Ong Sáu Lữ, angan bhian ieu di ong Phạm Bá Lữ, daok di phường Nguyễn Thái Bình, Quận 1, ban raya Hồ Chí Minh ralo mbang hu taom gaok dom urang ngak praong pan akaok Đảng saong karja drei, abih di nyu nan lac Tổng bí thư Lê Duẩn. Ong Sáu Lữ khan lac: ong njauk kol khamang cap dalam chiến dịch Mậu Thân 1968, hadei di nan njauk kol nyu ba tabiak kreik di sang guc Phú Quốc. Thun 1973, ong saong ralo đồng đội hu peih palao tui Hiệp định Pa-ri. Dalam tukvak tabiak gah barak padeih padei, ong hu taom gaok Tổng Bí thư Lê Duẩn: 

 “Ong Lê Duẩn biak rap ar, tangi sua ka sang dahlak, ka bruk ngak, ka bruk daok guc, kol khamang nyu taong paoh yau habar, mesruh metak dalam dom sang guc Mỹ ngụy yau habar. Anak bruk sangka di sa urang lãnh tụ praong, dahlak mboh biak druc drui saong tuk halei jeng kham merat pasram megru piah jeng sa urang đảng naih gheih di Đảng”.

Ong Sáu Lữ saong ralo đồng đội di drei mbiah tal urak ini jeng daok taong yaom glaong akaok saneng sami samar, kuhria mboh dahlau di Tổng Bí thư Lê Duẩn ngan saong cách mạng gah meraong. Ong Sáu Lữ ndom lac Tổng Bí thư Lê Duẩn nan sa urang dang akaok biak giản dị, jaik saong bhap bini. Kayua yau nan ye bo ong duah tabiak quy luật meng bruk mesruh metak di bhap bini, duah pataom meng bruk di anak meta ngak jeng lý luận cách mạng.      

Tui dom urang roh duah gah sajarah, Tổng Bí thư Lê Duẩn hu rik daong biak praong ngan saong cách mạng gah meraong. Hadei di hiệp định Giơnevơ hu mbaoh tangin, thun 1954, kuhria mboh dahlau bruk si rah tabiak, thun 1956, tuk daok ngak Bí thư xứ ủy Nam bộ, ong Lê Duẩn hu vak “Đề cương cách mạng miền Nam” ndom tal bruk bạo lực cách mạng saong đấu tranh vũ trang. Dalam tukvak cách mạng gah meraong njauk kol khamang kateik greik khang, brei hu sa kapul pan phao kraong khang meng khik ka bruk đấu tranh  chính trị hu jak jeng, ong hu ba tabiak saong pok panuac tagok TƯ tabiak Nghị quyết 15.     

Nghị quyết ini tabiak rai piah pabak njauk bruk di tuk nan saong pabak hatai caong khin di ralo urang jakar, urang đảng, bhap bini, langyah chip bruk nao tagok di cách mạng gah meraong lac brei pandar bạo lực cách mạng, brei salih tapa đấu tranh vũ trang, piah ba phong trào tabiak truh kan kandah. Nghị quyết 15 hu peih jalan ka cách mạng gah meraong nao tagok, salih tình thế, ba tal dom bruk “đồng khởi” oanh liệt di gah meraong thun 1960, ngak tayah rilo bộ máy kìm kẹp di karja khamang di bhum palei pala, gah cách mạng dak harei dak mek hu quyền ngak po, daong peih tabiak ka dom jalan patagok patui di nan di cách mạng gah meraong. Tiến sĩ sử học Trần Thị Nhung ndom lac:  

 “Bruk patuh tabiak di phong trào đồng khởi di gah meraong ba tal bruk puac di abih lac bhap bini saong gah cách mạng hu ngak po ralo palei pala gah meraong tuk nan. Tapa nan brei mboh bruk ngak njauk dalam jalan nao di Lê Duẩn dalam bruk pacap brei salih jalan đấu tranh tapa đấu tranh vũ trang bạo lực piah pajaleih karja Ngô Đình Diệm”.    

Jalan saneng di Tổng bí thư Lê Duẩn ndung bak dalam tác phẩm “Thư vào Nam”. Gam saong bruk pandar bạo lực cách mạng, ong Lê Duẩn hu tacei cambaih: dalam bruk mesruh pacang Mỹ, oh lac đấu tranh vũ trang saoh bo kol drei brei pambuak đấu tranh chính trị saong đấu tranh vũ trang meng jayah hu kol khamang. Ngak tui jalan ini, dalam luac bruk mesruh pacang kol Mỹ, bruk hu mbaok di bhap bini dalam đấu tranh chính trị nan nyu ngak chế độ Việt Nam cộng hòa tuk nan di gah meraong njauk srau kadau saong ralo tuk brei salih chiến thuật. Abih di nyu nan lac, dalam đấu tranh cách mạng di gah meraong, Tổng bí thư Lê Duẩn tacei tabiak brei mboh cambaih ka jalan meblah taneh, meblah bhap bini. Ong ndom lac: kol drei hoạt động vũ trang, peih dom mbang taong , dom chiến dịch piah pametai  kol khamang, nan bahrau lac sa bruk, daok bruk ka 2 lac meblah veik taneh, meblah veik bhap bini. Meyah oh meblah veik taneh, meblah veik bhap bini ye oh hu labik dang, oh hu bruk daong di bhap bini ye oh hu bruk pabak ka hậu cần saong lực lượng ka bruk mesruh metak. Meng jalan ngak ini bo dom lực lượng di kol drei bám trụ di dom bhum di gah meraong, meng palei pala bloh tame ban, yasa taneh ia di harei 30/4/1975.  Đại tá, Phaok Giáo sư, Tiến sĩ Hồ Sơn Đài, dahlau daih lac akaok Phòng Khoa học quân sự Quân khu 7 ndom ka labik dang di Tổng bí thư Lê Duẩn ngan saong cách mạng gah meraong:

 “Ong Lê Duẩn hu mai saong TƯ đảng drei tacei jalan đấu tranh peih paha bangsa, padang lực lượng saong tiềm lực di bruk mesruh metak; padang lực lượng vũ trang, ba tabiak jalan đấu tranh vũ trang lagaih saong dom bruk đấu tranh chính trị, đấu tranh binh vận, đấu tranh ngoại giao, piah kol drei dak harei dak taong jaleih dom chiến lược, mesruh metak di kol khamang”.  

Tổng bí thư Lê Duẩn lac sa dalam dom kiến trúc sư quan trọng abih ngak jeng jayah di bruk mesruh metak pacang kol Mỹ, daong ka taneh ia. Abih di nyu nan lac hatai jai, tình cảm, pren yava di ong ngan saong cách mạng gah meraong tapa dua bruk mesruh metak pacang kol Prang, kol Mỹ hu sajarah dak rai ghi nhận saong bhap bini Nam bộ khik mepiah dalam baoh hatai yaok urang./.