Caong khin duah hu hasit jien tame piah kuhria caga ka học kỳ 2 saong daong amaik ame jien bac ka dom adei pak sang, sa thun tra  Hồ Minh Tân, sinh viên Sang bac Đại học Nông lâm Ban raya HCM daok veik mbang tet atah sang. Thu-uan sang rilo min kayua raidiuk kan kandah yau nan ye Tân kham daok veik ngak duah jien, klak rabha kan kandah saong amaik ame. Patuah lac thun ini adei saong rilo ayut raidiuk kan kandah hu sang bac jeng yau ban raya peih ngak rilo bruk bui sambai piah uan raok xuan. Hu mbaok di danak dak “Sinh vien mbang tet atah sang” thun 2019 di Sang Ilamu sinh vien ban raya HCM, Hồ Minh Tân lac:“Adei mboh danak dak ini biak hu makna saong nyu pabak prein khang ka khol dahlak piah yam tapa dom kan kandah dalam raidiuk piah yam tagok ngak ka bahu dom bruk caong khin di drei.”

Ini lac thun ka 9 danak dak “Sinh viên  uan raok Tet atah sang” rik tame ngak brei bilan xuan hu makna dalam jang ka dom sinh viên raidiuk kan kandah. Thun ini, ban raya jak ba hu 300 paok pandap kuhria tui yaom jien labaih 500 trieu dong alin hadiah ka dom sinh viên mai meng 25 sang bac đại học, cao đẳng saong trung cấp chuyên nghiệp di ban raya HCM oh hu jien nao palei mbang tet. Ong Quách Hải Đạt, Akok Sang ilamu sinh viên Ban raya HCM caong lac tuk taduan hu bruk sangka, pachreih rabha ini, dom ayut ranaih umo ini hu sambai hatai, chreih chrai:“Ini lac sa dalam dom bruk ngak di Sang Ilamu sinh viênban raya HCM sangka daong ka dom sinh viên. Langiu di nan, khol dahlak daok hu dom danak dak daong dom adei kan kathaot daok di dom bhum kaoh pulao tasik atah bayah jeng yau bhum tapahi negar .”

    Tết thun ini, Pasak Daong anek saih, sinh viên Ban raya HCM hu lain hadiah 2.000 paok pandap Tết ka dom ayut raidiuk kan kandah hu mbaok tame danak dak “ Pataom mbaok sinh viên raok Tet atah sang”. Oh lac daong klak rabha meneing dom pandap panda, danak dak daok peih tabiak rilo mblang main piah ka dom sinh vien mbang tet atah sang hu taom gaok, pambuak gauk, klak rabha dom thu-uan sang tuk Tet. Di var nan hu rilo văn nghệ sĩ hu ngan je mai daoh, ndem meyai nao mai saong duah thau hatai sahaneng, dom caong khin di dom ayut sinh viên tuk tame thun bahrau. Tui ong Lê Xuân Dũng, Phó akok Pasak daong học sinh, sinh viên TPHCM, dom paok pandap oh praong min nan lac hatung hatian, lac bruk pachreih ba dom sinh viên jia tame dom bruk siam gheih daok vin val drei: “Dom sinh viên oh hu nao palei mbang tet min duah hu ka drei dom bruk sambai birau tuk mbang tet atah sang danaok. Pak ini, dom ayut duah hu rilo bruk ngak duah jien tame, dom danak halan hatian. Langiu di nan, dom ayut hu mbaok tame dom danak dak taom mbaok ayut sahabat piah cadu hatai thu-uan sang.”

           Langiu di dom bruk ngak di kapol nyaom, rilo sang bac đại học, cao đẳng di Ban raya HCM jeng peih ngak dom bruk daong sinh viên uan raok Tet atah sang. Yau sang bac Cao đẳng Quốc tế TPHCM, langiu bruk daong dom radaih bialn xuan oh abih jien, dom gru pato daok papaok ahar tapei nung, bánh chưng, iew dom urang ngak pahala rik jien daong sinh viên kan kathaot. Labaih 200 kilo brah ndiuk, rilo, ratak hu papaok ahar tapei nung pahe bingi piah brei ka dom sinh vien daok veik ký túc xá mbang tet.

          Dom pok ahar keo, mứt, dom dhar bingu mai, bingu đào hu ba tal ký túc xá saong biak rilo bruk ngak ilamu rah tabiak luac tuk tet lac bruk ngak di dom đơn vị, dom sang bac palih ruah peih ngak daong ka sinh vien raidiuk kan kandah uan rok tet. Caong khin, tuk taduan hu bruk sangka nan, dom ayut sinh vien khang hatai hu mbang tet dalam bui sambai, hu bruk ngak biak lagaih./.