Rilo doanh nghiệp di bal raya HCM pasiam veik bruk ngak mbang

  Dalam tukvak jit ruak Covid-19, jien mek tame di Công ty Tân Quang Minh (Bidrico) laik trun biak samar. Min, meng hu sarak brei patrun, dui atah tukvak kak je saong patrun jien laba gilang pariak tal 0,3%/bilan, urak ini doanh nghiệp hu yam tapa kan kandah anak meta. Hadei di tuk pacang hu jit ruak, dalam bilan 5, Bidrico ba tangin tame pasiam veik bruk ngak mbang, jien mek tame hu jaik 40 tỷ đồng. Ini lac tanut tagok glaong abih di công ty dalam 17 bilan tapa. 

  Meng bruk ngak hu ini, ong Nguyễn Đăng Hiến, Akaok giám đốc Bidrico caong khin bruk dui atah tukvak kak je njauk katung atah jang piah ka doanh nghiệp hu grap tanat bruk ngak mbang, pablei salih: Sarak brei dui atah tukvak kak je hu daong ka doanh nghiệp langyah hu kan kandah gah jien padai. Min, sarak ini njauk brei dui atah tal abih thun meda ba mai mbuan laghaih jang ka doanh nghiệp, kayua dalam dom bilan 2, 3 saong 4, jien mek tame biak biar, doanh nghiệp oh hu jien piah kak je dalam bilan 9, bilan 10. Tui dahlak, bruk daong brei dui atah tukvak kak je takik abih nan lac thun 2020.

Jeng gaok biak rilo cuang kandah kayua jit ruak, min Công ty Qui Phúc thau pagam pambak tame bruk di anak meta, ngak tabiak saong pabak 1 ribau meneng ndih iek ruak ka dom sang iek ruak dã chiến saong patagok bruk pablei pandap online. Urak ini, meng hu sarak pachreih blei pandar di bal raya, pandap panda di Quy Phúc daok pablei hu rilo.

Ong Dương Thanh Đảo, Yam ndok Marketing Công ty Qui Phúc brei thau: dom đơn hàng pablei tapa Thái Lan, Malaysia saong Myanmar daok tagok. Công ty daok blei jamriak pandap panda piah patagok pren khang ngak tabiak, peih prong darak pasar. Ong Đảo caong lac dom mentri, dom gah chức năng jhul khang jang danak dak pachreih bruk blei pandar piah daong ka doanh nghiệp pablei hu pandap panda: Khaol dahlak caong lac darak pasar meda cakrok patagok dalam tukvak anak tal. Caong khin dom mentri, dom gah chức năng peih danak dak pachreih bruk blei pandar ka nyu prong jang dalam negar, daong ka doanh nghiệp pablei hu pandap panda saong jhul patagok bruk ngak tabiak”.       

Meng hu dom sarak di Raja-ei saong bal raya dalam bruk daong doanh nghiệp gaok kan kandah kayua Covid-19, rilo doanh nghiệp di bal raya HCM daok tagok veik bruk ngak mbang pablei salih. Dalam bilan 4, Cục thuế TPHCM hu brei dui atah tukvak kak je ka dom doanh nghiệp labaih 4 ribau 210 tỷ đồng. Dom gilang pariak ramik veik tukvak ba-yar sre ka labaih 162 ribau doanh nghiệp, ngan haong jien brei mesre 51 ribau 800 tỷ đồng; patrun oh mek jien jhung ka 17 ribau 758 urang mesre, jien brei mesre 48 ribau 770 tỷ đồng. Bal raya jeng peih ngak dom danak dak pachreih bruk blei pandar thun 2020 saong pambuak pagam dom doanh nghiệp.

Ong Hà Ngọc Sơn, Akaok pablei salih tame tabiak negar Sở Công thương TPHCM brei thau, anak tal, danak dak khuyến mãi 60 harei ameh meda hu peih ngak, yaom jien brei patrun labaih 50% - glaong abih kuhria meng dahlau mai ngan haong yaok ribau doanh nghiệp hu mbaok tame: “Sở Công thương meda pasang iek saong tui mong dom asal kadha khuyến mãi, khik kajap chất lượng pandap. Pandap khuyến mãi  njauk hu asal cambaih laih, siam, bingi yau doanh nghiệp pathau khan.       

Tukvak anak tak, TPHCM daok palagaih ka doanh nghiệp dalam bruk mesre phun jien, dui atah tukvak, patrun jien kak je, patrun jien laba mesre, patrun jien điện, jien aia, khik takai urang ngak… piah khik tani tanat saong patagok bruk ngak mbang. Ong Trần Vĩnh Tuyến, Phaok Akaok UBND TP.HCM brei thau: Bal raya meda hu dom jalan ngak cambaih laih, tapa bruk ngak di dom hiệp hội doanh nghiệp piah daong ka doanh nghiệp. Trách nhiệm di  doanh nghiệp lac langyah saong taong yaom piah pasiam veik bruk ngak mbang, pablei salih ye caong khin hu dom sarak hagait. Khaol dahlak ngak bruk haong yaok hiệp hội piah tui pang saong langyah.

Dalam tukvak oh ka abih kan kandah, bruk dom doanh nghiệp pasiam veik bruk ngak mbang pablei salih nan lac kadha bui sambai. 14 hiệp hội ngành nghề di bal raya daok tui iek catang dom hagait rah tabiak piah samar brei thau dom tavak tave, kan kandah di dom thành viên. Meng nan pok likau dom jalan peih talaih cambaih laih, rik daong cakrok patagok bahrau ka kinh tế TPHCM./.

Urang lang: Jasi - 23/6