Dom urang ruak tangin takai cambuai daok tagok glaong di bal raya HCM

Tui Pasak pasang iek ruak kik bal raya HCM (HCDC), meng akaok thun tal ini bal raya HCM hu 6.358 urang ruak tangin takai cambuai di 24 quận, huyện. Ta-eng adit puac bilan 9, bal raya hu 640 urang ruak, lac  glaong abih dalam taong abih dom adit kuhria meng akaok thun tal ini.

Dom urang njauk ruak dalam adit tagok veik di 19 dalam 24 quận, huyện, dalam nan 4 quận huyện hu urang ruak glaong abih nan lac quận 2, 7, 8 saong huyện Bình Chánh. Pasak pasang iek ruak kik bal raya HCM brei thau: "Ini lac bruk njauk caik hatai sangka saong khaol drei njauk ngak dom jalan pacang caga ruak piah ka jit oh njaom mbak prong" . 

Dom bác sĩ brei thau ruak tangin takai cambuai nan lac ruak njaom mbak kayua virus jalan tung pruac enterovirus, njaom mbak tapa jalan tung pruac. Urak ini oh ka hu vắc xin pacang caga ruak jeng yau oh ka hu jru iek ruak siam mekre, bruk iek ruak urak ini nan lac tok lac iek dom triệu chứng di ruak.

Ruak njaom mbak meng urang ini tapa urang diah tui jalan taom gaok tapak haong aia idung, aia pabah, chất dịch meng dom baoh aia, khak, taglon taglaoh aok di urang ruak. Ruak mbuan njaom mbak di abih nan lac di dom labik hu rilo uranaih yau sang bac mẫu giáo, sang khik iek uranaih.

Ruak tangin takai cambuai nyu ngak brei glaih glar, pandiak, pandik tarakon, haok aia idung rah tabiak dalam dom harei, hadei di nan ruak yam tapa vaktu tamuh khang. Akaok mereip nan lac bruk hu mboh dom baoh aia di cambuai, bhian di nyu lac di mbaok, lin tagei, di dalah; dom baoh aia bhong sit tamuh angaok nền niêm mạc. Dom baoh aia dalam cambuai bhian patuh biak samar ngak jeng laka biak pandik harao ngak ka urang ruak kan mbang huak. Patui di nan, mboh hu dom baoh aia di palak takai, palak tangin atau di taok, di akaok ta-uk.

Piah pacang caga ruak, dom bác sĩ kakei dom amaik ame njauk brei ka uranaih mbang pandiak, menyum tathak, labik daok hacih sa-at laneng lanoi, khik palak tangin ka nyu hacih, pandap ma-in ka nyu sa-at saong pandap panda kaya mbang menyum ka nyu hacih sa-at. Taphia di nan juai brei ka uranaih taom gaok haong urang medhil lac njauk ruak.

Tuk mboh uranaih yau njauk ruak, samar ba uranaih nan nao iek ruak atau khan brei ka jabat y tế jaik abih thau. Brei uranaih nan padeih bac tuk njauk ruak piah patrun bruk njaom mbak tal uranaih karei.

Tuk uranaih hu sa dalam dom kadha yau  pandiak glaong gam gam, ndaoh rup,  tangin takai megei yuh, dang oh kajap, taglaoh ta-aok gam gam, kalik hijao, luai suan glaih glar... njauk ba uranaih nao tame sang iek ruak chip./.

Urang lang: Jasi – 08/10