Van page di Muyim Chứng tích chiến tranh, hu biak rilo tuai du lịch negar langiu saong dom kapul nyaom urang lin, anek saih mai ravang iek. Langiu di dom pandap panda, harak gar tư liệu biak rilo ka bruk mesruh metak bo muyim ini daok khik piah dui pachreih tuai damuai mai duah thau, ye dom bruk ngak hu pambuak pagam tal yau parang iek tui kadha, taom gaok ndom biai nao mai haong manuac urang pambuak pagam tal, salih bahrau jalan dak caik saong ngak brei mekre pandap panda meng ánh sáng…jeng hu daong ka muyim tuk halei jeng hu rilo menuac mai mong iek. Muyim daok hu dua dua akhar  Việt- Anh brei thau cambaih laih ka yaok janih pandap, tư liệu piah ka tuai damuai thau, dom asal kadha parang iek jeng tui jalan khách quan, brei mboh rilo hatai sahneng karei di gauk. Ong Châu Phước Hiệp, Phaoak akaok Muyim brei thau: Bruk pachreih tuai damuai mai mong iek Muyim Chứng tích mesruh metak dak harei dak rilo nan lac di labik salih bahrau hình thức gah langiu, asal kadha parang iek, dom dịch vụ nao gam. Meda ndom lac, tukvak jaik di ini muyim bhian ramik pasiam dom asal kadha parang iek, ba pandap panda công nghệ tame piah daong ka tuai damuai mong iek thau hu asal kadha siam di abih.

Yau nan min, Muyim Chứng tích chiến tranh nan lac sa dalam oh rilo muyim di TPHCM harei halei jeng hu rilo tuai. Rilo muyim karei tok tuai di harei Car, harei dit, tuk padeih lễ atau tuk hu dom mbang parang iek, daok harei karei ye biak joa, biak takik menuac.

Hu dom makna ngak ka muyim oh ka pachreih hu tuai damuai, dalam nan hu bruk lac bhap bani bal raya saong tuai damuai dalam negar oh ka bhian randap duah mai tal muyim. Sa-ai Nguyễn Thanh Tú, sang daok di quận 1, tok abih dom minit nao radaih patuh, atau nao kabak hasit jeng nao tal rilo muyim, min biak takik nao mong iek, lingiu di tuk hu ayut sahabat daa nao mong parang iek… Sa-ai Tú brei thau: Bhap bani drei takik palih ruah labik nao tal nan lac muyim. Ngan haong dahlak, tok nao tal muyim tuk halei pak nan hu bruk parang iek. Hu mbang dahlak ndom biai nao mai haong sa Việt kiều, urang nan sua tangi dahlak lac habar oh nao tal muyim, dahlak javap lac dahlak oh hu tukvak ye njuak urang Việt kiều nan phê bình dahlak. Urang nan ndom lac, labik nan lac labik daong ka drei thau cambaih jang ka dom hagait rah tabiak dalam xã hội labik drei daok diuk rai, meyah drei nao tal muyim piah duah thau ye  mboh biak chreih chai.

Gam haong makna khách quan kayua bhap bani takik palih ruah muyim ngak labik nao rivang iek, duah thau ye daok hu makna chủ quan mai meng dom baoh muyim. Yau ye Miuyim Phụ nữ Nam bộ hu dom pandap panda, bộ sưu tập biak hấp dẫn min cơ sở vật chất daok mbaih mbaoh, sit, ganik jeng lac sa điểm trừ. Urak ini muyim ini daok hu ramik veik, gam ngak pasiam gam padang ngak bahrau ngan haong hatai caong khin hu rilo tuai damuai mai mong iek jang hadei di rilo thun joa lange.

Sa kadha njuak duh hatai tra nan lac urak ini, bruk langyah, ndom biai biak cambaih laih meng sap Anh tuk tuai damuai hu caong khin ye dom muyim takik labik halei ngak hu. Sa-ai Nguyễn Thị Phương Lan, urang ngak di Phòng Văn hóa, Viện Goethe TPHCM brei thau: Bruk khan brei thau di dom muyim dalam bal raya oh ka hu rilo. Pagap yau, dom urang tuai negar langiu hu roh duah ye biak caong khin nan lac hadei di tuk nao rivang muyim bo dom urang ini hu panuac sua tangi ye dom urang nan njuak sua tangi thei, dom urang ini caong khin hu dom mbang ndom biai nao mai haong dom urang hu chuyên môn. Kadha ini di dom muyim negar langiu mboh biak mbuan kayua lac dalam muyim tuk halei jeng hu urang chuyên môn, khik iek pak muyim saong meda javap jaleiy dom kadha sua tangi halei, dalam tuk halei jeng hu. Daok di Việt Nam drei, bruk ini mboh biak takik.

Yau nan, piah ka muyim pachreih hu rilo tuai damuai mai mong iek jang ye dom muyim njuak salih bahrau, meng jalan parang iek, asal kadha parang iek tal jalan meyaih khan tal urang mong iek, urang tui pang. Taong abih bruk ngak nan brei hu prong, dalam. Nan lac gam hu tính đại chúng piah ka thei jeng mong iek hu, thau hu, mboh takre hu, saong brei hu tính chuyên sâu piah duh ka dom tuai caong khin duah thau, roh duah./.