Ban giám  hiệu sang bac pambuak haong gah y tế pasang iek prien yava ka anak saih daok bac ta-a dalam sang bac

Paih khik prien yava ka anek saih, sinh viên, tỉnh Vĩnh Long brei ka anek saih padieh bac 15 harei tra hadei di Tết nguyên đán. Dalam vaktu padieh bac, dom sang bac hu ngak haci hacih tal bac, pasang iek veik dom urang jakar, gru pato, anek saih hu nao tal labik hu sruh jit dalam dom harei padieh tết, gam tui di nan jeng pambuak haong gah y tế pieh tabiak  dom tal pato pasram piah paglaong ilamo pacang caga jit ruak ka taong abih urang jakar, gru pato dalam tỉnh.  Dalam bruk ngak haci hacih tal bac, gah pato megru sangka tal pandap panda main di ranaih di dom sang bac mầm non, mẫu giáo. Nai gru Quan Thị Thùy Linh, Hiệu trưởng sang bac mầm non Hoa Lan, ban Vĩnh Long brei thau: “ Sang bac hu pieh bruk puh ramik haci hacih tal bac. Dalam nan pandap main hu rao uak meng Cloramin, mblang sang bac hu puh ramik saong ngak hacih meng jru pametai anek ruak, tuk tame sang bac anai gru tui iek uraniah meyah mboh nyu hu hagait karei ye pambuak bruk haong amaik ame piah ba  ranaih tal labik y tế iek ruak.”

Di dom sang bac cao đẳng dalam tỉnh, Ban giám  hiệu sang bac bhian pambuak haong gah y tế pasang iek prien yava ka dom urang jakar, tuan gru saong dom sinh viên daok bac ta-a  dalam sang bac, pabak jru tavao saong hóa chất paih ka sinh viên ngak hacih ký túc xá. Gam tui di nan jeng jhul patagok bruk yaih khan paih paglaong hatai sahaneng di sinh viên dalam bruk pacang caga jit ruak. Cei gru Nguyễn Công Khải,  giảng viên sang bac Đại học sư phạm kỹ thuật tỉnh Vĩnh Long daok brei thau lac: “Tuk pato drei cuk khẩu trang, khan ka sinh viên, amaik ame saong gauk gar thau piah hu dom jalan pacang caga jit ruak siam lagaih, paglaong hatai sahaneng dalam bruk pacang caga jit ruak”.

Di dom labik công nghiệp lac labik hu rilo urang ngak saong urang jakar negar langiu ngak bruk hu tỉnh Vĩnh Long sangka pacang ruak. Urak ni dalam tỉnh hu 6 doanh nghiệp daok langiu labik công nghiệp hu pah urang ngak bruk negar Trung Quốc lac 16 urang saong 9 doanh nghiệp dalam labik công nghiệp hu pah urang ngak bruk lac Trung Quốc 148 urang. Dahlau Tết nguyên đán abih dom urang ngak bruk negar langiu jeng nao palei, urak ni daok mai gilac piah ngak bruk. Dom urang ngak bruk negar langiu mai ngak bruk veik jeng hu urang jakar pak ni saong gah y tế pasang iek prien yava yaok harei paih langyah samar tuk rahtabiak jit ruak. Muk Bùi Cẩm Tú, Phó tổng giám đốc công ty TNHH Boshing, labik công nghiệp Hòa Phú brei thau: “Urak ni dalam doanh nghiệp khok dalak hu 24 urang negar langiu saong hu mai ngak bruk veik di công ty lac 4 urang. Dom urang Trung Quốc ni, mayah tapa ngak bruk haong khok dalak ye kol dahlak hu caga labik daok karei paih khik pabak vaktu brei daok karei lac 14 harei”.

Ong Văn Công Minh, Giám đốc sở y tế tỉnh Vĩnh Long brei thau, tỉnh hu jalan pacang caga jit corona ka yaok tukvak  yau tuk ka oh hu urang ruak, tuk hu urang ruak saong tuk jit tamuh tabiak. Jalan ngak ni hu pasram ngak iek piah paglaong hatai sahaneng saong trách nhiệm di dom y bác sỹ dalam tỉnh.

Urak ni, tỉnh Vĩnh Long hu 4 sang bet hu điều kiện taong jit ruak ni, lac: Sang bet đa khoa tỉnh, sang bet lao saong ruak  phổi,  Sang bet Xuyên Á saong sang bet Triều an – Loan Trâm. Dom sang bet ni hu tỉnh daong pabak dom pandap panda piah taduan saong taong ruak ka dom urang ruak tuk hu jit ruak tamuh tabiak.

Daok Sang bet đa khoa tỉnh hu ramik sa duk iek ruak njom mbak paih taduan saong parabhah dom urang njom jit ruak paih pacang cakak jit ruak, pacang njom mbak ka urang karei dalam sang bet;  padang 2 kapul cơ động biak samar pacang caga jit viêm jalan suak yava kayua vi rút corona, caga ginup jru javao, trang thiết bị y tế ka bruk hồi sức cấp cứu saong taong ruak; pathau khan, pato tacei ka urang ruak, gauk gar hu urang ruak njauk cuh khẩu trang, ngak hacih rup pabhap meng jru pametai anek ruak, njauk cuk khẩu trang tuk nao tal sang bet paih iek ruak.

Tỉnh Vĩnh Long jeng hu padang kapul pacang caga jit pakat tỉnh kayua aKaok UB bhap bini tỉnh par akaok. Dom huyện, ban sit  jeng hu padang bloh mban pacang caga jit di yaok puk palei paih pieh bruk pacang caga jit hu siam lagaih. Ong Lữ Quang Người, akaok UB bhap bini tỉnh Vĩnh Long brei thau:”Njauk brei thau cambaih dom harak di tỉnh di trung ương dalam bruk pacang caga jit, takik pataom gauk ginum baai, bo khan brei thau meng harak gar, kênh thông tin karei, ngak habar paih ka abih urang jakar ngak bruk saong bhap bini thau dom khau tin. Brei thau dom bruk pacang cakak jit lac bruk biak praong, oh maong biar”

Kuhria tal urak ni, Vĩnh Long ka oh mboh urang halei njauk njom ruak virus Corona, langiu di dom urang mboh medil daok hu brei daok karei di Sang bet đa khoa tỉnh Vĩnh Long. Meng bruk caga pacang jit ruak Corona tani tanat yau urak ni, Vĩnh Long daok caga pacang hu siam tuk jit tamuh tabiak dalam tỉnh./.

Urang lang: Thu Thảo – 20/2