Bhian rao tangin meng sabon piah patrun patakik bruk njom mbak

Dalam 2 harei puac adit bloh, di tỉnh Hậu Giang hu labaih 160 urang hu brei harak lac abih vaktu daok karei 14 harei, dalam dom urang nan hu labaih 150 urang nao angaok dom sruh kapal haok par meng Hàn Quốc mai. Palao tỉnh Hậu Giang mai veik haong puk paga, sang danaok, rilo urang mboh drut druai anak bruk sangka biak abih hatai di urang jakar pak ni dalam dom harei tapa. Saai Nguyễn Văn Dụng daok di tỉnh Ninh Bình, lac urang ngak bruk di Hàn Quốc mai, drut druai lac: “Dalam vaktu hu brei daok karei di pasak, urang jakar di pak ni abih hatai sangka daong ka adei, labik mbang huak, labik ndih daok biak siam saong laneing lahei”.

Ong Nguyễn Thanh Tùng- Yam ndok Sở Y tế Hậu Giang brei thau: Dalam luac vaktu brei daok karei di dom labik dalam tỉnh, yaok harei dom urang ruak jeng hu dut iek thân nhiệt 2 mbang, hu dom urang jakar, urang lin duh lasei 3 var tui tiêu chuẩn di bộ đội lac 57.000 đồng/ sa harei. Lingiu di nan, tỉnh jeng daong brei kamo, phui saong dom pandap piah pandar ka urang daok karei. Di yaok duk daok karei jeng hu số điện thoại piah ka urang daok karei tuk gaok bruk hagait caong daong ye ieu ka mBan khik ramik labik daok karei. Urak ni, tỉnh hu ramik caga 5 labik daok karei meda taduan raok hu labaih 1.500 urang. Gam tui di nan, dom huyện, ban sit dalam tỉnh jeng hu ramik dom labik daok karei, labik iek ruak…caga tuk hu bruk oh siam tamuh tabiak. “Urak ni hu jaik 250 urang hu brei daok karei. Dalam tỉnh kayua dịch tễ oh hu nan ye drei brei daok karei di sang saong kakei dom urang nan ngak njauk tui dom nguyên tắc, oh tabiak langiu, takik taom gaok rahra jaik taphia, tuk taom gaok gauk ye cuh khẩu trang, bhian rao tangin meng sabon piah patrun patakik bruk njom mbak”.

Ong Đồng Văn Thanh- Phó akaok thường trực UB bhap bini tỉnh Hậu Giang ndom mayai lac: Dalam vaktu tapa, Hậu Giang ngak catang tui panuac pato tacei di Trung ương ka bruk pacang caga jit ruak Covid-19. Taphia nan parabha bruk ka yaok urang dalam mBan pato tacei, urang dang akaok tỉnh jeng hu ieu kakei dom puk palei sa hatai haong gauk dalam yaok bruk ngak yau ye khik iek dom urang dalam bhum palei, brei daok karei dom urang mboh yau njom ruak atau mai meng bhum hu jit, peih bruk pathau khan … “Bruk pathau khan ye khol dalak hu jao bruk ngak ka dom kapul di dom puk palei. Dom kapul ni nao pathau khan ginup piah ka bhap bini oh suh sah hatai min jeng oh maong biar, oh iek lap bruk pacang caga caga jit. Mayah nao sang bloh, khol dalak jak ba daok karei di sang, hu dom kapul jakar tui iek saong pato tacei bruk pacang caga jit ka nyu siam”.

Urak ni dalam tỉnh Hậu Giang daok 257 urang hu tui iek, brei daok karei. Dalam nan hu 17 urang daok karei di 1 labik praong, 237 urang daok karei di sang saong 3 urang daok karei di sang mac, công ty. Tal vaktu ni, abih dom urang nan jeng hu prein yava tani tanat, oh mboh njom ruak Covid-19./. 

Urang lang: Thu Thảo - 19/03