh ia, tuk halei jeng ba akaok nao dahlau dalam abih bruk di palei. Nhật Trường, urang vak di rayo sap ndom VN daok di bhum taneran kraong CL hu kadha vak ka urang ini, da-a mikva saong taong abih gauk tui pang:

Tuk umo bhrau 20 thun, ong Huỳnh Văn Ly tabiak nao tui cách mạng,  bruk ngak hu praong di ong lac cuh laik 1 sruh kapal haoh phản lực di kol khamang di xã Bình Ninh, huyện Chợ Gao; tacei jalan ka đơn vị taong tayah 2 đại đội khamang, pametai hu labaih 100 kol khamang saong mek hu rilo phao ndao di huyện Mỏ Cày Nam, tỉnh Bến Tre. 

 Taneh ia peih paha, urang dahlau daih ngak bol lin, urang thương binh ini mai ngak bruk di Tỉnh Đội Tiền Giang.  Thun 1986, ong padeih hưu saong hu brei bruk ngak Bí thư chi bộ ghép di 3 palei Lương Phú A- Lương Phú B- Lương Phú C di xã Phú Kiết, huyện Chợ Gạo. Dalam 26 thun ngak bí thư Chi bộ, ong kham merat ngak pakhang, pasiam bruk di Chi bộ, patagok parilo urang Đảng,  sangka daong urang kathaot, iek glang raidiuk, bruk ngak mbang ngak huak di dom sang sarak karja. Meng thun 1990 tal ini, ong Huỳnh Văn Ly daok halan tian nao iek glang rami ramik Nghĩa trang liệt sĩ xã- labik hu  210 đồng chí, đồng đội di ong daok ndih dalam haluk nan. 

  Yaom lac umo labaih 72 thun, min ong jeng daok hu mbaok dalam dom bruk ngak di palei, halan tian brei taneh ngak jalan, pathau khan, jak ba bhap bini rik daong padang ngak palei pala bahrau, nao dahlau dalam bruk khik caga sron mbon ka puk palei, jak ba bhap bini pakacah gauk ngak mbang, daong padang ngak ka puk palei dak harei dak tagok. Lac urang dahlau daih ngak bol lin, lac urang hu mbaok dalam rilo mbang taong praong dalam mesruh metak, ong Huỳnh văn Ly bhian hu mbaok dalam dom taom gaok, ndom biai, pathau khan ka  kháng chiến, pato pakai bruk anit ranam taneh ia ka rairah dam dara. Ndom ka bruk ngak abih hatai jai di urang dahlau daih ngak bol lin Huỳnh Văn Ly, ong Phạm Văn Sáu, Phó Bí thư Đảng ủy xã Phú Kiết lac:

Ong Huỳnh Văn Ly tuk padeih hưu bloh mai ngak bí thư Chi bộ rilo thun gam. Dalam bruk ngak, ong tuk halei jeng ngak siam bruk di drei, iek glang sang danaok, sangka brei anek bhik nao mbang bac tal labik tal dhua. Ndom ka bruk puk palei, ong rik daong biak rilo dalam bruk jak ba bhap bini, Mạnh thường quân daong ka danak dak patruh eik patrun kathaot di palei. Ong hu pok brei rlo harak meyaom dalam bruk bac megru saong ngak tui jalan hadah krah siam mekre di Hồ Chí Minh.

Ngak tui panuac Wa pato, bahrau ini ong Ly daok padang hu bruk thể dục dưỡng sinh di xã Phú Kiết piah pasram rup pabhap, pakhang pren yava tui jalan di Wa Hồ praong uranam. Kalup kapul dưỡng sinh kayua ong ngak chủ nhiệm hu 16 urang saong bhian hu mbaok tame rilo mbang pakacah di dom labik, mek hu rilo giải nhất pakat negar, pakat khu vực.  Urak ini, ong daok hu mbaok saong dang akaok kapul bóng chuyền urang praong thun, kalup kapul đàn ca tài tử xã Phú Kiết, kham merat rik daong piah paglaong bruk mbang ngui, daok dang, bruk văn, thể mỹ di palei. Ong Huỳnh Văn Ly brei thau, dom hagait ong kham merat ngak saong ngak hu lac mai meng patagok phẩm chất “ bộ đội Cụ Hồ”, kham merat bac megru saong ngak tui Wa mengdom bruk ngak mboh di anak meta:

 “Wa lac menuac biak vĩ đại, ngan saong dahlak ye bac megru Wa di labik “ liêm chính- chí công- vô tư”. Luac rai Wa kuhria ka bhap bini, brei ka bhap bini, oh sahaneng hagait ka rup drei. Dom bruk hagait ngak hu kein ka bhap bini ye Wa ngak, oh kein ka bhap bini ye oh ngak. Rai di dahlak, luac tukvak ngak bruk ka cách mạng, tuk padeih hưu jeng daok khik kajap hu hatung hatian hadah hadai di urang đảng, nan jeng lac mai meng bac megru Wa”.

Labaih 50 thun ngak bruk cách mạng, abih hatung hatai ka Đảng, ka bhap bini, ong Huỳnh Văn Ly hadah mbaok meta hu Đảng-Karja pok brei angan "Anh hùng Lực lượng vũ trang nhân dân" saong Huy hiệu 50 thun umo Đảng. Urak ini, yaom lac umo taha, thun praong, min hatung hatian abih drei ka Đảng, ka bhap bini jeng daok tamo dalam ong yau harei halei, abih di nyu nan lac dalam bruk pato pakai lamu meng kan ka dam dara, urang daok ranaih umo, rai hadei di taneh ia.

Meng bruk abih hatai jai, ba akaok nao dahlau, abih drei dalam bruk ngak di ong Huỳnh Văn Ly  hu daong ngak brei medeih tagok bruk pakacah gauk di taong abih gah di urang jakar, urang đảng saong bhap bini di xã Phú Kiết. Ong njauk lac “phun praong pacang halui” ba li-an bingi ka menuac sia, ka raidiuk./.