Dalam thun 2017, taneh aia drei hu mboh ralo kareih camin naih ghaih lac bhap bani urang bangsa takik. Dom urang nan hu ralo rik daong dalam rai diuk, caik veik ralo kadha siam gheih dalam hatai bhap bani. Daok ngan haong mikva urang Cam An Giang, angan Tuan Rozaly lac biak anit ranam, biak hu iek praong. Meng dom rik daong ka bhap bani, ong Rozaly taduan mek hu ralo harak meyaom di tỉnh, di huyện. Thun bloh, ong Rozaly hu palih ruah nao pataom mbaok di harei pok meyaom urang hu angan je bangsa takik pakat negar mbang ka sa di Hà Nội. Dalam dom harei akaok thun bahrau ini, khaol drei taom gaok saong duah thau ka dom bruk ngak hu makna di ong tapa kadha vak di Hanipha – urang vak di rayo sap ndom VN daok di bal raya Hồ Chí Minh.

          Umo labaih 50 min maong ong Rozaly daok biak ranaih saong sami samar. Yaom lac daok pan rilo bruk yau: Na-ip Masjid Al Mubarak (xã Châu Phong, bal sit Tân Châu, tỉnh An Giang), Chánh văn phòng Ban đại diện Cộng đồng Hồi giáo islam tỉnh An Giang, Tuan pato hukum ka anek kamuan Cam, min ong Rozaly tuk halei jeng ngak siam bruk di drei. Langiu bruk ngak di cộng đồng Hồi giáo islam tỉnh, mai sang ong daok daong diuk anek ngak bruk sang. Tuk ndom tal angan Tuan Rozaly ye meng urang taha tal dom adei sit dalam palei thei jeng pok meyaom ong.  

Piah taom gaok hu ong dalam dom harei akaok thun bahrau ini lac oh mbuan, kayua ong tuk halei jeng jan van haong bruk agama, bruk dunya, nao rivang saong alin brei pandap tết ka dom baoh sang hu rai diuk kan kandah. Dalam thun bloh, ong Rozaly gam haong Ban đại diện cộng đồng Hồi giáo Islam tỉnh An Giang hu jak ba Hội từ thiện IHH (Thổ Nhĩ Kỳ) padang ngak brei sa baoh sang megik saong hu padang ngak bloh brei ka mikva sambahyang di ấp La Ma, xã Vĩnh Trường (An Phú), tui yaom jien lac labaih 10 tỷ đồng. Taphia di nan, Hội từ thiện Sadakatasi (Thổ Nhĩ Kỳ) hu padang ngak brei 8 tal bac Qur’an, bac sap Cam saong 1 sang mbang huak di ấp Búng Lớn (xã Nhơn Hội, h. An Phú) ngan haong yaom jien labaih 7 tỷ đồng. Dom bruk ngak di ong Rozaly hu daong ba bui sambai chreih chai, trei sil ka bhap bani Cam di puk palei.

       Urak ini  tỉnh An Giang hu 17 ribau urang Cam daok di 7 palei Cam, hu 16 baoh Surao saong 12 baoh sang megik. Dalam dom thun jaik di ini, bruk an ninh chính trị dalam bhum urang Cam tuk halei jeng khik hu siam mekre. Dalam dom harei suk yaok adit ong Rozaly tuk halei jeng hu mbaok di sang megik piah kakei mikva ngak njauk hukum agama tui tacei pato di Ban đại diện saong ngak siam dom sarak di Đảng, hukum di Karja, diuk rai siam ka dunya, mekre ka agama.

        Likau la ong Rozaly, ong brei thau caong khin dalam thun ini di ong lac duah hu labik daong brei piah padang ngak sa baoh sang bac brei ka anek kamuan urang Cam pak ini. Dalam langik la-ar bingi harei akaok thun bahrau, dahlak mboh biak chreih bui kayua dalam xã hội harei ini jeng daok hu ralo kareih camin abih hatung hatai brei ka bhap bani yau ong Rozaly. Dahlak likau tabhau ayuh ka dom hagait ong Rozaly caong khin dalam thun bahrau ini meda ngak hu, ngak jeng./.