Tổng bí thư Nguyễn Phú Trọng brei panuac tamat var ginum biai

Mesup 11/6, di jabat Trung ương Đảng, ala tacei ba di Tổng bí thư Nguyễn Phú Trọng, mintri Chính trị hu ginum biai  brei panuac ka bruk  pacang caga jit Covid 19. Hu mbaok di nyaom biai  hu dom urang  di mintri  Chính trị, lambaok urang pal akaok mban tacei jalan pakat negar pacang caga jit Covid 19, dom mintri, dom gah pagam tal. Piah samar jang dalam bruk pacang caga jit, Tổng Bí thư pandar Ban Cán sự Đảng rajaei, Đảng đoàn quốc hội, Mban tacei jalan pakat negar pacang caga  jit Covid 19, dom mintri, dom gah dom tỉnh ban pataom tame glong di abih dalam bruk pacang caga jit  tui jalan lac“pacang jit yau pacang khamang”, tacei ba cambaih laih, khang kajap, sami samar, siam lagaih , abih di nyu nan lac di dom tỉnh ban dok pambak samar, tamuh tabiak dom sruh jit prong piah samar pacang cakak jhul kadun likuh jit ruak. Tổng bí thư tacei lac brei tui iek song samar langyah dom tavak tavaiy meng adat hukum pagam tal bruk palih ruah, blei vắc xin, jak ba xã hội hoá, dui pachreih yaok pren khang tapa “kadung jien vắc xin”, pasang iek brei adat ka dom kapul nyaom, menuac urang ginup jien ndua  hu mbaok tame bruk  blei , pabak vắc xin pacang Covid-19.

Mintri y te brei thau: jala pandiak harei 11/6, dalam dom urang ruak COVID-19 daok taong ruak hu 182 urang mboh daok trak nao, saong mbuan matai. Dalam nan, 103 urang daok trak tagok, 76 urang biak trak saong 3 urang mbuan matai. Dalam taneh ia urak ni, hu 9 urang ruak daok suak yava meng ECMO. Di sang iek ruak Bệnh nhiệt đới Trung ương daok hu 21 urang biak trak mbuan matai, nan lac dom urang hu ruak dahlau dalam rup hu mboh lac njauk ruak COVID-19 dalam sang iek ruak.

Sang iek ruak  Nhi đồng 1 - TP.HCM bahrau brei thau ka sa urang ruak  lac urang raong, iek anek kama di sang iek ruak  njom SARS-CoV-2. Di melam 10/6, sang iek ruak brei dok karei tong abih labik  anek kama song padeih taduan  anek kama ruak meng dom sang iek ruak karei piah pacang caga jit. Dahlau di nan,  urang kamei lac bảo mẫu  hu taom gaok hong sa-ai kumei di drei, urang ni hu sang iek ruak  Xuyên Á test samar mboh dương tính hong  SARS-CoV-2.

Sở Y tế tỉnh Bà Rịa – Vũng Tàu hu harak ka 2833 payua tal dom puk palei, Sở ngành saong dom kapul nyaom dalam tinh ka bruk tut angan blei (sanya blei saong biyar jien) 200 ribau mbang Vắc-xin caga ruak COVID-19.Tui nan, Sở ni ba tabiak 2 janih Vắc-xin hu asal mai meng Anh saong Mỹ meda pabak brei 200.000 mbang. Hu thau, Vắc-xin Pfizer mai meng Mỹ, yaom yaok mbang lac 917.700 đồng, tukvak ba tapa lac 7 harei kuhria meng harei mbaoh tangin tame harak pambuak bruk blei Vắc-xin. Daok Vắc-xin Astrazeneca mai meng Anh, yaom lac 335.808 đồng/sa mbang, tukvak pabak brei lac 4 adit kuhria meng harei mbaoh tangin tame pambuak bruk. Dom jien khik piah, pajeng ba meng mblang kapar ahaoh Tân Sơn Nhất, peih bruk klauk jru hu kadung jien kanja daong.

Anak panuac caong di mintri Nội vụ ka dom janih chứng chỉ, pasram megru ngan saong công chức, viên chức, Phó Thủ tướng Thường trực Trương Hòa Bình pandar  mintri  Nội vụ pambuak bruk khang kajap hong dom mintri dalam tuk peih ngak pasang iek cakak patrun dom harak  chứng chỉ pasram megru; samar pasang iek, cakak dom harak chứng chỉ pasram megru oh lagaih , dalam nan hu chứng chỉ ngoại ngữ, tin học.

Gilang pariak dunya WB brei tagok tanut kuhria mboh dahlau di kinh te Trung Quốc dalam thun 2021 tagok 8,5%, dahlau di nan, tui kuhria mboh dahlau di WB ngan haong Trung Quoc taneh ia kinh tế praong ka dua di dunya lac 7,9%.  Pathau khan di WB jeng brei thau lac, kayua bruk klauk vắc xin Covid-19 oh samu gauk saong kayua kan kandah di jit ruak, bruk patruh eik patrun kathaot daok cagar veik. Dom kinh tế hu jiem mek tame bier tui kuhria tok tagok 2,9% dalam thun 2021, tapa nan jeng ngak brei mboh cambaih bruk oh samu gauk dalam patagok veik kinh te dunya.

Jit prong COVID-19 dok ngak kan kandah trak  tal dom hãng kapan haoh dunya, ngak brei dom hãng brei duah bruk dong,brei padeih menuac ngak bruk, cakak patrun bruk...Hãng kapan haoh dunya  Garuda di  Indonesia dalam 6 bilan akaok thun ni  khat  10.100 tỷ rupiah (samu  696,5 triệu USD) dalam tuk dom bilan ini thun blaoh laba hu 24,11 triệu USD.

Thống đốc bang Rhode Island, ong Daniel McKee hu mbaoh tangin brei tabiak hukum pakauk oh brei tok diuk tok pasang tuk sa atau dua diuk pasang nan oh ka ginup umo thun tui hukum di bang dalam bhum Đông Bắc taneh ia Mỹ, dalam kham merat khik caga uraniah saong pacang cakak bruk bóc lột. Dahlau daih, hukum di bang Rốt Ai-xlần brei adat urang 16 thun hu tok diuk tok pasang, meng hu bruk njauk hatai di amaik ame atau urang raong. Uranaih mela 16 thun jeng meda tok diuk tok pasang, meyah tòa án gia đình hu khan brei thau saong sa phiên tòa hu peih tabiak. Hạ nghị sĩ bang Rốt Ai-xlần, amuk Julie Casimiro, urang pachreih tui dự luật, ndom lac, bruk tok diuk tok pasang tuk daok sit, oh ka ginup umo thun tui hukum, meda ngak brei oh siam ka, bruk bac da-a saong bruk ngak mbang kinh tế di uranaih kumei, mbuan patagok bruk taong paoh gauk./.

Urang lang: H.Pha- M.P - 12/6/2021