Ninh Thuan ba ilamu glong tame pandar dalam bruk ngak nong 

Kuhria tal akaok bilan 12, UBND tỉnh Phú Yên hu tabiak bruk brei daong ka labaih 101.300 urang gaok kan kandah kayua njauk jit Covid-19 tui bruk ba tabiak di Rajaei, ngan saong yaom jien abih tih labaih 154 tỷ đồng. Langiu di nan, hu 31.400 urang ngak daok blei Bảo hiểm oh hu bruk ngak saong 5.165 urang padeih blei Bảo hiểm oh hu bruk ngak jeng hu daong abih tih labaih 85,8 tỷ đồng. Tukvak tapa, dom pasak dịch vụ bruk ngak dalam tỉnh bhian peih dom bruk giao dịch bruk ngak. Njauk caik hatai lac, dom mbang giao dịch bruk ngak hu peih ngak  lưu động. Tapa nan, pambuak dom doanh nghiệp haong urang ngak.

Tỉnh Ninh Thuận daok jhul samar bruk pandar công nghệ glaong tame bruk pala drak piah ngak tabiak dom bhum, danak dak biak praong saong ngak tabiak dom pandap panda kaya nong hu chất lượng glaong pabak hatai caong di darak pasa, ba ngak nong công nghệ glaong jeng sa gah praong dalam bruk cak rok patagok kinh tế di pak ini. Tui nan, vaktu 2021 – 2025, Ninh Thuận ba tabiak bruk patagok yaom gah ngak nong hu meng 3 tal 4% sa thun, dalam nan, bruk patagok yaom ngak tabiak kaya nong pandar công nghệ glaong hu meng 30 – 40% sa thun

Hadei di labaih 1 bilan peih pabah mbang taduan raok tuai veik, gah du lịch Bình Thuận daok peih ngak dom jalan ngak lagaih piah pasiam veik saong palagaih haong bruk  “siam mekre bahrau”. Tui Sở Ilamu, Thể thao saong Du lịch, meng tuk peih pabah mbang tal urak ini, Bình Thuận hu labaih 50 labik ngak du lịch, labik pah daok hu ginup kadha piah raok tuai dalam taneh ia. Dalam tỉnh hu taduan raok labaih 5.000 mbang tuai. Jaik abih lac tuai mai meng dom tỉnh, ban yau: Đồng Nai, TPHCM, Bình Dương, An Giang, Long An… Kuhria tal tukvak ini, taong abih dom urang ngak dalam dom labik ravang me-in; 80% rahra di dom palei du lịch hu klauk ginup vaccine. Ini jeng lac sa dalam dom siam lagaih piah ka Bình Thuận hu labik ravang me-in salamat.

Pambah lamnge dunya Cái Mép, tỉnh Bà Rịa– Vũng Tàu bahrau taduan Cẩu bờ  ship-to-shore biak praong. Ni lac bruk camriep dalam jalan ngak peih praong bruk ngak mbang pandar pabah lamnge ia dalam di pambah lamnge dunya Cái Mép. Cẩu bờ ship-to-shore lac janih biak praong, trak 1.500 tấn, hu prein pok tagok glaong di abih lac 100 tấn saong tangin atah meda pok, caik tal 23 talei container angaok glai. Ini lac Cẩu bờ ship-to-shore ka 6 di pambah lamge Cái Mép, tui kuhria hu ngak salah ba tame ngak iek dalam bilan 12 ni saong ba tame pandar meng bilan 1/2022.

Meng harei 24 tal harei 26/12, harei pataom ilamu bangsa Mông mbang ka III thun 2021 hu peih tabiak di tỉnh Lai Châu ngan saong kadha “Khik ramik, patagok ilamu bangsa Mông-samu gauk, jum pataom, ba drei tame saong patagok. Harei pataom hu mbaok di nghệ nhân, nghệ sỹ, bhap bini bangsac Mông mai meng 10 tỉnh bhum ceik gah brak saong 2 tỉnh hu rilo bhap bini bangsa Mông lac Đắk Lắk, Thanh Hóa. Thứ trưởng Mintri Ilamu, Thể thao saong Du lịch Trịnh Thị Thủy brei thau, Harei pataom ilamu bangsa Mông mbang ka III lac sa bruk praong, brei mboh bruk pok meyaom ilamu sa bangsa hu rilo ilamu dalam bhap bini 54 bangsa adei sa-ai. Ini jeng lac tuk piah yaih khan dom yaom glaong ilamu meng kan di bangsa Mông tal ayut sahabat dalam taneh ia saong langiu dunya, rik daong patagok du lịch, patagok KTXH.

Meng harei 1/1/2022, Bắc Kinh meda peih adat pakauk cuh phao di dalam ban saong tut Tết Nguyên đán thun ini di pak ini meda oh daok dom labik pablei phao lẻ. Meng bilan 4/2021, abih tih dom quận dalam ban Bắc Kinh hu jhul samar bruk peih ngak adat pakauk cuh phao dalam labik brei adat piah khik siam bruk an ninh đô thị saong trun bruk tachrauk nerak alam không khí.

UB ka bruk ngak samu gauk di Mỹ (EEOC) hu tabiak harak tacei pato, dalam nan tacei lac urang ngak njauk Covid-19 trak meda hu pandar Hukum pakauk neh rabha ngan haong urang jaoh jo di labik ngak bruk. Tui tacei pato di EEOC, dom menuac njauk Covid-19 hu triệu chứng dui atah rilo adit saong meng ruak ngak brei rup hu dom bruk yau “jaoh jo” tui Hukum ka urang Mỹ jaoh jo (ADA). Mi jabat ini hu panuac kakei lac pandar hukum ini iek tui yaok bruk, yaok urang. ADA khik caga urang jaok jo klah di bruk mbuan njauk brei padeih bruk atau njauk neh rabha. Hukum jeng ieu po pandar urang ngak brei khik siam dom  điều kiện ngak bruk ka urang ngak jaoh jo.

Liên đoàn ruak ma-ik saradang dunya kuhria tal thun 2030 di dalam dunya meda hu takik di abih lac 630 triệu urang njom ruak ini. Dalam 2 thun jaik di ini, dom dam dara njom ruak ma-ik saradang di dunya tagok 16%. Taeng di Mexico, Liên đoàn Ruak ma-ik saradang di negar bahrau ini hu khan brei thau dom kan kandah di jit praong COVID-19 ngan haong dom urang njom ruak ma-ik saradang di taneh ia ini. Makna lac jit praong daok ngak oh siam tal jalan diukrai saong bruk pahat rup di bhap bini. Tui kapul nan, dalam yaok 6 urang Mexico ye hu 1 urang njom ruak ma-ik saradang, samu haong tanut tagok lac 10% dalam 2 thun tapa. Dom urang ilamo brei thau lac dom bruk ngak piah patakik njom ruak COVID-19 ngak brei patrun 30% bruk pahat rup di ranaih, ba tal bruk labaih lamek tagok samar jang, dui tui nan lac bruk patagok dom urang ruak ma-ik saradang týp 2 pambuak tal bruk lamek labaih kilo di urang ranaih umo./.

Urang lang: Thu Thảo -Mousaphuong- 18/12